Avf – xalqimizga xos oliyjanob qadriyat

Insonparvarlik, bagʻrikenglik, kechirimlilik, mehr-oqibat va ezgulik kabi insoniy fazilatlar xalqimizga xos oliyjanob qadriyatlardandir. Bugungi kunda mamlakatimizda amalga oshirilayotgan islohotlar, xususan, insonparvarlik siyosati aynan shu fazilatlarning amaliy ifodasidir. Prezidentimiz Shavkat Mirziyoyev tomonidan Muborak Ramazon hayiti arafasida eʼlon qilingan “Jazo muddatini oʻtayotgan, qilmishiga chin koʻngildan pushaymon boʻlgan va tuzalish yoʻliga qatʼiy oʻtgan bir guruh shaxslarni afv etish toʻgʻrisida”gi Farmon ham ana shu yuksak gʻoyalarga tayanadi.

Farmonga muvofiq, Oʻzbekiston Respublikasi Konstitutsiyasining 109-moddasi 23-bandiga asosan jami 488 nafar shaxs afv etildi. Ulardan 100 nafari asosiy jazodan toʻliq ozod etilgan boʻlsa, 268 nafari jazoni oʻtashdan muddatidan ilgari shartli ravishda ozod qilindi. Shuningdek, 34 nafar shaxsning ozodlikdan mahrum etish jazosi yengilroq jazoga almashtirildi, 86 nafar shaxsga tayinlangan jazo muddati qisqartirildi.

Mazkur Farmon ijrosini taʼminlash, afv etilgan shaxslarning jamiyatga moslashuvini osonlashtirish hamda ularga amaliy yordam koʻrsatish maqsadida yurtimiz boʻylab tegishli chora-tadbirlar amalga oshirilmoqda. Masʼul vazirlik va idoralar tomonidan afv etilganlarning oila bagʻriga qaytishi, foydali mehnat bilan band boʻlishi, sogʻlom turmush tarzini yoʻlga qoʻyishi uchun zarur shart-sharoitlar yaratilmoqda.

Amudaryo tumanida istiqomat qiluvchi, 2001-yilda tugʻilgan fuqaro Sardor Murodboyev ham hozirgi vaqtda qilmishiga chin koʻngildan pushaymon boʻlgan va tuzalish yoʻliga qatʼiy oʻtgani uchun mazkur Farmonga asosan afv etildi. Joriy yilning 3-aprel kuni Oʻzbekiston Respublikasi IIV Malaka oshirish instituti boshligʻi oʻrinbosari, polkovnik Baxodir Ulugʻbekov boshchiligida Qoraqalpogʻiston Respublikasi IIV Jamoat xavfsizligi xizmati Probatsiya boʻlimi boshligʻi, podpolkovnik Baxrom Ubbiniyazov, tuman IIB Huquqbuzarlik profilaktikasi boʻlimi boshligʻi, podpolkovnik Ilxom Abutov hamda Probatsiya guruhi xodimlari Murodboyevning yashash manzilida boʻlishib, uning turmush sharoiti, oilaviy ahvoli va mavjud muammolarini oʻrganishdi.

U bilan olib borilgan suhbatda afv — bu jamiyatning ishonchi ekani, mamlakatimizdagi insonparvar siyosat hamda yaratilgan imkoniyatlardan toʻgʻri foydalanish zarurligi alohida taʼkidlandi. Shu bilan birga, bundan buyon hayotni yangi sahifadan boshlash, halol mehnat bilan jamiyatga foyda keltirish lozimligi xususida tavsiyalar berildi. Shuningdek, Prezidentning 2022-yil 29-iyun kungi tegishli Qarori asosida dastlabki ijtimoiy-moddiy yordam paketini olishda amaliy koʻmak koʻrsatilishi taʼkidlandi.

Masʼullar tomonidan Sardor Murodboyevga zarur tavsiya va maslahatlar berildi. Shuningdek, uning ota-onasini ham oʻgʻlining oila bagʻriga qaytgani munosabati bilan tabrikladilar.

Aslida, afv — bu nafaqat kechirim, balki davlatning insonga boʻlgan ishonchidir. Bu ishonchni oqlash esa har bir afv etilgan shaxsning insoniy burchi va maʼnaviy masʼuliyatidir. Chunki bugun kechirilgan har bir inson — ertangi jamiyatning faol aʼzosiga aylanishi mumkin. Berilgan imkoniyat esa uning hayotini, kelajagini saqlab qolish demakdir.

Azamat Ortiqov, tuman IIB Probatsiya guruhi katta inspektori, kapitan.