Amudaryoda Davlat kadastrlari palatasi raisining birinchi oʻrinbosari tomonidan sayyor qabul oʻtkazildi

Aholining koʻchmas mulk va yer munosabatlariga oid muammolarini joyida hal etish, sohadagi yangiliklardan xabardor qilish maqsadida Amudaryo tumanida  Davlat kadastrlari palatasi raisining birinchi oʻrinbosari Nozimjon Inamov boshchiligida fuqarolar va tadbirkorlar uchun sayyor qabul boʻlib oʻtdi.

Tadbir avvalida soha rahbarlari tomonidan kadastr tizimidagi soʻnggi qonunchilik yangiliklari, aholiga yaratilayotgan qulayliklar va raqamlashtirish jarayonlari yuzasidan batafsil tushuntirishlar berildi. Asosiy eʼtibor ochiqlik va shaffoflikni taʼminlashga qaratildi.

Sayyor qabul davomida 20 ga yaqin murojaatchining savollari va muammolari alohida eʼtibor bilan tinglandi. Murojaatlar asosan kadastr hujjatlarini rasmiylashtirish, yer uchastkalariga boʻlgan huquqni tiklash va chegara nizolariga oid masalalarda boʻldi. Muloqot natijasida bir qancha fuqarolarga zarur huquqiy tushunchalar berilgan boʻlsa, ayrim muammolar joyida ijobiy hal etildi. Qoʻshimcha oʻrganish va vaqt talab etadigan murojaatlar yuzasidan esa tegishli mutaxassislarga aniq muddatli topshiriqlar berilib, ijrosi nazoratga olindi.

Qabul jarayonida Oʻzbekiston Respublikasining 2024-yil 5-avgustdagi “Oʻzboshimchalik bilan egallab olingan yer uchastkalariga hamda ularda qurilgan bino va inshootlarga boʻlgan huquqlarni tan olish toʻgʻrisida”gi Qonunining mazmun-mohiyatiga alohida toʻxtalib oʻtildi.

Maʼlumki, ushbu muhim hujjat 2024-yil 8-noyabr sanasidan rasman kuchga kirdi. Qonun talablariga muvofiq, huquqlarni tan olish jarayoni hududlar va mahallalar kesimida bosqichma-bosqich xatlov oʻtkazish yoʻli bilan amalga oshirilishi belgilangan. Bu jarayonni shaffof va tizimli tashkil etish maqsadida Kadastr agentligi tomonidan maxsus “E’TIROF” axborot tizimi ishga tushirilgan. Hozirda tasdiqlangan reja-grafik asosida kadastr mutaxassislari tomonidan joylarda bepul xatlov ishlari jadal olib borilmoqda.

Xatlov jarayonida aniqlangan bino va inshootlar toʻgʻrisidagi maʼlumotlar “E’TIROF” dasturiga kiritiladi. Har bir koʻchmas mulk obʼekti boʻyicha 15 dan ortiq vazirlik va idoralardan iborat ishchi guruh oʻz xulosalarini beradi. Eng muhim jihati shundaki, binolarning haqiqatdan ham 2018-yil 1-may holatiga koʻra qurilganligi kosmik suratlar yordamida aniq va xolis tahlil qilinadi.

Bugungi kunga kelib, ushbu qonunning Qoraqalpogʻiston Respublikasidagi ijrosi boʻyicha dastlabki ijobiy natijalar qayd etilmoqda. Xususan, Qoraqalpogʻiston Respublikasi Joʻqorgʻi Kengesining sessiya qarori bilan oʻzboshimchalik bilan qurilgan uy-joylar va ortiqcha egallangan yer maydonlaridagi inshootlarga nisbatan jami 491 nafar fuqaroning uy-joy va yer uchastkalariga ijara va mulk huquqlari rasman eʼtirof etildi.

Bu kabi sayyor qabullar va qonun ijrosini taʼminlashga qaratilgan tadbirlar xalqning roziligiga erishish, ularning koʻp yillik huquqiy muammolariga qonuniy yechim topishda muhim omil boʻlmoqda.

Sayyor qabul davomida fuqarolar  Davlat kadastrlari palatasi raisining birinchi oʻrinbosari Nozimjon Inamov va boshqa mutasaddilarga oʻzlarini qiziqtirgan masalalar boʻyicha savollar bilan ham murojaat qilib, tegishli javoblar oldilar. Bu kabi sayyor qabullarni kelgusida boshqa hududlarda ham oʻtkazish rejalashtirilgan.