XALQIMIZ BOShIGA ISh TUShGANNI YoLGʻIZLATIB QOʻYMAYDI

Sirdaryo  viloyatida 1-may kuni tongda Sardoba suv ombori toʻgʻoni piketlaridan birining yorilib ketishi oqibatida suv toshqini yuzaga keldi. Viloyatning Sardoba, Oq oltin, Mirzaobod tumanlari hududini bosgan suv aholiga jiddiy talafot yetkazdi. 70 mingdan ziyod aholi mamlakatimiz rahbarining shoshilinch topshirigʻiga koʻra, xavfsiz  hududlarga koʻchirildi. Biroq koʻplab uy-joylar vayronaga aylandi, elektr liniyalari shikastlandi, koʻchalarni yiqilgan uylarning devorlari toʻsib qoʻydi. Dehqonchilikka jiddiy zarar yetdi, 50 nafardan ziyod fuqarolar turli darajada tan jarohati olib, kasalxonalarga yotqizildi.

Oradan oʻtgan qisqa kunlar ichida toshqin talafotlari hamjihatlikda bartaraf etilganligi tufayli  aholi oʻzlarining yashash hududlariga qaytmoqda.

Toshqindan zarar koʻrgan aholiga butun mamlakatimiz aholisi insonparvarlik yordami koʻrsatmoqda. Turli hududlarda istiqomat qiluvchi koʻngilli yoshlar favqulodda vaziyatlar, milliy gvardiya xodimlari bilan bir qatorda toshqin oqibatlarini bartaraf etishda ishtirok qilishmoqda.  Shuningdek, yurtdoshlarimiz oʻzlarining oʻzbekona, ogʻir kunda bir-biriga suyanchiq, yelkadosh boʻlishdek ezgu urf-odatlariga muvofiq toshqindan jabr koʻrganlarni moddiy qoʻllab-quvvatlamoqdalar. Uchala tumanga aholi uchun turli oziq-ovqat mahsulotlari, kundalik ehtiyoj mollari va kiyim-kechaklar ortilgan mashinalar kirib bormoqda.

Amudaryo tuman prokuroraturasi, prokuratura huzuridagi Iqtisodiy jinoyatlarga qarshi kurashish departamenti xodimlari ham bu savobli ishga birinchilardan boʻlib bosh qoʻshdilar. Ular 2-may kuni 5 tonna guruchni Sardoba suv ombori suv toshqinidan zarar koʻrgan aholi uchun joʻnatdilar.

Odam yolgʻiz tugʻiladi, yolgʻiz oʻladi, lekin hayotda yolgʻiz yashay olmaydi. Hayot insonga oila aʼzolari, tugʻishganlari, doʻst-birodarlari bilan totli. Shu muqaddas, quyoshli yurtimizda yashovchi barcha insonlarni bir ezgu maqsad – Vatan manfaati birlashtirib turadi. Demak, hech bir vatandoshimiz bizga begona emas, quvonchimiz ham, tashvishimiz ham bir.

Agar kimki xolis nigoh bilan mamlakatimiz hayotini kuzatsa, har kuni amalga oshirilayotgan ishlarda buning isbotini koʻra oladi.

Yaqinda Mangʻit chegara qoʻriqlash vzvodi va Ayoqchi chegara qoʻriqlash vzvodi harbiylari amalga oshirgan yana bir xayrli ish ham bunga misol boʻla oladi. Mazkur vzvodlar komandirlari va oʻrinbosarlari chegara oldi hududida yashovchi kam taʼminlangan xonadonlar holidan xabar olib, moddiy koʻmak berdilar. Ular 13 turdagi birlamchi oziq-ovqat mahsulotlari, koronavirusdan himoyalanish uchun antiseptik vositalarni tarqatib berib, koʻpchilikning duolarini oldilar. Yurtimizda tarqalgan koronavirus pandemiyasi tufayli oʻrnatilgan karantin talablariga koʻra, uyda oʻtirgan, moddiy yordamga muhtoj boʻlib qolgan oilalarga xayr-saxovatni yetkazishda ularga Qilichboy ovuli va Durunki mahallasi raislari Bahrom Qodirov va Shuhrat Jumaniyozovlar yaqindan yordam berdilar.

Yuz berayotgan tabiiy ofatlar azal-azaldan maʼnaviyatli, maʼrifatli va doʻst-birodar xalqimizni yana ham jipslashtirmoqda, bir-biriga mehr-oqibatini namoyon etmoqda. Ha, bizning xalqimiz boshiga ish tushganni yolgʻizlatib qoʻymaydi.

O.RAJABOVA.