“Yulduzlar dueli” loyihasi doirasida ilk jonli kontsert namoyish etildi

Sanʼat va madaniyat har bir jamiyatning maʼnaviy qiyofasini belgilab beruvchi, insonlar qalbiga ezgulik va goʻzallik urugʻlarini qadovchi beqiyos kuchdir. Ayniqsa, bugungi shiddat bilan rivojlanayotgan davrda aholi, xususan, navqiron avlodning boʻsh vaqtini mazmunli tashkil etish, ularni sanʼatning sehrli olamiga oshno qilish har qachongidan ham muhim ahamiyat kasb etmoqda.

Joriy yilning 7-iyul kuni Amudaryo tumanida ham ana shunday ezgu maqsadlarni oʻzida mujassam etgan madaniy tadbir boʻlib oʻtdi. Choykoʻl ovuli hududida joylashgan Amudaryo tumani Madaniyat boʻlimi tasarrufidagi 36-sonli Amudaryo madaniyat markazi ushbu loyihaga mezbonlik qildi. Bu yerda aholini madaniyat maskanlariga keng jalb etish, ularning madaniy hordiq chiqarishlari uchun munosib shart-sharoitlar yaratish hamda yoshlarning boʻsh vaqtini unumli va mazmunli tashkil etish maqsadida “Yulduzlar dueli” nomli yangi, oʻzgacha formatdagi loyiha doirasidagi ilk jonli ijrodagi kontsert dasturi namoyish etildi.

Kontsert dasturi chinakam bayramona kayfiyat va unutilmas lahzalarga boy boʻldi. Sahnada oʻzlarining betakror ovozi va oʻziga xos ijro yoʻliga ega boʻlgan yosh isteʼdodli xonandalar — Gʻayratjon Yangiboyev hamda Sardorbek Masharipovlar chiqish qildi. Ularning har bir kuy va qoʻshigʻi faqatgina jonli ijroda yangragani tomoshabinlar qalbiga yanada tezroq yetib borishini taʼminladi.

Muxlislarning olqishlari va nigohlaridagi quvonch bu ikki ijodkor tomonidan taqdim etilgan repertuarning naqadar muvaffaqiyatli tanlanganidan dalolat berdi. Jonli musiqa sehri va diltortar qoʻshiqlar yigʻilganlarga cheksiz zavq, unutilmas taassurot va yuqori kayfiyat ulashdi.

Albatta, bunday yuqori saviyadagi tadbirlarning ortida katta mehnat, tinimsiz izlanish va yangilikka intilish yotadi. Mazkur kontsert dasturi ham 36-sonli Amudaryo madaniyat markazining yangi tayinlangan, fidoyi va tashabbuskor rahbari Qudrat Matsafoyevning gʻoyasi va saʼy-harakatlari bilan hayotga tatbiq etildi. Uning madaniyat sohasini rivojlantirish yoʻlidagi bu ilk qadami yigʻilganlar tomonidan iliq kutib olindi.

Tadbirda Amudaryo tumani Madaniyat boʻlimi mudiri, “Vatan fidoyisi” koʻkrak nishoni sohibi Murod Ibragimov hamda Qoraqalpogʻiston xalq taʼlimi aʼlochisi, Qoraqalpogʻistonda xizmat koʻrsatgan madaniyat xodimi Yoʻldosh Abdalovlar soʻzga chiqishdi. Ular oʻz soʻzlarida bugungi kunda mamlakatimizda madaniyat va sanʼat sohasiga qaratilayotgan ulkan eʼtibor haqida toʻxtalib, sahnada oʻz sanʼatini namoyish etgan ijodkorlarga kelgusi faoliyatlarida ulkan zafarlar, bitmas-tuganmas ilhom va ijodiy yutuqlar tiladilar.

Shu bilan birga, soʻzga chiqqanlar 36-sonli Amudaryo madaniyat markazi rahbari Qudrat Matsafoyevning tashkilotchilik qobiliyati va tashabbuskorligini alohida eʼtirof etib oʻtdilar. Madaniyat markazining ahil jamoasiga kelgusidagi ishlarida ulkan muvaffaqiyatlar hamroh boʻlishini, oldinda turgan yangidan-yangi loyihalarni amalga oshirishda omad yor boʻlishini tilashdi.

Tomoshabinlar tomonidan katta qiziqish bilan kutib olingan “Yulduzlar dueli” loyihasi shunchaki bir martalik tadbir boʻlib qolmaydi. Kelgusida bu loyiha yanada keng koʻlamda, izchil ravishda davom ettirilishi rejalashtirilmoqda. Bundan koʻzlangan asosiy maqsad esa bitta — aholining, ayniqsa kelajagimiz egalari boʻlgan yoshlarning madaniy hordiq chiqarishini taʼminlash, isteʼdodli va elga tanilgan sanʼatkorlar ijodini xalq orasida yanada kengroq targʻib etish, shuningdek, tumanning madaniy hayotini bundan-da jonlantirib, odamlar qalbiga bayramona shukuh olib kirishdir.