“Сарҳад” жамоаси аъзолари ва уларнинг ота-оналари рағбатлантирилди

Ёш авлод тарбияси, уларнинг қалбида Ватанга бўлган муҳаббат ва садоқат туйғуларини юксалтириш ҳар бир жамиятнинг энг муҳим вазифаларидан бири ҳисобланади. Мамлакатимизнинг эртанги куни, сарҳадларимиз дахлсизлиги ва осойишталигимиз айнан бугунги кунда камол топаётган ёшларимизнинг қандай таълим-тарбия олишига бевосита боғлиқдир. Шу маънода, Қорақалпоғистон Республикасининг турли ҳудудларида ёшларни ватанпарварлик руҳида тарбиялаш, уларнинг жисмоний ва жанговар тайёргарлигини ошириш мақсадида тизимли ишлар амалга оширилмоқда. Ана шундай эзгу саъй-ҳаракатларнинг ёрқин намунасини Амударё туманидаги 17-сонли умумий ўрта таълим мактаби фаолияти мисолида яққол кўришимиз мумкин. Ушбу таълим даргоҳи жамоаси ёш авлодга муносиб таълим-тарбия бериш, уларни билимли, салоҳиятли ва энг асосийси, ўз юртига садоқатли инсонлар этиб вояга етказиш йўналишида салмоқли натижаларни қўлга киритиб келмоқда.

Бугунги кунда мазкур таълим муассасасида жами 366 нафар ўқувчи таҳсил олмоқда. Уларга ўз касбининг фидойилари бўлган 40 нафар малакали педагог ходимлар томонидан замонавий талаблар ва илғор ёндашувлар асосида таълим-тарбия берилмоқда. Таъкидлаш жоизки, мактабда фаолият юритаётган ўқитувчиларнинг 22,5 фоизи нуфузли халқаро ва миллий сертификатларга эга бўлиб, бу кўрсаткич таълим сифатининг тобора юксалиб бораётганидан далолат беради. Устозларнинг тинимсиз меҳнати ва изланишлари ўз натижасини кўрсатмоқда. Хусусан, ўтган ўқув йилида мактаб битирувчиларининг 30 фоизи олий таълим муассасаларига ўқишга қабул қилиниб, талабалик бахтига муяссар бўлдилар ва ўз устозлари ҳамда ота-оналарининг умид ва ишончини тўлақонли оқладилар.

Айнан мана шундай заҳматкаш педагоглар меҳнат қилаётган ва иқтидорли ўқувчилар жамоасига эга бўлган мактаб ҳаётида яқинда яна бир улкан қувончли воқеа рўй берди. Жорий йилнинг 29 апрель куни Қорақалпоғистон Республикаси бўйича ўқувчи ёшлар ўртасида ўтказилган “Ёш чегарачилар” ҳарбий спорт мусобақасининг республика босқичида мазкур мактабнинг “Сарҳад” жамоаси ўзининг юксак салоҳиятини намойиш қилиб, муносиб иштирок этди. Ушбу нуфузли ва муросасиз беллашувда туман шаънини ҳимоя қилган ёшларимиз фахрли 2-ўринни эгаллашга муваффақ бўлдилар.

Ушбу улкан муваффақиятни кенг нишонлаш ва ғолибларни муносиб тақдирлаш мақсадида мактабда катта тантанали тадбир ташкил этилди. Тадбирга ҳудуддаги ҳарбий қисм масъуллари, мактаб маъмурияти, устоз-ўқитувчилар, ўқувчилар, “Сарҳад” жамоасининг аъзолари ҳамда уларни доимо қўллаб-қувватлаб келаётган ота-оналари таклиф этилди. Мактабнинг кенг ҳовлиси ва саҳнаси байрамона безатилиб, миллий куй-қўшиқларнинг жўшқин садолари остида тадбир иштирокчилари катта ҳурмат ва эҳтиром билан кутиб олинди.

Тадбирни мактаб директори кириш сўзи билан очиб берар экан, “Ёш чегарачилар” мусобақасида эришилган бу юксак муваффақият нафақат бир жамоанинг, балки бутун мактабнинг, овул аҳлининг, қолаверса, бутун туманнинг чинакам шарафи эканлигини алоҳида таъкидлаб ўтди.

Айтиш жоизки, мазкур мусобақа жуда кескин курашларга бой бўлди. Республика босқичида Қўнғирот, Тахтакўпир, Шўманай, Хўжайли, Амударё ва Тахиятош туманларининг энг сара ва кучли жамоалари ўзаро беллашдилар. Иштирокчилар ўзларининг жисмоний, маънавий ва ҳарбий тайёргарликларини 11 та мураккаб шарт бўйича синовдан ўтказдилар. Хусусан, саф майдонида шахдам қадамлар билан юриш, ватанпарварлик руҳидаги ҳарбий қўшиқ айтиш, автоматни қисмларга ажратиш ва йиғиш, узоқ масофага граната улоқтириш, турникда тортилиш, белгиланган масофага тезкор югуриш, ярадорларга биринчи тиббий ёрдам кўрсатиш ҳамда назарий билимлар синови каби машқларда ёшлар ўз маҳоратларини намойиш этишди. Қувонарлиси шундаки, “Сарҳад” жамоаси аъзолари барча босқичларда ўзларининг беқиёс чидамлилиги, иродаси, жасорати ва жамоавий жипслиги билан ҳакамлар ҳайъати ва кўпчилик томошабинларнинг қизғин олқишига сазовор бўлдилар.

Тантанали тадбир давомида “Сарҳад” жамоасининг ҳар бир аъзосига эсдалик совғалари топширилди. Ёшлар ўз меҳнати, тиришқоқлиги ва жасоратига муносиб тарзда тақдирланди. Шу билан бирга, ўз фарзандларини Ватанга чексиз муҳаббат руҳида тарбиялаб келаётган, уларнинг қалбида ватанпарварлик туйғуларини шакллантиришда катта ҳисса қўшган ота-оналарга 17-сонли мактаб маъмурияти ва педагогик жамоаси номидан самимий миннатдорлик билдирилиб, махсус ташаккурномалар тақдим этилди.

Тадбир сўнгида сўзга чиққан жамоа мураббийси ҳамда ота-оналар вакиллари фарзандларининг бундай улкан муваффақияти учун таълим муассасаси маъмуриятига, заҳматкаш устозларга ва яқиндан ёрдам кўрсатган ҳарбий қисм ходимларига ўзларининг чексиз миннатдорчиликларини изҳор этдилар. Ўз навбатида, “Сарҳад” жамоаси аъзолари келгусида бўлиб ўтадиган мусобақаларда бунданда юқори натижаларни қайд этиб, мутлақ ғолибликни қўлга киритиш мақсадида астойдил тайёргарлик кўришларини қатъият билан маълум қилдилар.

Дарҳақиқат, бугунги кунда шиддат билан ривожланиб бораётган жамиятимизда ёш авлодни ҳар томонлама баркамол, жисмонан бақувват, маънан етук ва чинакам ватанпарвар инсонлар қилиб тарбиялашда бу каби тадбирларнинг, ҳарбий-ватанпарварлик йўналишидаги спорт мусобақаларининг ўрни ва аҳамияти беқиёсдир. Амударё туманидаги 17-сонли мактабда ўтказилган мазкур тадбир ҳам айнан шу олижаноб мақсадга, яъни Ватанга садоқатли, унинг сарҳадларини ҳимоя қилишга доимо тайёр бўлган соғлом авлодни камолга етказишдек буюк вазифага хизмат қилиши билан аҳамиятлидир.