ОНАЖОНЛАP МЕҲPИ ВА ҚУЁШ ТАФТИ БИЛАН НУPАФШОН БЎЛГАН ДАВPАЛАP

Инсон учун ҳаётда азиз ва меҳрибон онадан улуғроқ зот йўқ. Шунинг учун қийналган пайтимизда ҳам, қувонган дамларимизда ҳам энг аввал онамизни йўқлаймиз, унинг дардимизга дармон бўлгувчи ҳар бир сўзидан, меҳр-муҳаббатидан жисмимизга куч йиғилади, ғамларимиз тўкилиб, дилимиз яйрайди. Қувонч-у шодлигимиз эса оналаримизни бахтга буркайди. Ўзимиздан ҳам кўра кўпроқ онажонларимиз қувонади.

Қизилчоли маҳалласи ҳудудидаги 9-сонли умумтаълим мактабида ўтказилган  “Сиз қуёшсиз, Онажон!” деб номланган байрамона тадбирда ҳақиқатан ҳам маҳалланинг  пир-у бадавлат онахонлари  қалби қувонч ва шодликка беланди. Бунинг боиси бор, албатта.

Аввало, тадбирга ташриф буюрган онахонлар ўзларига кўрсатилган эътибор ва эъзоздан мамнун бўлган бўлсалар, ўғил-қизлари ва невараларининг қобилият ва иқтидорларини кўришиб, қалблари фахр-у ифтихор туйғуларига, қувончга тўлди.

Мактабнинг 2-“А”синф раҳбари Назокатхон Ибрагимованинг ўз ўқувчилари билан биргаликда тайёрлаган “Сиз қуёшсиз, Онажон!” номли адабий-мусиқий тадбирини мактаб директори Хайрулла Ўтаганов очди. У маҳаллада истиқомат қилувчи пир-у бадавлат онахонлар номини алоҳида ҳурмат билан тилга олиб, барчаларига мустаҳкам соғлик, омонлик тилади.

Шундан сўнг, ўқувчилар бувижонлари ва онажонларига бағишлаб, шеърлар айтишди, азиз ва муҳтарама онахонларга гуллар ҳадя этишди.

Тадбирнинг иккинчи қисмида 2-“А”синфнинг энг аълочи ва фаол ўқувчи-қизлари ўртасида билимдонлик, орасталик, китобхонлик ва эпчиллик баҳслари ўтказилди.

Азал-азалдан ўзбек оилаларида қиз бола тарбиясида ахлоқий жиҳатга алоҳида эътибор қаратиб келинган. Шу нуқтаи назардан баҳсларда қизалоқларнинг саломлашиш одобига аҳамият қаратилди. Иштирокчилар саломлашиш одобининг нозик жиҳатлари – саломни тўлиқ бериш, муомала маданияти, саломлашиш пайтида ўзини қандай тутиши зарурлигини ўз ҳаракатлари орқали ифода этишди.

Иккинчи шартда эса қизларнинг тил ўрганиш қобилиятлари синовдан ўтказилди. Улар ўз оилалари ҳақида ўзбек, қорақалпоқ, қозоқ, рус ва инглиз тилларида ҳикоя қилиб беришди. Учинчи шартда 5 та ташаббуснинг муҳим йўналиши – ёшларнинг бўш вақтини мазмунли ўтказишлари, китобхонлик маданиятини юксалтириш масалаларига эътибор қаратилиб, тезкор савол-жавоблар асосида ўқувчиларнинг билимдонликлари синовдан ўтказилди. Бу шартда қизалоқларнинг китобхонлик даражасига, шунингдек, умумтаълим фанларининг 2-синфларига мўлжалланган дастурини қай даражада ўзлаштираётганликлари намойиш этилди.

Баҳсларнинг тўртинчи, яъни охирги шарти янада ҳаяжонли дақиқаларга бой бўлди. Эркин мавзу бўйича ўз иқтидорларини кўрсатган қизалоқларнинг маҳоратидан уларнинг ота-оналари, бувижонлари ҳам мамнун бўлишди. Баҳслар якунида иштирокчилар “Энг зукко қиз”, “Энг чаққон қиз”, “Энг билимдон қиз”, “Энг ораста қиз” ва “Энг оқила қиз” йўналишлари бўйича тақдирландилар. Уларга маҳалла фаоли, фермер Жўрабек Ғойибов ўз совғаларини топширди.

“Сиз қуёшсиз, Онажон!” тадбирида ота-оналар ҳам фаол иштирок этишди. Қалбларга жўшқинлик бағишловчи “Лазги”, “Сурнай навоси” куйлари жаранглаб, барча шод-у хуррам рақсга тушдилар.

Байрам тадбири ҳақиқатан ҳам онажонлар меҳри ва шу куни самони, борлиқни ўз нурлари ила чароғон этган қуёш тафти билан нурафшон, файзли ўтди.

P.ЙЎЛДОШЕВА.