Маҳаллада содир этилган оғир жиноят муҳокама қилинди

Сўнгги йилларда мамлакатимизда тинчлик ва осойишталикни таъминлаш ҳамда ҳуқуқбузарликларнинг олдини олишга қаратилган янги механизмлар жорий этилди. Шу мақсадда ижтимоий-маиший муаммоларни бартараф этишга қаратилган профилактик тадбирлар ҳам самарали амалга ошириб келинмоқда. Афсуски, олиб борилаётган ишларга қарамай, жамиятда жиноятчилик ҳолатлари кузатилиб турибди.

Қорақалпоғистон Республикаси Ички ишлар вазири, полковник Бахтияр Торебеков раислигида Амударё туманининг Тор ёп маҳалласи ҳудудидаги 21-сонли умумтаълим мактаби фаоллар залида жиноятчиликнинг олдини олиш ва жамоат хавфсизлигини таъминлаш масалалари юзасидан муҳокама йиғилиши ўтказилди.

Унда туман Ички ишлар бўлими бошлиғи Мухамметали Хўжамуратов, Ўзбекистон Маҳаллалар уюшмаси туман бўлими бошлиғи Алишер Юлдашев, профилактика инспекторлари, “Маҳалла еттилиги” аъзолари ҳамда аҳоли вакиллари иштирок этди.

Йиғилишда жорий йил 20 июнь куни Тор ёп маҳалласи ҳудудида содир этилган оилавий низо оқибатида юз берган жиноят муҳокама марказида бўлди. Дастлабки маълумотларга кўра, Захматкаш кўчасида яшовчи 1978 йилда туғилган фуқаро уйидаги ўғай укаси томонидан тан жароҳати етказилиб, оғир ҳолатда туман тиббиёт бирлашмасининг жонлантириш бўлимига олиб келинган ва шошилинч жарроҳлик амалиёти ўтказилган.

Терговга қадар ўтказилган текширувлар давомида, воқеа куни кечки пайт уй ишлари билан боғлиқ келишмовчилик туфайли жабрланувчи ва унинг ўгай укаси — 2003 йилда туғилган йигит ўртасида жанжал келиб чиққанлиги маълум бўлган. Жанжал чоғида гумонланувчи товуқхона деворига суяб қўйилган белни олиб, жабрланувчининг ортидан борган ва кесувчи темир қисми билан жабрланувчининг бошининг энса соҳасига зарба берган. Жабрланувчи ерга йиқилгандан сўнг, гумонланувчи унинг бошининг энса ва юз қисмларига яна бир неча марта урган. Оқибатда белнинг темир қисми ёғоч дастасидан ажралиб тушган ва гумонланувчи ҳаракатини тўхтатган.

Ҳушини йўқотган жабрланувчини кўриб қолган ўгай онаси тез тиббий ёрдам хизматига қўнғироқ қилган ва жабрланувчи шифохонага етказилган. Мазкур ҳолат юзасидан Амударё тумани прокуратураси томонидан Ўзбекистон Республикаси Жиноят кодексининг тегишли моддаларига асосан жиноят иши қўзғатилди.

Гумонланувчининг кўрсатмасида қайд этилишича, ўша куни паррандалар қўрасининг эшиги ёпилмай қолгани туфайли у ва ўгай опаси ўртасида оғзаки тортишув юзага келган. Унга кўра, жанжал чоғида опаси уни ҳақорат қилган ва у ўзини тутиб туролмасдан, бел билан унинг бош қисмига бир неча марта зарба берган.

Йиғилиш якунида масъуллар томонидан жамиятда тинчлик ва осойишталикни таъминлаш, жиноятчиликнинг олдини олишда фуқароларнинг фаол иштироки муҳим аҳамиятга эга эканлиги таъкидланди. Айниқса, оилавий низоларни барвақт бартараф этиш, маҳалладошлар ва профилактика инспекторлари ўртасидаги ҳамкорликни мустаҳкамлаш зарурлигига эътибор қаратилди.

Шунингдек, ёшлар ўртасида ҳуқуқбузарликларнинг олдини олишга қаратилган тарғибот-ташвиқот ишларини янада кучайтириш, жиноятчиликка нисбатан муросасиз муносабатда бўлиш жамият хавфсизлигининг муҳим кафолати экани алоҳида қайд этилди. Дарҳақиқат, ҳуқуқбузарликларга қарши курашишда ҳар бир фуқаронинг жавобгарлиги ва фаоллиги ҳал қилувчи ўрин тутади. Шундай экан, жамиятда тинчлик ва хотиржамликни таъминлашга ҳар биримиз ҳисса қўшишимиз лозим.

Шоҳзод Қурбонбоев тайёрлади.