“ЖАЖЖИ АСКАРЛАР” САФДА: 22-МТТДА ВАТАНПАРВАРЛИК БАЙРАМИ ЎТКАЗИЛДИ

Юрт тақдирига дахлдорлик, уни ҳимоя қилишга шайлик ҳамда Ватанга муҳаббат туйғулари инсон қалбида болаликдан шаклланади. Шу боис, ёш авлодни ватанпарварлик, мардлик ва жасорат руҳида тарбиялаш масаласи доимо эътибор марказида бўлиб келмоқда. 14 январь — Ватан ҳимоячилари куни ҳамда Ўзбекистон Республикаси Қуролли Кучлари ташкил этилганининг 34 йиллиги муносабати билан Амударё туманидаги 22-сонли мактабгача таълим ташкилотида ҳам айнан шу эзгу мақсадларни кўзлаб байрам тадбири ўтказилди.

Боғчанинг ташаббускор тарбиячиси Маҳфуза Бекмуродова бошчилигида пухта режа асосида ташкил этилган ушбу тантанали тадбирда муассаса жамоаси, ҳудуддаги ҳарбий қисмнинг ҳарбий хизматчилари, тарбияланувчи болажонлар ҳамда уларнинг ота-оналари фаол иштирок этдилар. Байрам нафақат болалар, балки катталар учун ҳам унутилмас таассуротларга бой бўлди.

Тадбир анъанага мувофиқ Ўзбекистон Республикаси ҳамда Қорақалпоғистон Республикасининг давлат мадҳиялари ижроси билан бошланди. Жажжи болажонларнинг қўлларини кўксига қўйиб, мадҳияларни чин дилдан жўр бўлиб куйлашлари томошабинларга чексиз фахр ва ифтихор туйғуларини улашди.

Шундан сўнг, 22-сонли мактабгача таълим ташкилоти директори Нилуфар Юсупова ва ҳарбий қисм мутасаддилари сўзга чиқиб, йиғилганларни, айниқса, келажагимиз эгалари бўлган ўғил-қизларни ҳамда тадбирга ташриф буюрганларни байрам билан самимий муборакбод этдилар. Сўзга чиққанлар ўз нутқида тинч ва осойишта ҳаётни асрашда Ватан ҳимоячиларининг ўрни беқиёс эканини, шунингдек, болаликдан ватанпарварлик туйғуларини шакллантириш муҳим вазифа эканини алоҳида таъкидладилар.

Байрам дастури мазмунан ранг-баранг чиқишларга бой бўлди. Тайёрлов гуруҳи тарбияланувчилари томонидан ижро этилган “Сержант” қўшиғига рақс ҳарбий интизом, жасорат ва болаларча беғуборликни ўзида мужассам этди. Бу чиқиш томошабинлар томонидан илиқ олқишлар билан қарши олинди. Шу гуруҳ қизларининг нафис ва чиройли рақслари эса саҳнага янада файз бағишлади.

Ўрта гуруҳ болаларининг Ватан, тинчлик ва мардликни улуғловчи шеърлари байрам руҳини янада оширди. Ватан, тинчлик ва дўстлик ҳақидаги шеърларни ифодали ўқиган болаларнинг самимий сўзлари, тиниқ овоздаги чиқишлари томошабинларда чуқур таассуротлар қолдирди.

Тадбирнинг энг таъсирли ва ҳаяжонли қисми тайёрлов гуруҳи болажонлари ижросида намойиш этилган “Онамга мактуб” номли саҳна кўриниши бўлди. Унда ҳарбий хизматни ўтаётган аскар йигитнинг онасига ёзган мактуби орқали Ватанга садоқат, ота-онага меҳр ва соғинч туйғулари болаларча самимият билан ифодаланди. Бу саҳна кўриниши томошабинларни ҳам бефарқ қолдирмади.

Катта гуруҳ тарбияланувчилари Ўзбекистон халқ артисти Озодбек Назарбеков ижросидаги “Мендирман ўша” қўшиғига жўшқин рақс ижро этиб, байрам даврасига кўтаринки кайфият бағишладилар. Шунингдек, ўрта гуруҳ ўғил болалари томонидан саҳналаштирилган “Аскар бўламан” ҳарбий рақс композицияси уларнинг келажакда Ватан ҳимоясига тайёр эканликларини рамзий тарзда ифода этди.

Байрам тадбири якунида ота-оналар сўзга чиқиб, фарзандларига берилаётган сифатли таълим-тарбия, болалар қалбига ватанпарварлик руҳини сингдиришга қаратилган бундай мазмунли тадбирлар учун боғча маъмуриятига самимий миннатдорчилик билдирдилар. Айниқса, тадбирни юқори савияда ташкил этишда фидокорона меҳнат қилган тарбиячилар — Маҳфуза Бекмуродова, Гулнора Алламова, Феруза Романова, Юлдуз Зарифбоева ҳамда директор ўринбосари Янгилжон Машариповаларнинг саъй-ҳаракатлари алоҳида эътироф этилди.

Амударё туманидаги 22-сонли мактабгача таълим ташкилотида ўтказилган ушбу байрам тадбири болажонлар хотирасида узоқ вақт сақланиб қолиши шубҳасиз. Зеро, Ватанга муҳаббат, уни асраш ва ҳимоя қилишга тайёргарлик ана шундай кичик саҳналардан, болаликда ташланган илк қадамлардан бошланади.