Амударёда Давлат кадастрлари палатаси раисининг биринчи ўринбосари томонидан сайёр қабул ўтказилди

Аҳолининг кўчмас мулк ва ер муносабатларига оид муаммоларини жойида ҳал этиш, соҳадаги янгиликлардан хабардор қилиш мақсадида Амударё туманида  Давлат кадастрлари палатаси раисининг биринчи ўринбосари Нозимжон Инамов бошчилигида фуқаролар ва тадбиркорлар учун сайёр қабул бўлиб ўтди.

Тадбир аввалида соҳа раҳбарлари томонидан кадастр тизимидаги сўнгги қонунчилик янгиликлари, аҳолига яратилаётган қулайликлар ва рақамлаштириш жараёнлари юзасидан батафсил тушунтиришлар берилди. Асосий эътибор очиқлик ва шаффофликни таъминлашга қаратилди.

Сайёр қабул давомида 20 га яқин мурожаатчининг саволлари ва муаммолари алоҳида эътибор билан тингланди. Мурожаатлар асосан кадастр ҳужжатларини расмийлаштириш, ер участкаларига бўлган ҳуқуқни тиклаш ва чегара низоларига оид масалаларда бўлди. Мулоқот натижасида бир қанча фуқароларга зарур ҳуқуқий тушунчалар берилган бўлса, айрим муаммолар жойида ижобий ҳал этилди. Қўшимча ўрганиш ва вақт талаб этадиган мурожаатлар юзасидан эса тегишли мутахассисларга аниқ муддатли топшириқлар берилиб, ижроси назоратга олинди.

Қабул жараёнида Ўзбекистон Республикасининг 2024 йил 5 августдаги “Ўзбошимчалик билан эгаллаб олинган ер участкаларига ҳамда уларда қурилган бино ва иншоотларга бўлган ҳуқуқларни тан олиш тўғрисида”ги Қонунининг мазмун-моҳиятига алоҳида тўхталиб ўтилди.

Маълумки, ушбу муҳим ҳужжат 2024 йил 8 ноябрь санасидан расман кучга кирди. Қонун талабларига мувофиқ, ҳуқуқларни тан олиш жараёни ҳудудлар ва маҳаллалар кесимида босқичма-босқич хатлов ўтказиш йўли билан амалга оширилиши белгиланган. Бу жараённи шаффоф ва тизимли ташкил этиш мақсадида Кадастр агентлиги томонидан махсус “E’TIROF” ахборот тизими ишга туширилган. Ҳозирда тасдиқланган режа-график асосида кадастр мутахассислари томонидан жойларда бепул хатлов ишлари жадал олиб борилмоқда.

Хатлов жараёнида аниқланган бино ва иншоотлар тўғрисидаги маълумотлар “E’TIROF” дастурига киритилади. Ҳар бир кўчмас мулк объекти бўйича 15 дан ортиқ вазирлик ва идоралардан иборат ишчи гуруҳ ўз хулосаларини беради. Энг муҳим жиҳати шундаки, биноларнинг ҳақиқатдан ҳам 2018 йил 1 май ҳолатига кўра қурилганлиги космик суратлар ёрдамида аниқ ва холис таҳлил қилинади.

Бугунги кунга келиб, ушбу қонуннинг Қорақалпоғистон Республикасидаги ижроси бўйича дастлабки ижобий натижалар қайд этилмоқда. Хусусан, Қорақалпоғистон Республикаси Жўқорғи Кенгесининг сессия қарори билан ўзбошимчалик билан қурилган уй-жойлар ва ортиқча эгалланган ер майдонларидаги иншоотларга нисбатан жами 491 нафар фуқаронинг уй-жой ва ер участкаларига ижара ва мулк ҳуқуқлари расман эътироф этилди.

Бу каби сайёр қабуллар ва қонун ижросини таъминлашга қаратилган тадбирлар халқнинг розилигига эришиш, уларнинг кўп йиллик ҳуқуқий муаммоларига қонуний ечим топишда муҳим омил бўлмоқда.

Сайёр қабул давомида фуқаролар  Давлат кадастрлари палатаси раисининг биринчи ўринбосари Нозимжон Инамов ва бошқа мутасаддиларга ўзларини қизиқтирган масалалар бўйича саволлар билан ҳам мурожаат қилиб, тегишли жавоблар олдилар. Бу каби сайёр қабулларни келгусида бошқа ҳудудларда ҳам ўтказиш режалаштирилган.