“Юлдузлар дуэли” лойиҳаси доирасида илк жонли концерт намойиш этилди

Санъат ва маданият ҳар бир жамиятнинг маънавий қиёфасини белгилаб берувчи, инсонлар қалбига эзгулик ва гўзаллик уруғларини қадовчи беқиёс кучдир. Айниқса, бугунги шиддат билан ривожланаётган даврда аҳоли, хусусан, навқирон авлоднинг бўш вақтини мазмунли ташкил этиш, уларни санъатнинг сеҳрли оламига ошно қилиш ҳар қачонгидан ҳам муҳим аҳамият касб этмоқда.

Жорий йилнинг 7 июль куни Амударё туманида ҳам ана шундай эзгу мақсадларни ўзида мужассам этган маданий тадбир бўлиб ўтди. Чойкўл овули ҳудудида жойлашган Амударё тумани Маданият бўлими тасарруфидаги 36-сонли Амударё маданият маркази ушбу лойиҳага мезбонлик қилди. Бу ерда аҳолини маданият масканларига кенг жалб этиш, уларнинг маданий ҳордиқ чиқаришлари учун муносиб шарт-шароитлар яратиш ҳамда ёшларнинг бўш вақтини унумли ва мазмунли ташкил этиш мақсадида “Юлдузлар дуэли” номли янги, ўзгача форматдаги лойиҳа доирасидаги илк жонли ижродаги концерт дастури намойиш этилди.

Концерт дастури чинакам байрамона кайфият ва унутилмас лаҳзаларга бой бўлди. Саҳнада ўзларининг бетакрор овози ва ўзига хос ижро йўлига эга бўлган ёш истеъдодли хонандалар — Ғайратжон Янгибоев ҳамда Сардорбек Машариповлар чиқиш қилди. Уларнинг ҳар бир куй ва қўшиғи фақатгина жонли ижрода янграгани томошабинлар қалбига янада тезроқ етиб боришини таъминлади.

Мухлисларнинг олқишлари ва нигоҳларидаги қувонч бу икки ижодкор томонидан тақдим этилган репертуарнинг нақадар муваффақиятли танланганидан далолат берди. Жонли мусиқа сеҳри ва дилтортар қўшиқлар йиғилганларга чексиз завқ, унутилмас таассурот ва юқори кайфият улашди.

Албатта, бундай юқори савиядаги тадбирларнинг ортида катта меҳнат, тинимсиз изланиш ва янгиликка интилиш ётади. Мазкур концерт дастури ҳам 36-сонли Амударё маданият марказининг янги тайинланган, фидойи ва ташаббускор раҳбари Қудрат Матсафоевнинг ғояси ва саъй-ҳаракатлари билан ҳаётга татбиқ этилди. Унинг маданият соҳасини ривожлантириш йўлидаги бу илк қадами йиғилганлар томонидан илиқ кутиб олинди.

Тадбирда Амударё тумани Маданият бўлими мудири, “Ватан фидойиси” кўкрак нишони соҳиби Мурод Ибрагимов ҳамда Қорақалпоғистон халқ таълими аълочиси, Қорақалпоғистонда хизмат кўрсатган маданият ходими Йўлдош Абдаловлар сўзга чиқишди. Улар ўз сўзларида бугунги кунда мамлакатимизда маданият ва санъат соҳасига қаратилаётган улкан эътибор ҳақида тўхталиб, саҳнада ўз санъатини намойиш этган ижодкорларга келгуси фаолиятларида улкан зафарлар, битмас-туганмас илҳом ва ижодий ютуқлар тиладилар.

Шу билан бирга, сўзга чиққанлар 36-сонли Амударё маданият маркази раҳбари Қудрат Матсафоевнинг ташкилотчилик қобилияти ва ташаббускорлигини алоҳида эътироф этиб ўтдилар. Маданият марказининг аҳил жамоасига келгусидаги ишларида улкан муваффақиятлар ҳамроҳ бўлишини, олдинда турган янгидан-янги лойиҳаларни амалга оширишда омад ёр бўлишини тилашди.

Томошабинлар томонидан катта қизиқиш билан кутиб олинган “Юлдузлар дуэли” лойиҳаси шунчаки бир марталик тадбир бўлиб қолмайди. Келгусида бу лойиҳа янада кенг кўламда, изчил равишда давом эттирилиши режалаштирилмоқда. Бундан кўзланган асосий мақсад эса битта — аҳолининг, айниқса келажагимиз эгалари бўлган ёшларнинг маданий ҳордиқ чиқаришини таъминлаш, истеъдодли ва элга танилган санъаткорлар ижодини халқ орасида янада кенгроқ тарғиб этиш, шунингдек, туманнинг маданий ҳаётини бундан-да жонлантириб, одамлар қалбига байрамона шукуҳ олиб киришдир.