КАДАСТР СОҲАСИДАГИ ЎЗГАРТИРИШЛАРДАН ХАБАРДОРМИСИЗ?

Ўзбекистон Республикаси Президентининг «Давлат хизматлари кўрсатиш миллий тизимини жадал ривожлантириш бўйича қўшимча чора-тадбирлар тўғрисида» 2020 йил 31 январдаги ПФ-5930-сон Фармонига мувофиқ кадастр соҳасида давлат хизматлари кўрсатиш тизимини янада такомиллаштириш мақсадида Вазирлар Маҳкамасининг 2020 йил 2 сентябрдаги “Кадастр соҳасида айрим давлат хизматлари кўрсатишнинг маъмурий регламентларини тасдиқлаш тўғрисида”ги 535-сон қарори қабул қилинди.
Қарорнинг 1-иловасига яъни “Кўчмас мулк объектига кадастр паспортини бериш бўйича давлат хизматлари кўрсатишнинг маъмурий регламенти”нинг 3- ва 4-бандларида, кадастр паспортининг шакллари кўп квартирали уйдаги турар жойнинг кадастр паспорти, якка тартибдаги турар жойнинг кадастр паспорти, нотурар жой тоифасидаги кўчмас мулк объектининг кадастр паспорти, ер участкасининг кадастр паспорти, қурилиши тугалланмаган объектнинг кадастр паспорти каби турлар бўйича белгиланади. Шунингдек, кўчмас мулк объектига кадастр паспорти расмийлаштирилади ёки қайта расмийлаштирилади. Жумладан, кўчмас мулк объекти бўйича бирламчи хатлов ишлари бажарилганда, кўчмас мулк объектининг бир қисми бегоналаштирилганда ёки ер участкаси алоҳида бўлинганда, бунда икки қисмга алоҳида кадастр паспорти шакллантирилади.
Қишлоқ хўжалигига мўлжалланмаган ер участкалари хусусийлаштирилгандан сўнг, уларнинг бир қисмига бўлган ҳуқуқ бошқа шахсга ўтганда, ер участкасининг майдони ёки чегара нуқталари ўзгарганда, кўчмас мулк объектининг манзилини белгилашда ёки ўзгартиришда, кўчмас мулк объектининг тоифаси ўзгарганда, ўз ер участкасида тегишли рухсатномаларни расмийлаштирмасдан қурилган бино ва иншоотлар мавжуд бўлганда кадастр паспорти шакллантирилади.
Кўчмас мулк тоифалари ва уларга кадастр паспорти бериладиган ҳолатлари келтирилган. Регламентниг 16-бандига кўра, кадастр паспортини тайёрлаш объектнинг мураккаблигига қараб амалга оширилади. Яъни, кўчмас мулк объектларининг турар жойга оид қисми бўйича белгиланганда кўп квартирали уйдаги квартира — 3 иш кунигача, якка тартибдаги турар жой — 5 иш кунигача муддат белгиланади.
 Кўчмас мулк объектларининг нотурар жойга оид қисми бўйича умумий майдони 100 кв.м. гача — 5 иш кунигача, умумий майдони 100 кв.м дан 1 000 кв.м. гача — 7 иш кунигача, умумий майдони 1 000 кв.м дан 5 000 кв.м. гача — 10 иш кунигача, умумий майдони 5 000 кв.м дан 15 000 кв.м. гача — 15 иш кунигача, умумий майдони 15 000 кв.м дан 50 000 кв.м гача — 20 иш кунигача, умумий майдони 50 000 кв.м дан ортиқ — 25 иш кунигача, ажратилган ер участкалари бўйича эса — 3 иш кунигача амалга оширилади.
Мураккаблигига кўра юқоридаги сезиларли даражада қисқартирилган муддатлар белгиланганлиги ва ундан ташқари кадастр (йиғмажилди) паспорти йўқолганда (яроқсиз ҳолга келганда), қоғоз ёки пластик шаклда янги кадастр паспорти икки иш куни мобайнида берилиши белгиланган.
Қарордаги 5-илованинг “Фуқароларнинг номида шахсий турар жой мавжуд ёки мавжуд эмаслиги тўғрисидага маълумотнома бериш бўйича давлат хизматлари кўрсатишнинг маъмурий регламенти”нинг 8-бандига кўра, давлат хизматларини кўрсатиш учун базавий ҳисоблаш миқдорининг 3 фоизи миқдорида йиғим ундирилади.
Давлат хизмати кўрсатилиши учун ЯИДХП орқали мурожаат этилганда йиғим суммасининг 90 фоизи ундирилади. Олдинги тартибдаги хизмат нархига яъни БҲМ нинг 20 фоизи 44 600 сўм ўрнига ҳар бир шахс учун БҲМ нинг 3 фоизи 6 690 сўм қилиб белгилангани хизматдан фойдаланувчиларнинг ҳамёнига сезиларли енгиллик бўлган бўлса, регламентнинг 13-бандига кўра, марказ сўровнома тушган ва тўлов амалга оширилган вақтдан бошлаб, уч иш куни мобайнида QR-код (штрихли код) қўйилган маълумотномани расмийлаштиради ва Давлат хизматлари марказларига ёки давлат органларига мурожаат этган тақдирда ёхуд ариза берувчига электрон шаклда мурожаат этган тақдирда ЯИДХП орқали юборилади.
Хизмат муддати 3 иш кунига туширилгани фойдаланувчиларга вақтини тежашга хизмат қилмоқда.
Давлат хизматлари агентлиги фуқароларга давлат хизматлари соҳасида енгиллик берувчи янгиликларни яратишдан чарчамайди.

Б.Қадамов, туман Давлат хизматлари маркази бош мутахассиси.