ПРЕЗИДЕНТИМИЗ ҒАМХЎРЛИГИНИ БУТУН ХАЛҚ ҚАЛБАН ҲИС ҚИЛМОҚДА

 Президентимиз Шавкат Мирзиёевнинг БМТ Бош Ассамблеяси 75-сессиясидаги сўзлаган нутқларини жуда зўр кизикиш билан тингладик. Шуни  алоҳида таъкидлаб ўтишни истардикки, бугунгидай шиддаткор даврда, айниқса, коронавирус пандемияси бутун инсониятга таҳдид солиб турган ўта мураккаб вазиятда оддий халқ манфаатларини кўзлаб, халқнинг саломатлигини сақлаш, илк бор худудимизга кириб келган  кунлардан бошлаб, бутун куч ва имкониятларни ушбу кўринмас ёвни жиловлашга қаратган. Шундай мураккаб вазиятда ҳам халқнинг ижтимоий ҳимояга муҳтож қатламларига мунтазам равишда моддий ва маънавий кўмак беришни биринчи навбатдаги кечиктириб бўлмас вазифа деб билган. Ушбу савобли ва саховатли ишларнинг бошида муҳтарам юртбошимизнинг ўзлари бош бўлиб турганлари ҳам фуқароларимизнинг келажакка бўлган умид ва ишончларини ошириб юборди.
Шуни комил ишонч билан айтиш мумкинки,бу ғамхўрликни бутун халқимиз кўзи билан кўриб, қалбан ҳис қилиб турибди. Президентимиз ўз нутқларида Халқаро ҳамжамиятни пандемияга қарши бирлашиб курашишга чақирдилар. Бугунгидай инқирозли даврда озиқ-овқат хавфсизлигини таъминлашни ўта долзарб вазифа деб таъкидлаганлари келгусида бу борада муҳим ишлар амалга оширилишидан далолат бериб турибди.
Камбағалликни қисқартириш, бунинг учун қўшимча иш ўринлари яратиш, бизнесни ривожлантириш, тадбиркорликни йўлга кўйиш, фуқароларни янги касбларга ўргатиш,   шу орқали инсонларнинг муносиб турмуш шароитларини яратиш лозимлиги тўғрисидаги  ўта долзарб муаммоларни ўртага ташладилар.
Бизнинг Янгиобод маҳалламизда аҳолининг ишсиз қатламларини ишга жойлаштиришга алоҳида эътибор каратилмоқда. Айниқса, ишсиз хотин-қизларни тумандаги “Аму тех”, “Асия силк” қўшма корхоналарига, “Кардиамед” хусусий шифохонасига ишга жойлаштириб, бандлиги таъминланди. Темир дафтарга киритилган кам таъминланган оилаларнинг ишсиз аъзоларини иссиқхоналар қуриб бериб банд қилинди. Айримларини тикувчилик, нонвойлик, кир ювувчилик каби касбларга  ўргатилиб, ҳунармандчилик, томорқачилик, чорвачилик ва паррандачилик билан шуғулланишлари учун банк кредитлари олишларига ҳам ёрдам берилди.
 Шу тариқа маҳалламизда пандемия бошланган илк кунларданоқ аҳолининг ижтимоий ҳимояга муҳтож қатламлари рўйхатга олиниб, уларга маҳаллий тадбиркорлар,” Саховат ва кўмак” умумхалқ ҳаракати ва бошқа махсус жамғармалар орқали мунтазам равишда моддий ёрдам кўрсатиб келинмоқда. Кўплаб фуқароларимизнинг бугунги кунда турмуш шароитлари сезиларли даражада яхшиланди. Жумладан, 20га яқин хонадон эгалари ўз хоҳишлари билан кам таъминланган оилалар сафидан чиқиб, бугун паррандачилик, чорвачилик каби ўзлари истаган касблар билан шуғулланиб, ўз оилаларига қўшимча даромад киритиб  келмоқдалар.     
  Муҳтарам президентимиз Ш.Мирзиёевнинг БМТ Бош Ассамблеясининг 75- сессиясида сўзлаган нутқларида бугунги инсониятни ташвишга солаётган барча муҳим масалалар ўрин олганлиги билан ҳам ўта аҳамиятлидир.  

Зебо Ражабова, Янгиобод МФЙ раиси.