ОИЛАДАГИ ГАП КЎЧАГА ЧИҚҚАНДА...
Ўзбек оилалари учун ҳеч қаерда ёзилмаган бир қонун-қоида бор. Бу – оила аъзоларининг оғзибирчилиги, оила сирини кўчага олиб чиқмаслигидир. Ана шу қоидага амал қилинганида оилалар нафақат мустаҳкам, балки эл ичида обрў-эътибор ҳам топади.
Лекин айрим ёш оилаларда бу каби бобомерос қадриятларга амал қилмаслик оқибатида арзимаган важлар билан ўртада низо ва жанжаллар келиб чиқиши натижасида тузуккина оилаларнинг “сири” кўчага чиқиб кетмоқда. Кўпчилик ҳолатларда бундай вазиятларнинг юзага келишига катталар, яъни қайнота-қайноналар ҳам сабабчи бўлишмоқда.
Туманимиз маҳаллаларидан бирида яшовчи Шокир Собиров (исм-шарифлар ўзгартирилди)нинг оилавий сирларига қайотаси аралашмаганида, арзимаган дилхираликни деб аёли Гулбаҳор болаларини олиб ота-онасиникига кетиб қолмаганида Шокир балки маъмурий қамоқ жазосига ҳукм этилмаган бўлармиди?
Нима бўлди-ю Гулбаҳор Шокирнинг гапларига, муомаласига бефарқ бўлолмади. Эрининг қўполлигини кечириб қўяқолса, “дока рўмол қуриб”, ўртада меҳр гуллари унармиди? Йўқ, Гулбаҳор аксинча йўл тутди. Қизиққонлик билан болаларини етаклаб ота уйига кетди-қолди. Бу Шокирга алам қилди. Ахир икки боласи унинг жон-у дили эди-да. Уларни соғинди. Бироқ арзимаган масалаларда ҳам оиласига аралашаверадиган қайнотасини яхши билгани учун озгина сабр қилди. Ҳовридан тушса, невараларини ўзи олиб келар, деган умидда кутди. Муроса йўлини танламаётган қайнотасидан ўзича хафа бўлиб, ичди ва... “шер” бўлди. Мастлик – бир томондан ихтиёрий телбалик бўлса, яна бир томондан – ростлик ҳам. Чунки маст бўлган одамнинг бор алам ва дарди тилига чиқади, ўзича ботир бўлиб кетади. Шокирбой ҳам маст ҳолатда қайнотасиникига бориб шовқин кўтарди. Уларнинг тинчини бузиб, номақбул сўзлар билан қайнотасини ҳақорат қилди. Оқибатда эса...
Шокир Собировнинг бу майда безорилиги Маъмурий ишлар бўйича туман судида муҳокама этилиб. Ўзбекистон Республикаси МЖтКнинг тегишли моддалари бўйича айбдор деб топилди ва маъмурий қамоқ жазосига ҳукм этилди. Жазони тайинлашда Шокир Собиров муқаддам судланмаган, вақтинча ишсиз эканлиги, оилавий аҳволи инобатга олиниб, 7 (етти) кунлик маъмурий қамоқ жаосини ўташ даврида ҳар бир кун учун тўланадиган харажатлардан озод этилиб, жамоат ишларига жалб қилинди.
Шуни айтсалар керак-да, “ҳаргиз оилангнинг сирини кўчага сочма, сиринг кўчага чиқса ўзинг сочиласан”, деб. Арзимаган дилхираликдан бошланган можаро учинчи томоннинг аралашуви билан элга ёйилди, судгача етиб келди.
Ёшларга эса “ушбу воқеадан хулоса чиқаринг, ҳар бир масалада босиқ бўлинг”, - деймиз.
М.КАРИМБОЕВА,
маъмурий ишлар бўйича туман суди раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
