ҚУЁШ ПАНЕЛЛАРИ – ҚУЛАЙ, САМАРАЛИ ВА ТЕЖАМКОР
Халқимиз “ризқингни сотиб равшан ол”, деган иборани бежиз айтмаган. Буни айниқса, куннинг қоронғу қисмида чироқ ўчса, жуда теран ҳис қиламиз, худди атрофимизгина эмас, кўнглимиз ҳам қоронғу бўлиб қолгандай бўлади. Шундай дамлар мамлакатимизнинг барча ҳудудларидаги ижтимоий соҳа объектларида, аҳоли хонадонларида ҳам кузатилиб туриши ҳеч кимга сир эмас. Айниқса, куз-қиш мавсумида электр энергиясида узилишлар тез-тез содир бўлиб туради. Чунки аёзли кунларда уйларни ёритишдан ташқари иситиш учун ҳам электр энергиясига талаб ортиб кетади ва тақчиллик юзага келади. Бунингдек кўнгилсизликларнинг олдини олиш учун электр энергияси таъминоти тизими янги технологиялар билан таъминланаяпти. Лекин тақчилликнинг олдини олиш учун бу етарли эмаслигини тармоқда учраб турадиган узилишлар яққол кўрсатиб турибди.
Жорий йилнинг 16 февралида Ўзбекистон Республикаси Президентининг “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги Қарори қабул қилинди. Мазкур қарорда белгиланган чора-тадбирларни амалга ошириш орқали ижтимоий ва уй-жой коммунал хизмат кўрсатиш соҳаларида ҳамда иқтисодиёт тармоқларида қайта тикланувчи энергия манбаларини кенг жорий этиш, шу йўл билан республика ҳудудларида энергия тақчиллиги қопланишини таъминлаш кўзда тутилган.
Бу мақсадларни амалга ошириш учун бино ва иншоотларда кичик қувватли қайта тикланувчи энергия манбалари қурилмаларини ўрнатиш ва эксплуатация қилиш бўйича масъулияти чекланган жамият шаклидаги “Яшил энергия” компанияси ташкил этилди.
Компанияга маҳаллий ва хорижий ишлаб чиқарувчилардан қайта тикланувчи энергия манбалари қурилмаларини ва уларнинг эҳтиёт қисмларини харид қилиш, ўрнатиш ва уларга сервис хизматларини кўрсатиш учун энг яхши таклифларни танлаб олиб, тўғридан-тўғри шартномалар тузишга рухсат берилди. Ушбу ҳужжатга мувофиқ эндиликда ижтимоий соҳа объектлари билан бир қаторда аҳоли хонадонларига ҳам энергия тежовчи технологияларни ўрнатиш бўйича қатор қулайликлар, солиқ имтиёзлари яратилди.
Шу кунгача туманимизда ҳам бир қанча ижтимоий соҳа объектларига, аҳоли хонадонларига қуёш панеллари ўрнатилди. Бундай қурилмалар биноларнинг том қисмига ҳамда бўш майдонларга ўрнатилгани учун ишлаш жараёнида шовқин бўлмайди, атроф-муҳитга ҳеч қандай зарарли газлар чиқармайди.
Айни кунда туман ҳокимлиги, Адлия бўлими, Мажбурий ижро бюроси каби бир қанча ижтимоий соҳа объектларига қуёш панеллари ўрнатилди. Бу қулай ва самарали воситадан фойдаланишга ўтган тадбиркорлик субъектлари ҳам анча.
Шунингдек, “Темир дафтар”га киритилган аҳоли хонадонларига ҳам давлат ҳисобидан кичик қувватли қуёш панеллари ўрнатилмоқда.
Туманимизнинг Бойовул маҳалласида истиқомат қилувчи Ўктам Ҳайтимбетов, Беруний маҳалласида яшовчи Регина Якубованинг хонадонларига кичик қувватли қуёш панеллари ўрнатилди. Бу иккала хонадонда ҳозирги кунда қуёш панелли етказиб бераётган электр энергиясидан фойдаланилаяпти. Жорий йилнинг июль ойи давомида Тўлқин овулидан Турсунбой Ерманов, Уйшин маҳалласидан Бозорбой Худойберганов, Бўзёп овулидан Тўлибой Нуримбетов, Беш овул маҳалласидан Қадамбой Эсанов, Бўз солма маҳалласидан Турсунбой Жуманиёзов, Дўрман овулидан Ўрозбой Тожимовларнинг хонадонларига ҳам давлат ҳисобидан кичик қувватли қуёш панеллари ўрнатилади ва ишга туширилади.
Бутун юртимизда бўлгани каби туманимизда ҳам қайта тикланувчи энергиядан фойдаланиш, энергия тақчиллигини бартараф этиш бўйича кўпгина чора-тадбирлар амалга оширилмоқда. Объектларни узлуксиз равишда қайта тиклашувчи электр энергияси билан таъминлаш нафақат тармоққа тушаётган юкламани камайтиришга, балки аҳоли ва тадбиркорларнинг электр энергияси учун ажратаётган маблағларини тежаб қолишга ҳам имкон бериши билан аҳамиятлидир.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
