ХАЛҚИМИЗ БОШИГА ИШ ТУШГАННИ ЁЛҒИЗЛАТИБ ҚЎЙМАЙДИ

Сирдарё  вилоятида 1 май куни тонгда Сардоба сув омбори тўғони пикетларидан бирининг ёрилиб кетиши оқибатида сув тошқини юзага келди. Вилоятнинг Сардоба, Оқ олтин, Мирзаобод туманлари ҳудудини босган сув аҳолига жиддий талафот етказди. 70 мингдан зиёд аҳоли мамлакатимиз раҳбарининг шошилинч топшириғига кўра, хавфсиз  ҳудудларга кўчирилди. Бироқ кўплаб уй-жойлар вайронага айланди, электр линиялари шикастланди, кўчаларни йиқилган уйларнинг деворлари тўсиб қўйди. Деҳқончиликка жиддий зарар етди, 50 нафардан зиёд фуқаролар турли даражада тан жароҳати олиб, касалхоналарга ётқизилди.

Орадан ўтган қисқа кунлар ичида тошқин талафотлари ҳамжиҳатликда бартараф этилганлиги туфайли  аҳоли ўзларининг яшаш ҳудудларига қайтмоқда.

Тошқиндан зарар кўрган аҳолига бутун мамлакатимиз аҳолиси инсонпарварлик ёрдами кўрсатмоқда. Турли ҳудудларда истиқомат қилувчи кўнгилли ёшлар фавқулодда вазиятлар, миллий гвардия ходимлари билан бир қаторда тошқин оқибатларини бартараф этишда иштирок қилишмоқда.  Шунингдек, юртдошларимиз ўзларининг ўзбекона, оғир кунда бир-бирига суянчиқ, елкадош бўлишдек эзгу урф-одатларига мувофиқ тошқиндан жабр кўрганларни моддий қўллаб-қувватламоқдалар. Учала туманга аҳоли учун турли озиқ-овқат маҳсулотлари, кундалик эҳтиёж моллари ва кийим-кечаклар ортилган машиналар кириб бормоқда.

Амударё туман прокуроратураси, прокуратура ҳузуридаги Иқтисодий жиноятларга қарши курашиш департаменти ходимлари ҳам бу савобли ишга биринчилардан бўлиб бош қўшдилар. Улар 2 май куни 5 тонна гуручни Сардоба сув омбори сув тошқинидан зарар кўрган аҳоли учун жўнатдилар.

Одам ёлғиз туғилади, ёлғиз ўлади, лекин ҳаётда ёлғиз яшай олмайди. Ҳаёт инсонга оила аъзолари, туғишганлари, дўст-биродарлари билан тотли. Шу муқаддас, қуёшли юртимизда яшовчи барча инсонларни бир эзгу мақсад – Ватан манфаати бирлаштириб туради. Демак, ҳеч бир ватандошимиз бизга бегона эмас, қувончимиз ҳам, ташвишимиз ҳам бир.

Агар кимки холис нигоҳ билан мамлакатимиз ҳаётини кузатса, ҳар куни амалга оширилаётган ишларда бунинг исботини кўра олади.

Яқинда Манғит чегара қўриқлаш взводи ва Аёқчи чегара қўриқлаш взводи ҳарбийлари амалга оширган яна бир хайрли иш ҳам бунга мисол бўла олади. Мазкур взводлар командирлари ва ўринбосарлари чегара олди ҳудудида яшовчи кам таъминланган хонадонлар ҳолидан хабар олиб, моддий кўмак бердилар. Улар 13 турдаги бирламчи озиқ-овқат маҳсулотлари, коронавирусдан ҳимояланиш учун антисептик воситаларни тарқатиб бериб, кўпчиликнинг дуоларини олдилар. Юртимизда тарқалган коронавирус пандемияси туфайли ўрнатилган карантин талабларига кўра, уйда ўтирган, моддий ёрдамга муҳтож бўлиб қолган оилаларга хайр-саховатни етказишда уларга Қиличбой овули ва Дурунки маҳалласи раислари Баҳром Қодиров ва Шуҳрат Жуманиёзовлар яқиндан ёрдам бердилар.

Юз бераётган табиий офатлар азал-азалдан маънавиятли, маърифатли ва дўст-биродар халқимизни яна ҳам жипслаштирмоқда, бир-бирига меҳр-оқибатини намоён этмоқда. Ҳа, бизнинг халқимиз бошига иш тушганни ёлғизлатиб қўймайди.

О.РАЖАБОВА.