Коронавирус пандемияси билан боғлиқ эпидемиологик вазият юзасидан Амударё тумани ҳокими С.Йўлдашевнинг туман аҳолисига МУPОЖААТИ
Ассалому алайкум, ҳурматли юртдошлар!
Сир эмаски, кейинги кунларда коронавирус инфекцияси аҳоли орасида кенг тарқалиб, касалланишлар сони сезиларли даражада кўпаймоқда. Афсуски, кўпчилик ҳолларда касаллик симптомсиз, ҳеч қандай дастлабки ташқи белгиларсиз намоён бўлмоқда. Натижада касалликка чалинган шахслар бозор ва кўчаларда, жамоат жойларида юриб, ўзлари билмаган ҳолда уни кўпчиликка юқтирмоқда. Статистикага кўра, коронавирус инфекциясини юқтириб олган бир бемор 5 кеча-кундузда ўртача 2-3 кишига вирус юқтиради. Бир ой ичида бир бемордан вирус юқтирганлар сони 400 нафарга етиши мумкин. Шуларни ҳисобга олган ҳолда коронавирус инфекциясига қарши курашиш чора-тадбирларини мувофиқлаштириш бўйича Амударё туман штаби бир қатор чеклов чораларини киритишга қарор қилди.
Жумладан, жорий йил 18-19 июль ҳамда 25-26 июль шанба ва якшанба кунлари республика миқёсида амал қиладиган қатъий карантин чоралари Амударё туманида 20-24 июль кунлари ҳам тўлиқ амалда бўлади.
Яъни, 20 июлдан бошлаб 26 июлгача ҳафта давомида Амударё тумани ҳудудида аҳолининг ва автотранспорт воситаларининг ҳаракати тўлиқ тўхтатилади. Бу вақт мобайнида аҳолига “ўзини ўзи яккалаш” ҳаёт тарзига қатъий риоя этган ҳолда ўз уйларида қолиш тавсия қилинади. Ташкилотларга эса ходимларни имкони борича ишга жалб этмаслик, ёки масофадан ишлаши учун шароит яратиш топширилади.
Азиз юртдошлар!
Ҳозирги шароитда касалликни жиловлашнинг бирдан бир йўли – карантиндир. Бундай қатъий чоралар қўлламасак, тиббиёт тизими кўтара олмайдиган даражада юклама юзага келиши мумкин. Натижада кўпчилигимиз яқинларимиздан, ота-онамиз, бобо ва бувиларимиздан бевақт айрилиб қолишимиз мумкин. Касалликнинг тарқалиш занжирини узиш мақсадида кўрилаётган кучайтирилган карантин қоидаларини тўғри қабул қилиб, унга амал қилиш ҳар биримиз учун фақат ва фақат фойдали бўлишини унутмайлик!
Шу ўринда шифохоналарда ётган, касалликнинг енгил шаклига чалиниб, уйида даволанаётган юртдошларимизнинг тезроқ тузалиб кетишига тилакдошмиз.
Яна бир марта Сиздан шуни илтимос қилмоқчиманки, заруратсиз кўчага чиқманг! Ниқоб тақишни, қўлингизни тез-тез совунлаб ювишни ва карантин қоидаларига амал қилишни унутманг!
Огоҳлик ва хушёрликни унутманг, лекин ортиқча ваҳимага ҳам берилманг! Биргалашиб ҳаракат қилсак, бу касалликни албатта енгамиз!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
