“JAJJI ASKARLAR” SAFDA: 22-MTTDA VATANPARVARLIK BAYRAMI OʻTKAZILDI

Yurt taqdiriga daxldorlik, uni himoya qilishga shaylik hamda Vatanga muhabbat tuygʻulari inson qalbida bolalikdan shakllanadi. Shu bois, yosh avlodni vatanparvarlik, mardlik va jasorat ruhida tarbiyalash masalasi doimo eʼtibor markazida boʻlib kelmoqda. 14-yanvar — Vatan himoyachilari kuni hamda Oʻzbekiston Respublikasi Qurolli Kuchlari tashkil etilganining 34 yilligi munosabati bilan Amudaryo tumanidagi 22-sonli maktabgacha taʼlim tashkilotida ham aynan shu ezgu maqsadlarni koʻzlab bayram tadbiri oʻtkazildi.

Bogʻchaning tashabbuskor tarbiyachisi Mahfuza Bekmurodova boshchiligida puxta reja asosida tashkil etilgan ushbu tantanali tadbirda muassasa jamoasi, hududdagi harbiy qismning harbiy xizmatchilari, tarbiyalanuvchi bolajonlar hamda ularning ota-onalari faol ishtirok etdilar. Bayram nafaqat bolalar, balki kattalar uchun ham unutilmas taassurotlarga boy boʻldi.

Tadbir anʼanaga muvofiq Oʻzbekiston Respublikasi hamda Qoraqalpogʻiston Respublikasining davlat madhiyalari ijrosi bilan boshlandi. Jajji bolajonlarning qoʻllarini koʻksiga qoʻyib, madhiyalarni chin dildan joʻr boʻlib kuylashlari tomoshabinlarga cheksiz faxr va iftixor tuygʻularini ulashdi.

Shundan soʻng, 22-sonli maktabgacha taʼlim tashkiloti direktori Nilufar Yusupova va harbiy qism mutasaddilari soʻzga chiqib, yigʻilganlarni, ayniqsa, kelajagimiz egalari boʻlgan oʻgʻil-qizlarni hamda tadbirga tashrif buyurganlarni bayram bilan samimiy muborakbod etdilar. Soʻzga chiqqanlar oʻz nutqida tinch va osoyishta hayotni asrashda Vatan himoyachilarining oʻrni beqiyos ekanini, shuningdek, bolalikdan vatanparvarlik tuygʻularini shakllantirish muhim vazifa ekanini alohida taʼkidladilar.

Bayram dasturi mazmunan rang-barang chiqishlarga boy boʻldi. Tayyorlov guruhi tarbiyalanuvchilari tomonidan ijro etilgan “Serjant” qoʻshigʻiga raqs harbiy intizom, jasorat va bolalarcha begʻuborlikni oʻzida mujassam etdi. Bu chiqish tomoshabinlar tomonidan iliq olqishlar bilan qarshi olindi. Shu guruh qizlarining nafis va chiroyli raqslari esa sahnaga yanada fayz bagʻishladi.

Oʻrta guruh bolalarining Vatan, tinchlik va mardlikni ulugʻlovchi sheʼrlari bayram ruhini yanada oshirdi. Vatan, tinchlik va doʻstlik haqidagi sheʼrlarni ifodali oʻqigan bolalarning samimiy soʻzlari, tiniq ovozdagi chiqishlari tomoshabinlarda chuqur taassurotlar qoldirdi.

Tadbirning eng taʼsirli va hayajonli qismi tayyorlov guruhi bolajonlari ijrosida namoyish etilgan “Onamga maktub” nomli sahna koʻrinishi boʻldi. Unda harbiy xizmatni oʻtayotgan askar yigitning onasiga yozgan maktubi orqali Vatanga sadoqat, ota-onaga mehr va sogʻinch tuygʻulari bolalarcha samimiyat bilan ifodalandi. Bu sahna koʻrinishi tomoshabinlarni ham befarq qoldirmadi.

Katta guruh tarbiyalanuvchilari Oʻzbekiston xalq artisti Ozodbek Nazarbekov ijrosidagi “Mendirman oʻsha” qoʻshigʻiga joʻshqin raqs ijro etib, bayram davrasiga koʻtarinki kayfiyat bagʻishladilar. Shuningdek, oʻrta guruh oʻgʻil bolalari tomonidan sahnalashtirilgan “Askar boʻlaman” harbiy raqs kompozitsiyasi ularning kelajakda Vatan himoyasiga tayyor ekanliklarini ramziy tarzda ifoda etdi.

Bayram tadbiri yakunida ota-onalar soʻzga chiqib, farzandlariga berilayotgan sifatli taʼlim-tarbiya, bolalar qalbiga vatanparvarlik ruhini singdirishga qaratilgan bunday mazmunli tadbirlar uchun bogʻcha maʼmuriyatiga samimiy minnatdorchilik bildirdilar. Ayniqsa, tadbirni yuqori saviyada tashkil etishda fidokorona mehnat qilgan tarbiyachilar — Mahfuza Bekmurodova, Gulnora Allamova, Feruza Romanova, Yulduz Zarifboyeva hamda direktor oʻrinbosari Yangiljon Masharipovalarning saʼy-harakatlari alohida eʼtirof etildi.

Amudaryo tumanidagi 22-sonli maktabgacha taʼlim tashkilotida oʻtkazilgan ushbu bayram tadbiri bolajonlar xotirasida uzoq vaqt saqlanib qolishi shubhasiz. Zero, Vatanga muhabbat, uni asrash va himoya qilishga tayyorgarlik ana shunday kichik sahnalardan, bolalikda tashlangan ilk qadamlardan boshlanadi.