ЁНҒИН ЭЪТИБОРСИЗЛИК ОҚИБАТИДА СОДИР БЎЛАДИГАН БАХТСИЗ ҲОДИСА

Ёнғин – жуда катта офатлардан бири саналади. Ёнғин хавфсизлиги қоидаларига ҳар бир юртдошимиз амал қилиши керак. Афсуски, айрим лоқайд кимсаларнинг бунга эътиборсизлиги туфайли ёнғин ҳодисалари содир бўлиб, қанча инсонларнинг ҳаёти хавф остида қолади.
       Фавқулодда вазиятлар ва ёнғинларнинг олдини олиш борасида олиб борилаётган профилактик тадбирларга қарамасдан айрим фуқароларнинг ёнғин хавфсизлиги қоидаларига амал килмасликлари, масъулиятсизликлари натижасида ёнғинлар содир бўлмоқда.
Шу йилнинг 8 ойи мобайнида тумандаги аҳоли турар жой бинолари ва молхоналарида 25 та ёнғин ҳодисаси қайд қилинди. Шунингдек, 2 та ёнғин ҳодисаси туман пахта қабул қилиш масканларида ҳам содир бўлди. Ёнғин келиб чиқишга асосан уйда маиший электр асбоблардан ва электр тармоқлардан нотўғри фойдаланиш, уйда ёш болаларнинг қаровсиз қолдириб кетилиши сабаб бўлган. Молхоналар билан боғлиқ ёнғинлар эса уй эгаларнинг яқин жойда чиқиндиларни ёқиб, қаровсиз қолдириб кетиши оқибатида келиб чиққан.
Бундай нохуш ҳодисаларнинг олдини олиш учун ёнғиннинг олдини олишга доир тартиб-қоидаларга амал қилиш, газ ва электр ускуналардан тўғри фойдаланиш, болаларни уйда қаровсиз қолдирмаслик, турар жойлар, корхона-ташкилотлар, муассаса биноларидаги сув қозонлари, ўчоқ печларнинг яроқлилигини, мўрилари ва газ плитанинг жўмраклари созлигини текшириб, кўрикдан ўтказиб туриш керак.
       Таъкидлаш жоизки, айни кунларда аҳоли томонидан  чорва қишлови учун сомон ғамланиб, аксарият ҳолларда, хавфсизлик чораларига риоя қилинмаяпти. Бундай эътиборсизлик бахтсиз ҳодиса содир бўлишига, хунук оқибатларга олиб келади.       
Ёнғин хавфсизлиги қоидаларига риоя қилиш барчанинг бурчидир. Зеро, олов — тилсиз ёв деб, бежиз айтилмаган. Ҳамиша ёнғиннниг олдини олишга ҳаракат қилайлик. Ёнғин хавфсизлиги қоидаларига қатъий амал қилайлик.

 Х.Ҳайитбоев, туман Фавқулодда вазиятлар бўлими инспектори.