"ФАВҚУЛОДДА ВАЗИЯТЛАР ПРОФИЛАКТИКАСИ ОЙЛИГИ" ДОИРАСИДА ТАРҒИБОТ ТАДБИРЛАРИ ЎТКАЗИЛМОҚДА
Ўзбекистон Республикаси Фавқулодда вазиятлар вазирининг тегишли буйруғига асосан жорий йилнинг 1—30 ноябрь кунлари оралиғида мамлакатимиз бўйлаб "Фавқулодда вазиятлар профилактикаси ойлиги" ўтказилмоқда. Мазкур ойлик доирасида амалга ошириладиган профилактик чора-тадбирларни манзилли ташкил этиш орқали аҳоли кенг қатламлари орасида фавқулодда ҳолатлар содир бўлишининг олдини олиш бўйича соҳа ходимлари томонидан тушунтириш, тарғибот-ташвиқот ишлари олиб борилмоқда.
Амударё тумани Фавқулодда вазиятлар бўлими томонидан ойлик доирасида амалга ошириладиган ишлар бўйича режавий жадвал ишлаб чиқилиб, туманнинг барча ҳудудларидаги ижтимоий соҳа объектлари ва аҳоли хонадонларининг куз-қиш мавсумига тайёргарлик ҳолатлари ўрганилмоқда.
Айниқса, аҳоли хонадонларида содир бўлиши эҳтимоли бўлган бахтсиз ҳодисаларнинг олдини олишга қаратилган назорат тадбирлари жараёнида қуйидаги ҳолатлар аниқланиб, қонуний чоралар кўрилмоқда. Жумладан, истеъмолчилар томонидан табиий газ ва электр энергияси тармоқларига ноқонуний уланиш, табиий газ тармоғига иситиш қозонлари ҳамда газ плиталарини резина шланглар орқали улаш, тақиқланган газ сўриш ускуналаридан фойдаланиш ҳолатларига мутасаддилар томонидан чек қўйилмоқда.
Бундан ташқари, энергетика объектларида профилактик тадбирларни самарали ташкил этиш орқали идора ва ташкилотлар, ижтимоий соҳа объектлари, ишлаб чиқариш корхоналари, умумий овқатланиш шохобчалари, хавфли ишлаб чиқариш корхоналарининг ишчи-хизматчиларини жалб қилган ҳолда махсус тактик-ўқув машқлари ҳам ўтказилиб, ёнғин, ис газидан заҳарланиш, ҳаво-газ аралашмасининг чақнаши билан боғлиқ нохуш ҳодисаларнинг олдини олишга қаратилган кенг қамровли тушунтириш-тарғибот тадбирлари олиб борилмоқда.
Амалга оширилаётган профилактик тарғибот-ташвиқот тадбирлари туманнинг энг чекка ҳудудларида ҳам амалга оширилиб, аҳоли хонадонларидаги дудбуронлар, иситиш қозонларининг созлиги назорат қилиниб, камчиликлар жойида бартараф этилмоқда. Шу билан бирга, аҳолига ёнғин чиқишининг олдини олиш, фавқулодда вазиятларда қандай ҳаракат қилиш зарурлиги юзасидан батафсил маълумотлар тақдим этилиб, муҳим йўл-йўриқ ва тавсиялар берилмоқда.
Кези келганида шуни алоҳида таъкидлашни истардикки, ёнғин, ис гази — қўлсиз, оёқсиз, тилсиз ёв. Шунингдек, ҳаво газ аралашмасининг чақнаши ҳам инсон ҳаёти учун хавфли, кўринмас офат. Ана шу тилсиз ёв — кўринмас офатга қарши курашиш, хонадонларимизда бахтсиз ҳодиса содир бўлишининг олдини олиш эса ўз қўлимизда. Ҳар биримиз ўз хонадонимиздаги иситиш тизимларини ишлатишдан олдин уларнинг соз ёки носозлигини синчиклаб кўздан кечириб, дудбуронларни тозалатиб қўйсак, ўзимиз ва яқинларимизнинг ҳаёти ва соғлиғини асраган, фавқулодда вазиятларнинг олдини олган бўламиз.
Азиз юртдошлар! Туманимизда "Фавқулодда вазиятлар профилактикаси ойлиги" доирасидаги профилактик назорат ва тарғибот тадбирлари давом этмоқда. Мазкур ойлик доирасидаги тадбирларда фаол иштирок этинг ва жамиятимиз фаровонлиги ҳамда осойишталигига ўз ҳиссангизни қўшинг!
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
