ONAJONLAP MEHPI VA QUYoSh TAFTI BILAN NUPAFShON BOʻLGAN DAVPALAP

Inson uchun hayotda aziz va mehribon onadan ulugʻroq zot yoʻq. Shuning uchun qiynalgan paytimizda ham, quvongan damlarimizda ham eng avval onamizni yoʻqlaymiz, uning dardimizga darmon boʻlguvchi har bir soʻzidan, mehr-muhabbatidan jismimizga kuch yigʻiladi, gʻamlarimiz toʻkilib, dilimiz yayraydi. Quvonch-u shodligimiz esa onalarimizni baxtga burkaydi. Oʻzimizdan ham koʻra koʻproq onajonlarimiz quvonadi.

Qizilcholi mahallasi hududidagi 9-sonli umumtaʼlim maktabida oʻtkazilgan  “Siz quyoshsiz, Onajon!” deb nomlangan bayramona tadbirda haqiqatan ham mahallaning  pir-u badavlat onaxonlari  qalbi quvonch va shodlikka belandi. Buning boisi bor, albatta.

Avvalo, tadbirga tashrif buyurgan onaxonlar oʻzlariga koʻrsatilgan eʼtibor va eʼzozdan mamnun boʻlgan boʻlsalar, oʻgʻil-qizlari va nevaralarining qobiliyat va iqtidorlarini koʻrishib, qalblari faxr-u iftixor tuygʻulariga, quvonchga toʻldi.

Maktabning 2-“A”sinf rahbari Nazokatxon Ibragimovaning oʻz oʻquvchilari bilan birgalikda tayyorlagan “Siz quyoshsiz, Onajon!” nomli adabiy-musiqiy tadbirini maktab direktori Xayrulla Oʻtaganov ochdi. U mahallada istiqomat qiluvchi pir-u badavlat onaxonlar nomini alohida hurmat bilan tilga olib, barchalariga mustahkam sogʻlik, omonlik tiladi.

Shundan soʻng, oʻquvchilar buvijonlari va onajonlariga bagʻishlab, sheʼrlar aytishdi, aziz va muhtarama onaxonlarga gullar hadya etishdi.

Tadbirning ikkinchi qismida 2-“A”sinfning eng aʼlochi va faol oʻquvchi-qizlari oʻrtasida bilimdonlik, orastalik, kitobxonlik va epchillik bahslari oʻtkazildi.

Azal-azaldan oʻzbek oilalarida qiz bola tarbiyasida axloqiy jihatga alohida eʼtibor qaratib kelingan. Shu nuqtai nazardan bahslarda qizaloqlarning salomlashish odobiga ahamiyat qaratildi. Ishtirokchilar salomlashish odobining nozik jihatlari – salomni toʻliq berish, muomala madaniyati, salomlashish paytida oʻzini qanday tutishi zarurligini oʻz harakatlari orqali ifoda etishdi.

Ikkinchi shartda esa qizlarning til oʻrganish qobiliyatlari sinovdan oʻtkazildi. Ular oʻz oilalari haqida oʻzbek, qoraqalpoq, qozoq, rus va ingliz tillarida hikoya qilib berishdi. Uchinchi shartda 5 ta tashabbusning muhim yoʻnalishi – yoshlarning boʻsh vaqtini mazmunli oʻtkazishlari, kitobxonlik madaniyatini yuksaltirish masalalariga eʼtibor qaratilib, tezkor savol-javoblar asosida oʻquvchilarning bilimdonliklari sinovdan oʻtkazildi. Bu shartda qizaloqlarning kitobxonlik darajasiga, shuningdek, umumtaʼlim fanlarining 2-sinflariga moʻljallangan dasturini qay darajada oʻzlashtirayotganliklari namoyish etildi.

Bahslarning toʻrtinchi, yaʼni oxirgi sharti yanada hayajonli daqiqalarga boy boʻldi. Erkin mavzu boʻyicha oʻz iqtidorlarini koʻrsatgan qizaloqlarning mahoratidan ularning ota-onalari, buvijonlari ham mamnun boʻlishdi. Bahslar yakunida ishtirokchilar “Eng zukko qiz”, “Eng chaqqon qiz”, “Eng bilimdon qiz”, “Eng orasta qiz” va “Eng oqila qiz” yoʻnalishlari boʻyicha taqdirlandilar. Ularga mahalla faoli, fermer Joʻrabek Gʻoyibov oʻz sovgʻalarini topshirdi.

“Siz quyoshsiz, Onajon!” tadbirida ota-onalar ham faol ishtirok etishdi. Qalblarga joʻshqinlik bagʻishlovchi “Lazgi”, “Surnay navosi” kuylari jaranglab, barcha shod-u xurram raqsga tushdilar.

Bayram tadbiri haqiqatan ham onajonlar mehri va shu kuni samoni, borliqni oʻz nurlari ila charogʻon etgan quyosh tafti bilan nurafshon, fayzli oʻtdi.

P.YOʻLDOShEVA.