“ОИЛА БОҒИ”НИ БУНЁД ЭТИШ УЧУН ҚИЛИЧБОЙ ВА КУЮК КЎПИР ОВУЛЛАРИ АҲОЛИСИГА БЕПУЛ МЕВАЛИ ДАРАХТ КЎЧАТЛАРИ ТАРҚАТИЛДИ
Биз яшаб турган Ер сайёрасининг келажаги бугунги инсониятнинг экологик маданиятига боғлиқ. Глобал экологик муаммоларни миллий ва глобал миқёсда, биргаликдаги саъй-ҳаракатлар билангина ҳал этиш мумкин. Шу боис мамлакатимизда ҳам Президентимиз ташаббуслари асосида "яшил" ҳудудларни барпо этишга эътибор қаратилмоқда. Бу ишларга нафақат давлат органлари ва фуқаролар, балки нодавлат нотижорат ташкилотлари ҳам муносиб ҳисса қўшмоқда. Амударё туманида фаолият юритаётган "Жайхун илҳомлари" нодавлат нотижорат ташкилотининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган грант лойиҳаси ҳам айнан шу йўналишда бўлиб, лойиҳа доирасида кенг кўламли тарғибот-ташвиқот тадбирлари ўтказилмоқда.
Яқинда лойиҳа координаторлари тумандаги Қиличбой овулида бўлиб, аҳоли вакиллари билан учрашдилар. Учрашувдан мақсад экология ва атроф-муҳитни муҳофаза қилиш, табиий ресурслардан оқилона фойдаланиш соҳасидаги қонун ҳужжатлари талабларини аҳоли орасида тушунтиришдан иборат бўлди.
Учрашув аввалида Қиличбой овул фуқаролар йиғини раисининг кексалар масалалари бўйича маслаҳатчиси Амина Юсупова иштирокчиларга атроф-муҳит ва экология билан боғлиқ масалаларнинг долзарблигини алоҳида таъкидлаб, "Яшил макон" умуммиллий лойиҳаси доирасида овул ҳудудида барпо этилаётган боғ-роғлар ҳақида маълумот берди.
"Жайхун илҳомлари" нодавлат нотижорат ташкилоти аъзоси, лойиҳа координатори Робия Йўлдошева лойиҳани амалга оширишдан кўзланган мақсад ҳақида тўхталиб ўтди. Лойиҳанинг бош мақсади иқлим ўзгаришлари билан боғлиқ муаммоларни ҳал этишга ҳисса қўшиш, аҳоли онгида экологик маданиятни шакллантириш, овулдаги ҳар бир оилани ўз "Оила боғи"ни яратишга ундашдан ибратдир.
Учрашув давомида тадбирда фаол иштирок этган фуқароларга "Оила боғи"ни ташкил этишларига кўмаклашиш мақсадида мевали дарахт кўчатлари бепул тарқатилди.
Шу куни лойиҳа координаторлари тумандаги Куюк кўпир овулида ҳам аҳоли вакиллари билан учрашдилар. Овул фуқаролар йиғини масъуллари ва аҳоли вакиллари иштирокида ўтказилган учрашувда асосий эътибор атроф-муҳитни муҳофаза қилиш, табиий ресурслар, хусусан, сувдан оқилона фойдаланиш, яшил ҳудудларни кенгайтириш, ҳар бир оиланинг ўз боғини бунёд этиш орқали экологик вазиятни соғломлаштиришга ҳисса қўшишига қаратилди.
Тадбир жараёнида овул аҳолисининг ўз "Оила боғи"ни бунёд этишларига кўмаклашиш мақсадида "Жайхун илҳомлари" нодавлат нотижорат ташкилотининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Экологик маданият – соғлом келажак асоси” номли грант лойиҳаси доирасида бепул мевали дарахт кўчатлари тарқатилди.
Амалга оширилаётган бу каби чора-тадбирлар аҳоли онгида экологик маданиятни шакллантириш, шунингдек, уларнинг экология ва иқлим ўзгаришлари билан боғлиқ бугунги глобал муаммолардан хабардорлигини оширишга ҳисса қўшиши билан аҳамиятлидир.
Маҳмуджон Шомуродов.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
