Askar onalari sharaflandi

Yurt himoyachisi degan sharafli nomga munosib boʻlib, mustaqilligimizni, ona-zaminimizni koʻz-qorachigʻidek asrab-avaylab kelayotgan Vatanimizning mard va jasur oʻgʻlonlari bor ekan, hayotimiz sokin, turmushimiz farovon. Shu bois har yili mamlakatimizda 14-yanvar sanasi sharafli burchini ado etayotgan vatan posbonlarining bayrami sifatida keng miqyosda nishonlanadi. Bayram munosabati bilan yurtimiz boʻylab har xil musobaqalar, bayram tadbirlari tashkil qilinadi.

Aytish joizki, bu bayram nafaqat Vatan himoyasi uchun xizmat qilayotgan yurt oʻgʻlonlarining, balki ularni mard, jasur, haqiqiy yurtparvar qilib voyaga yetkazgan onalarning ham bayramidir. El-yurt tinchligi va osoyishtaligini asrayotgan, gʻayrat-shijoati, sogʻlom tafakkuri bilan yoshlarga oʻrnak boʻlayotgan askar oʻgʻlonlarimizning onalarini har qancha sharaflasak, eʼzozlasak arziydi. Zero, farzandi qalbiga Vatanni asrashdek muqaddas burch tuygʻusini joylagan, uning sogʻlom, barkamol voyaga yetishi uchun butun borligʻini baxshida etgan ayol aziz va moʻʼtabardir.

Yaqinda Amudaryo tumani Madaniyat markazining kontsert zalida Vatan himoyachilari kuni munosabati bilan “Askar onalarini sharaflaymiz” deb nomlangan bayram tadbiri boʻlib oʻtdi. Tuman hokimligi, Xotin-qizlar qoʻmitasi va qator tashkilotlar hamkorligida oʻtkazilgan ushbu tadbirda Qoraqalpogʻiston Respublikasi Mudofaa boshqarmasi hamda tuman Mudofaa boʻlimi masʼullari, hokimlik vakillari, tumanimizdagi harbiy safarbarlik qismlari masʼullari va ularda xizmat qilayotgan harbiylar hamda yoshlar ishtirok etdilar. Bayramga muddatli harbiy xizmatda oʻzining Vatan oldidagi burchini ado etayotgan askarlarning onalari ham taklif etildi.

Tadbirni tuman hokimining oʻrinbosari, Xotin-qizlar qoʻmitasi raisi Maryam Ahmedova ochib berdi hamda barcha Vatan himoyachilarini, ularning onalarini, qolaversa, butun yurtdoshlarimizni Qurolli Kuchlarimiz tashkil qilinganining 28 yilligi bilan tabrikladi. Shuningdek, sohada amalga oshirilgan keng koʻlamli islohotlar samarasida Milliy armiyamiz saflarida xizmat qilish, yurtimiz tinchligi, xalqimiz osoyishtaligini taʼminlashga hissa qoʻshish har bir yigit uchun yuksak shon-sharaf ishiga aylanganini alohida taʼkidlab oʻtdi.
Tadbirda ayni kunlarda Vatan oldidagi burchini ado qilib, harbiy xizmatni oʻtayotgan mard, jasur askarlarning onalari ham soʻzga chiqib, hammani bayram bilan qutladi. Vatan himoyasi uchun xizmat qilayotgan askarlardan Eldorbek Qodirovning onasi Gavhar Sobirova, Javlonbek Olimovning onasi Gulora Jumaniyozovalar oʻgʻillari muddatli harbiy xizmatni oʻtayotganligini, askarning ota-onasi sifatida oʻzlariga koʻrsatilayotgan ulkan eʼtibor va gʻamxoʻrlik uchun davlatimizdan minnatdor ekanliklarini faxr-u iftixor bilan soʻzladilar.
Bayram tadbiri tuman Madaniyat boʻlimi xonandalarining ajoyib kuy-qoʻshiqlariga ulandi. Vatanni madh etuvchi, tinchlik-osoyishtalikni tarannum qiluvchi kuy-qoʻshiqlar, dilrabo raqslar bayram ishtirokchilariga koʻtarinki kayfiyat bagʻishladi.

Vatan himoyasidek sharafli ishni oʻz burchi deb biladigan mard oʻgʻlonlarni tarbiyalab voyaga yetkazgan aziz va moʻʼtabar onalarga tuman hokimi va tadbir tashkilotchilarining tashakkurnomalari, esdalik sovgʻalari topshirildi.
Chindan ham, Vatan himoyasi har bir yigitning sharafli burchidir. Ona yurtini koʻz qorachigʻidek asrab, himoya qilishga qodir boʻlgan oʻgʻlonlarni tarbiyalab voyaga yetkazgan onalarni esa qanchalik eʼzozlasak ham kam.

Gavhar ChIMBAYChIYeVA, tuman Xotin-qizlar qoʻmitasining bosh mutaxassisi.