Юқори қишлоқ маҳалласида ижтимоий ходим самарали фаолият юритмоқда

Ҳар бир жамиятнинг ижтимоий қиёфаси, энг аввало, унинг аҳоли эҳтиёжманд қатламларига кўрсатаётган эътибори, меҳри ва ғамхўрлиги билан ўлчанади. Бугунги кунда юртимиз бўйлаб маҳаллабай ишлаш тизими орқали ҳар бир оила, ҳар бир фуқаро давлатнинг доимий эътибори ва ижтимоий ҳимояси қамровига олинмоқда. Хусусан, Амударё туманида жойлашган Юқори қишлоқ маҳалласида ҳам бу борада кенг кўламли, тизимли ва самарали ишлар амалга оширилмоқда. Мазкур ҳудудга бириктирилган ижтимоий ходим Дилдора Кенжаева ўз касбига фидойилик билан ёндашиб, аҳолининг ижтимоий ҳимояга муҳтож қатламлари билан тизимли равишда ишлашиб келмоқда.

Статистик маълумотларга назар ташлайдиган бўлсак, Юқори қишлоқ маҳалласида жами 624 та хонадон бўлиб, уларда 763 та оила ва 2438 нафар аҳоли истиқомат қилади. Бу рақамлар ортида шунча инсон тақдири, орзу-умидлари ва албатта, турли хил ижтимоий эҳтиёжлари ётибди. Ижтимоий ходимнинг зиммасидаги масъулият кўлами нақадар кенг ва мураккаб эканлигини шундан ҳам англаш мумкинки, у бугунги кунда аҳолининг 12 тоифаси билан мунтазам ва тизимли равишда ишлаб келмоқда. Ҳар бир тоифанинг ўзига хос хусусиятлари, муаммолари ва зудлик билан ечим талаб қиладиган ҳаётий масалалари мавжуд бўлиб, уларнинг ҳеч бири эътибордан четда қолмаяпти.

Ижтимоий ходимлардан ўз ҳудудларида яшовчи 1-тоифага мансуб бўлган, яъни ўзгалар парваришига муҳтож, ёлғиз яшовчи шахсларга алоҳида эътибор қаратиш талаб қилинади. Мазкур маҳаллада ҳам бундай тоифадаги 1 нафар шахс мавжуд бўлиб, унга ижтимоий ассистент томонидан мунтазам равишда, кундалик турмушда зарур бўлган хизматлар кўрсатиб келинмоқда.

Шунингдек, жамиятнинг яна бир ҳимояга муҳтож қатлами бўлган 2-тоифа, яъни ногиронлиги бўлган шахслар билан ишлаш жараёни ҳам доимий назоратга олинган. Маҳаллада жами 77 нафар ногиронлиги бўлган шахс яшайди. Уларнинг 10 нафари 1-гуруҳ, 54 нафари 2-гуруҳ, 3 нафари 3-гуруҳ ногиронлари ҳисобланади. 8 нафари эса ногиронлиги бўлган болалардир. Бу фуқароларнинг ҳар бирига индивидуал ёндашилиб, уларга зарур ижтимоий ёрдамлар ўз вақтида кўрсатилмоқда.

Моддий ва маънавий кўмакка муҳтож бўлган 3-тоифа, яъни кам таъминланган оилалар ҳолати ҳам ижтимоий ходимнинг кундалик кузатуви ва эътибори марказида туради. Маҳалладаги бундай оилалардан мунтазам равишда хабар олиниб келинмоқда. Ҳозирги кунда ижтимоий реестрга ҳудуддаги 59 та оила киритилган. Уларнинг 10 таси тўлиқ давлат таъминотидаги оилалар, 39 таси камбағал оилалар ҳамда 10 таси камбағаллик чегарасидаги оилалардир. Бу оилаларга берилаётган мақсадли кўмаклар уларнинг турмуш тарзини яхшилашга ва қийинчиликларни енгиб ўтишига хизмат қилмоқда.

4-тоифага кирувчи фуқаролар сифатида васийлик ва ҳомийликка олинган болалар тақдири ҳам муҳим аҳамият касб этади. Бугунги кунда ота-онаси хорижга меҳнат миграциясига кетиши сабабли, маҳалладаги жами 22 нафар болага қонуний вакил, яъни васийлик ёки ҳомийлик тайинланган. Меҳр ва эътиборга муҳтож бўлган бу болалар қаровсиз ва назоратсиз қолмаслиги учун уларнинг яшаш ҳолати мунтазам равишда, ҳар чоракда мониторинг қилиниб келинмоқда.

Амударё туманидаги Юқори қишлоқ маҳалласида олиб борилаётган бундай манзилли ва ҳаётий ижтимоий ҳимоя тадбирлари инсон қадрини улуғлашдек эзгу мақсадга хизмат қилмоқда. Ижтимоий ходимларнинг масъулиятли ва сермаҳсул фаолияти туфайли эса ҳеч бир фуқаро, ҳеч бир оила давлат эътиборидан четда қолмайди.