QUYoSh PANELLARI – QULAY, SAMARALI VA TEJAMKOR

Xalqimiz “rizqingni sotib ravshan ol”, degan iborani bejiz aytmagan. Buni ayniqsa, kunning qorongʻu qismida chiroq oʻchsa, juda teran his qilamiz, xuddi atrofimizgina emas, koʻnglimiz ham qorongʻu boʻlib qolganday boʻladi. Shunday damlar mamlakatimizning barcha hududlaridagi ijtimoiy soha obʼektlarida, aholi xonadonlarida ham kuzatilib turishi hech kimga sir emas. Ayniqsa, kuz-qish mavsumida elektr energiyasida uzilishlar tez-tez sodir boʻlib turadi. Chunki ayozli kunlarda uylarni yoritishdan tashqari isitish uchun ham elektr energiyasiga talab ortib ketadi va taqchillik yuzaga keladi. Buningdek koʻngilsizliklarning oldini olish uchun elektr energiyasi taʼminoti tizimi yangi texnologiyalar bilan taʼminlanayapti. Lekin taqchillikning oldini olish uchun bu yetarli emasligini tarmoqda uchrab turadigan uzilishlar yaqqol koʻrsatib turibdi.

Joriy yilning 16-fevralida Oʻzbekiston Respublikasi Prezidentining “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari toʻgʻrisida”gi Qarori qabul qilindi. Mazkur qarorda belgilangan chora-tadbirlarni amalga oshirish orqali ijtimoiy va uy-joy kommunal xizmat koʻrsatish sohalarida hamda iqtisodiyot tarmoqlarida qayta tiklanuvchi energiya manbalarini keng joriy etish, shu yoʻl bilan respublika hududlarida energiya taqchilligi qoplanishini taʼminlash koʻzda tutilgan.

Bu maqsadlarni amalga oshirish uchun bino va inshootlarda kichik quvvatli qayta tiklanuvchi energiya manbalari qurilmalarini oʻrnatish va ekspluatatsiya qilish boʻyicha masʼuliyati cheklangan jamiyat shaklidagi “Yashil energiya” kompaniyasi tashkil etildi.

Kompaniyaga mahalliy va xorijiy ishlab chiqaruvchilardan qayta tiklanuvchi energiya manbalari qurilmalarini va ularning ehtiyot qismlarini xarid qilish, oʻrnatish va ularga servis xizmatlarini koʻrsatish uchun eng yaxshi takliflarni tanlab olib, toʻgʻridan-toʻgʻri shartnomalar tuzishga ruxsat berildi. Ushbu hujjatga muvofiq endilikda ijtimoiy soha obʼektlari bilan bir qatorda aholi xonadonlariga ham energiya tejovchi texnologiyalarni oʻrnatish boʻyicha qator qulayliklar, soliq imtiyozlari yaratildi.

Shu kungacha tumanimizda ham bir qancha ijtimoiy soha obʼektlariga, aholi xonadonlariga quyosh panellari oʻrnatildi. Bunday qurilmalar binolarning tom qismiga hamda boʻsh maydonlarga oʻrnatilgani uchun ishlash jarayonida shovqin boʻlmaydi, atrof-muhitga hech qanday zararli gazlar chiqarmaydi.

Ayni kunda tuman hokimligi, Adliya boʻlimi, Majburiy ijro byurosi kabi bir qancha ijtimoiy soha obʼektlariga quyosh panellari oʻrnatildi. Bu qulay va samarali vositadan foydalanishga oʻtgan tadbirkorlik subʼektlari ham ancha.

Shuningdek, “Temir daftar”ga kiritilgan aholi xonadonlariga ham davlat hisobidan kichik quvvatli quyosh panellari oʻrnatilmoqda.

Tumanimizning Boyovul mahallasida istiqomat qiluvchi Oʻktam Haytimbetov, Beruniy mahallasida yashovchi Regina Yakubovaning xonadonlariga kichik quvvatli quyosh panellari oʻrnatildi. Bu ikkala xonadonda hozirgi kunda quyosh panelli yetkazib berayotgan elektr energiyasidan foydalanilayapti. Joriy yilning iyul oyi davomida Toʻlqin ovulidan Tursunboy Yermanov, Uyshin mahallasidan Bozorboy Xudoyberganov, Boʻzyop ovulidan Toʻliboy Nurimbetov, Besh ovul mahallasidan Qadamboy Esanov, Boʻz solma mahallasidan Tursunboy Jumaniyozov, Doʻrman ovulidan Oʻrozboy Tojimovlarning xonadonlariga ham davlat hisobidan kichik quvvatli quyosh panellari oʻrnatiladi va ishga tushiriladi.

Butun yurtimizda boʻlgani kabi tumanimizda ham qayta tiklanuvchi energiyadan foydalanish, energiya taqchilligini bartaraf etish boʻyicha koʻpgina chora-tadbirlar amalga oshirilmoqda. Obʼektlarni uzluksiz ravishda qayta tiklashuvchi elektr energiyasi bilan taʼminlash nafaqat tarmoqqa tushayotgan yuklamani kamaytirishga, balki aholi va tadbirkorlarning elektr energiyasi uchun ajratayotgan mablagʻlarini tejab qolishga ham imkon berishi bilan ahamiyatlidir.

Oygul RAJABOVA.