Yuqori qishloq mahallasida ijtimoiy xodim samarali faoliyat yuritmoqda

Har bir jamiyatning ijtimoiy qiyofasi, eng avvalo, uning aholi ehtiyojmand qatlamlariga koʻrsatayotgan eʼtibori, mehri va gʻamxoʻrligi bilan oʻlchanadi. Bugungi kunda yurtimiz boʻylab mahallabay ishlash tizimi orqali har bir oila, har bir fuqaro davlatning doimiy eʼtibori va ijtimoiy himoyasi qamroviga olinmoqda. Xususan, Amudaryo tumanida joylashgan Yuqori qishloq mahallasida ham bu borada keng koʻlamli, tizimli va samarali ishlar amalga oshirilmoqda. Mazkur hududga biriktirilgan ijtimoiy xodim Dildora Kenjayeva oʻz kasbiga fidoyilik bilan yondashib, aholining ijtimoiy himoyaga muhtoj qatlamlari bilan tizimli ravishda ishlashib kelmoqda.

Statistik maʼlumotlarga nazar tashlaydigan boʻlsak, Yuqori qishloq mahallasida jami 624 ta xonadon boʻlib, ularda 763 ta oila va 2438 nafar aholi istiqomat qiladi. Bu raqamlar ortida shuncha inson taqdiri, orzu-umidlari va albatta, turli xil ijtimoiy ehtiyojlari yotibdi. Ijtimoiy xodimning zimmasidagi masʼuliyat koʻlami naqadar keng va murakkab ekanligini shundan ham anglash mumkinki, u bugungi kunda aholining 12 toifasi bilan muntazam va tizimli ravishda ishlab kelmoqda. Har bir toifaning oʻziga xos xususiyatlari, muammolari va zudlik bilan yechim talab qiladigan hayotiy masalalari mavjud boʻlib, ularning hech biri eʼtibordan chetda qolmayapti.

Ijtimoiy xodimlardan oʻz hududlarida yashovchi 1-toifaga mansub boʻlgan, yaʼni oʻzgalar parvarishiga muhtoj, yolgʻiz yashovchi shaxslarga alohida eʼtibor qaratish talab qilinadi. Mazkur mahallada ham bunday toifadagi 1 nafar shaxs mavjud boʻlib, unga ijtimoiy assistent tomonidan muntazam ravishda, kundalik turmushda zarur boʻlgan xizmatlar koʻrsatib kelinmoqda.

Shuningdek, jamiyatning yana bir himoyaga muhtoj qatlami boʻlgan 2-toifa, yaʼni nogironligi boʻlgan shaxslar bilan ishlash jarayoni ham doimiy nazoratga olingan. Mahallada jami 77 nafar nogironligi boʻlgan shaxs yashaydi. Ularning 10 nafari 1-guruh, 54 nafari 2-guruh, 3 nafari 3-guruh nogironlari hisoblanadi. 8 nafari esa nogironligi boʻlgan bolalardir. Bu fuqarolarning har biriga individual yondashilib, ularga zarur ijtimoiy yordamlar oʻz vaqtida koʻrsatilmoqda.

Moddiy va maʼnaviy koʻmakka muhtoj boʻlgan 3-toifa, yaʼni kam taʼminlangan oilalar holati ham ijtimoiy xodimning kundalik kuzatuvi va eʼtibori markazida turadi. Mahalladagi bunday oilalardan muntazam ravishda xabar olinib kelinmoqda. Hozirgi kunda ijtimoiy reyestrga hududdagi 59 ta oila kiritilgan. Ularning 10 tasi toʻliq davlat taʼminotidagi oilalar, 39 tasi kambagʻal oilalar hamda 10 tasi kambagʻallik chegarasidagi oilalardir. Bu oilalarga berilayotgan maqsadli koʻmaklar ularning turmush tarzini yaxshilashga va qiyinchiliklarni yengib oʻtishiga xizmat qilmoqda.

4-toifaga kiruvchi fuqarolar sifatida vasiylik va homiylikka olingan bolalar taqdiri ham muhim ahamiyat kasb etadi. Bugungi kunda ota-onasi xorijga mehnat migratsiyasiga ketishi sababli, mahalladagi jami 22 nafar bolaga qonuniy vakil, yaʼni vasiylik yoki homiylik tayinlangan. Mehr va eʼtiborga muhtoj boʻlgan bu bolalar qarovsiz va nazoratsiz qolmasligi uchun ularning yashash holati muntazam ravishda, har chorakda monitoring qilinib kelinmoqda.

Amudaryo tumanidagi Yuqori qishloq mahallasida olib borilayotgan bunday manzilli va hayotiy ijtimoiy himoya tadbirlari inson qadrini ulugʻlashdek ezgu maqsadga xizmat qilmoqda. Ijtimoiy xodimlarning masʼuliyatli va sermahsul faoliyati tufayli esa hech bir fuqaro, hech bir oila davlat eʼtiboridan chetda qolmaydi.