Аскар оналари шарафланди

Юрт ҳимоячиси деган шарафли номга муносиб бўлиб, мустақиллигимизни, она-заминимизни кўз-қорачиғидек асраб-авайлаб келаётган Ватанимизнинг мард ва жасур ўғлонлари бор экан, ҳаётимиз сокин, турмушимиз фаровон. Шу боис ҳар йили мамлакатимизда 14 январь санаси шарафли бурчини адо этаётган ватан посбонларининг байрами сифатида кенг миқёсда нишонланади. Байрам муносабати билан юртимиз бўйлаб ҳар хил мусобақалар, байрам тадбирлари ташкил қилинади.

Айтиш жоизки, бу байрам нафақат Ватан ҳимояси учун хизмат қилаётган юрт ўғлонларининг, балки уларни мард, жасур, ҳақиқий юртпарвар қилиб вояга етказган оналарнинг ҳам байрамидир. Эл-юрт тинчлиги ва осойишталигини асраётган, ғайрат-шижоати, соғлом тафаккури билан ёшларга ўрнак бўлаётган аскар ўғлонларимизнинг оналарини ҳар қанча шарафласак, эъзозласак арзийди. Зеро, фарзанди қалбига Ватанни асрашдек муқаддас бурч туйғусини жойлаган, унинг соғлом, баркамол вояга етиши учун бутун борлиғини бахшида этган аёл азиз ва мўътабардир.

Яқинда Амударё тумани Маданият марказининг концерт залида Ватан ҳимоячилари куни муносабати билан “Аскар оналарини шарафлаймиз” деб номланган байрам тадбири бўлиб ўтди. Туман ҳокимлиги, Хотин-қизлар қўмитаси ва қатор ташкилотлар ҳамкорлигида ўтказилган ушбу тадбирда Қорақалпоғистон Республикаси Мудофаа бошқармаси ҳамда туман Мудофаа бўлими масъуллари, ҳокимлик вакиллари, туманимиздаги ҳарбий сафарбарлик қисмлари масъуллари ва уларда хизмат қилаётган ҳарбийлар ҳамда ёшлар иштирок этдилар. Байрамга муддатли ҳарбий хизматда ўзининг Ватан олдидаги бурчини адо этаётган аскарларнинг оналари ҳам таклиф этилди.

Тадбирни туман ҳокимининг ўринбосари, Хотин-қизлар қўмитаси раиси Марям Аҳмедова очиб берди ҳамда барча Ватан ҳимоячиларини, уларнинг оналарини, қолаверса, бутун юртдошларимизни Қуролли Кучларимиз ташкил қилинганининг 28 йиллиги билан табриклади. Шунингдек, соҳада амалга оширилган кенг кўламли ислоҳотлар самарасида Миллий армиямиз сафларида хизмат қилиш, юртимиз тинчлиги, халқимиз осойишталигини таъминлашга ҳисса қўшиш ҳар бир йигит учун юксак шон-шараф ишига айланганини алоҳида таъкидлаб ўтди.
Тадбирда айни кунларда Ватан олдидаги бурчини адо қилиб, ҳарбий хизматни ўтаётган мард, жасур аскарларнинг оналари ҳам сўзга чиқиб, ҳаммани байрам билан қутлади. Ватан ҳимояси учун хизмат қилаётган аскарлардан Элдорбек Қодировнинг онаси Гавҳар Собирова, Жавлонбек Олимовнинг онаси Гулора Жуманиёзовалар ўғиллари муддатли ҳарбий хизматни ўтаётганлигини, аскарнинг ота-онаси сифатида ўзларига кўрсатилаётган улкан эътибор ва ғамхўрлик учун давлатимиздан миннатдор эканликларини фахр-у ифтихор билан сўзладилар.
Байрам тадбири туман Маданият бўлими хонандаларининг ажойиб куй-қўшиқларига уланди. Ватанни мадҳ этувчи, тинчлик-осойишталикни тараннум қилувчи куй-қўшиқлар, дилрабо рақслар байрам иштирокчиларига кўтаринки кайфият бағишлади.

Ватан ҳимоясидек шарафли ишни ўз бурчи деб биладиган мард ўғлонларни тарбиялаб вояга етказган азиз ва мўътабар оналарга туман ҳокими ва тадбир ташкилотчиларининг ташаккурномалари, эсдалик совғалари топширилди.
Чиндан ҳам, Ватан ҳимояси ҳар бир йигитнинг шарафли бурчидир. Она юртини кўз қорачиғидек асраб, ҳимоя қилишга қодир бўлган ўғлонларни тарбиялаб вояга етказган оналарни эса қанчалик эъзозласак ҳам кам.

Гавҳар ЧИМБАЙЧИЕВА, туман Хотин-қизлар қўмитасининг бош мутахассиси.