"FAVQULODDA VAZIYaTLAR PROFILAKTIKASI OYLIGI" DOIRASIDA TARGʻIBOT TADBIRLARI OʻTKAZILMOQDA
Oʻzbekiston Respublikasi Favqulodda vaziyatlar vazirining tegishli buyrugʻiga asosan joriy yilning 1—30-noyabr kunlari oraligʻida mamlakatimiz boʻylab "Favqulodda vaziyatlar profilaktikasi oyligi" oʻtkazilmoqda. Mazkur oylik doirasida amalga oshiriladigan profilaktik chora-tadbirlarni manzilli tashkil etish orqali aholi keng qatlamlari orasida favqulodda holatlar sodir boʻlishining oldini olish boʻyicha soha xodimlari tomonidan tushuntirish, targʻibot-tashviqot ishlari olib borilmoqda.
Amudaryo tumani Favqulodda vaziyatlar boʻlimi tomonidan oylik doirasida amalga oshiriladigan ishlar boʻyicha rejaviy jadval ishlab chiqilib, tumanning barcha hududlaridagi ijtimoiy soha obʼektlari va aholi xonadonlarining kuz-qish mavsumiga tayyorgarlik holatlari oʻrganilmoqda.
Ayniqsa, aholi xonadonlarida sodir boʻlishi ehtimoli boʻlgan baxtsiz hodisalarning oldini olishga qaratilgan nazorat tadbirlari jarayonida quyidagi holatlar aniqlanib, qonuniy choralar koʻrilmoqda. Jumladan, isteʼmolchilar tomonidan tabiiy gaz va elektr energiyasi tarmoqlariga noqonuniy ulanish, tabiiy gaz tarmogʻiga isitish qozonlari hamda gaz plitalarini rezina shlanglar orqali ulash, taqiqlangan gaz soʻrish uskunalaridan foydalanish holatlariga mutasaddilar tomonidan chek qoʻyilmoqda.
Bundan tashqari, energetika obʼektlarida profilaktik tadbirlarni samarali tashkil etish orqali idora va tashkilotlar, ijtimoiy soha obʼektlari, ishlab chiqarish korxonalari, umumiy ovqatlanish shoxobchalari, xavfli ishlab chiqarish korxonalarining ishchi-xizmatchilarini jalb qilgan holda maxsus taktik-oʻquv mashqlari ham oʻtkazilib, yongʻin, is gazidan zaharlanish, havo-gaz aralashmasining chaqnashi bilan bogʻliq noxush hodisalarning oldini olishga qaratilgan keng qamrovli tushuntirish-targʻibot tadbirlari olib borilmoqda.
Amalga oshirilayotgan profilaktik targʻibot-tashviqot tadbirlari tumanning eng chekka hududlarida ham amalga oshirilib, aholi xonadonlaridagi dudburonlar, isitish qozonlarining sozligi nazorat qilinib, kamchiliklar joyida bartaraf etilmoqda. Shu bilan birga, aholiga yongʻin chiqishining oldini olish, favqulodda vaziyatlarda qanday harakat qilish zarurligi yuzasidan batafsil maʼlumotlar taqdim etilib, muhim yoʻl-yoʻriq va tavsiyalar berilmoqda.
Kezi kelganida shuni alohida taʼkidlashni istardikki, yongʻin, is gazi — qoʻlsiz, oyoqsiz, tilsiz yov. Shuningdek, havo gaz aralashmasining chaqnashi ham inson hayoti uchun xavfli, koʻrinmas ofat. Ana shu tilsiz yov — koʻrinmas ofatga qarshi kurashish, xonadonlarimizda baxtsiz hodisa sodir boʻlishining oldini olish esa oʻz qoʻlimizda. Har birimiz oʻz xonadonimizdagi isitish tizimlarini ishlatishdan oldin ularning soz yoki nosozligini sinchiklab koʻzdan kechirib, dudburonlarni tozalatib qoʻysak, oʻzimiz va yaqinlarimizning hayoti va sogʻligʻini asragan, favqulodda vaziyatlarning oldini olgan boʻlamiz.
Aziz yurtdoshlar! Tumanimizda "Favqulodda vaziyatlar profilaktikasi oyligi" doirasidagi profilaktik nazorat va targʻibot tadbirlari davom etmoqda. Mazkur oylik doirasidagi tadbirlarda faol ishtirok eting va jamiyatimiz farovonligi hamda osoyishtaligiga oʻz hissangizni qoʻshing!
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
