ОЛИС ҚИШЛОҚЛАP АҲОЛИСИ УЧУН КЎЧМА САВДО ЯPМАPКАЛАPИ ТАШКИЛ ЭТИЛДИ

Ўзбекистон Pеспубликаси Президенти Ш.М.Мирзиёев мамлакатимизга коронавирус пандемиясининг кириб келиши ва тарқалишининг олдини олишда бирдан-бир муҳим восита – аҳолининг зарурат бўлмаса уйдан чиқмай, ўзи ва оила аъзоларининг саломатлигини сақлашда эканлигини, карантин қоидаларига қатъий амал қилиш зарурлигини ҳар гал  халққа мурожаат қилганларида қайта-қайта таъкидламоқда. Бу борада халқимизга қулайликлар яратилиб, пенсия пуллари пенсионерларнинг уйларига етказиб берилмоқда. Махсус стерилланган антисептик воситалар, ниқоблар билан аҳолининг тўлиқ таъминланишига, озиқ-овқат хавфсизлигини таъминлашга алоҳида эътибор қаратилмоқда.

Туманимизда ҳам халқимизнинг карантин қоидаларига қатъий амал қилиши кун тартибидаги асосий вазифага айлангани муносабати билан чекка  қишлоқ ва овуллар маҳаллалар аҳолисига кундалик эҳтиёж моллари, хусусан зарур озиқ-овқат маҳсулотларини арзон ва қулай нархларда етказиб бериш, айни пайтдаги энг зарур тиббий буюм ва воситалар билан таъминланиши қатъий назоратга олинган. Чунки мамлакатимизга коронавирус пандемиясининг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича махсус комиссиянинг 2020 йил 3 апрель кунги йиғилиш баёни билан “Карантин шароитида аҳолини асосий  турдаги озиқ-овқат маҳсулотлари билан узлуксиз ва қулай шароитда таъминлашнинг вақтинчалик тартиби”да белгиланган вазифалар туман Прокуратураси томонидан алоҳида назоратга олинган бўлиб, бу борадаги ишлар туманимиз миқёсида тизимли равишда амалга оширилмоқда.

Хусусан, жорий йилнинг 4 апрель санасида туман Прокуратураси, туман Маҳалла ва оилани қўллаб-қувватлаш бўлими ҳамда Бош Прокуратура ҳузуридаги Иқтисодий жиноятларга қарши курашиш Департаментининг туман бўлими томонидан Жумуртов шаҳарча фуқаролар йиғини ҳудудида кўчма савдо ярмаркаси ташкил этилди.

Мазкур кўчма савдо ярмаркаси орқали шаҳарча аҳолисига асосий турдаги сифатли озиқ-овқат маҳсулотларини арзон ва қулай нархларда харид қилиш имконияти яратилди. Ярмарка орқали жами 3684 кг. озиқ-овқат ва қишлоқ хўжалиги маҳсулотлари, яъни 500 кг. картошка, 300 кг. сабзи, 500 кг. пиёз, 284 кг. карам, 1200 кг. ун, 500 литр ёғ ва 400 кг. Бошқа зарур маҳсулотлар ҳамда 1450 дона тиббий буюм ва воситалари етказиб берилди.

Кўчма савдо ярмаркасига барча маҳсулотлар махсус дезинфекцияланган 6 та “Дамас”, 1 “Лабо” русумли автотранспорт воситаларида, санитария-гигиена қоидаларига қатъий амал қилган ҳолда етказиб берилганидан, айниқса, 1 та автотранспорт воситасида кўчма дорихона жойлаштирилганидан аҳоли мамнун бўлди.

Кўчма ярмарка фаолияти орқали 500 дан ортиқ хонадон вакиллари кундалик зарур бўлган озиқ-овқат маҳсулотлари, тиббий буюм ва воситаларни арзон, қулай нархларда харид қилиш имконига эга бўлдилар.

***
Жорий йилнинг 6 апрель куни эса туман прокуратураси, туман Маҳалла ва оилани қўллаб-қувватлаш бўлими ҳамда Бош Прокуратура ҳузуридаги Иқтисодий жиноятларга қарши курашиш Департаментининг туман бўлими томонидан туман марказидан олис ҳудудда жойлашган Дўрман овул фуқаролар йиғинида ҳам аҳолини асосий турдаги озиқ-овқат маҳсулотлари ва тиббиёт буюмлари ҳамда воситалари билан таъминлаш мақсадида кўчма савдо ярмаркаси ташкил қилинди. Кўчма савдо ярмаркасида 3280 кг. озиқ-овқат ва қишлоқ хўжалиги маҳсулотлари, яъни 1000 кг. картошка, 500 кг. сабзи, 300 кг. пиёз, 300 кг. карам, 100 кг. шакар, 500 кг. ун, 480 литр ёғ ва 100 кг. бошқа маҳсулотлар, шунингдек, 1200 дона тиббий буюм ва воситалари аҳолига қулай ва арзон нархларда етказиб берилди. Кўчма савдо ярмаркасига маҳсулотлар 5 та “Damas” автотранспорт воситаларида санитария-гигиена қоидаларига қатъий риоя қилган ҳолда етказиб берилганидан овул аҳолиси мамнун бўлишди. Ушбу ярмаркада 300 дан ортиқ хонадон вакиллари кундалик зарур бўлган озиқ-овқат ва қишлоқ хўжалиги маҳсулотларини қулай нархларда харид қилдилар.Шуниси эътиборга моликки, кўчма савдо ярмаркасига маҳсулотларни етказишга жалб қилинган автотранспорт воситаларидан биттасига кўчма дорихонанинг жойлаштирилгани айни муддао бўлди. Кўчма дорихона орқали овул аҳолиси ўзлари учун зарур бўлган тиббий буюмларни харид қилдилар.

Бу каби кўчма савдо ярмаркалари фаолияти туманимизнинг бошқа овул ва маҳаллаларида ҳам йўлга қўйилиши режалаштирилган.

Pобия ЙЎЛДОШЕВА.