Якка тартибда уй-жой қуриш учун ер участкалари эндиликда “E-IJRO AUKSION” ягона савдо майдончасида электрон аукцион орқали олинади

Ўзбекистон Республикаси Вазирлар Маҳкамасининг шу йилги 63-сон “Ер участкалари бериш ва якка тартибдаги уй-жой қуриш учун ер участкаларига мерос қилиб қолдириладиган умрбод эгалик қилиш ҳуқуқини реализация қилишнинг замонавий ва шаффоф механизмларини жорий этиш бўйича қўшимча чора-тадбирлар тўғрисида”ги қарори қабул қилинди. Унга мувофиқ, якка тартибда уй-жой қуриш учун ер участкалари мерос қилиб қолдириладиган умрбод эгалик қилиш ҳуқуқини реализация қилиш “E-IJRO AUKSION” ягона савдо майдончасида электрон аукционлар ўтказиш йўли билан амалга оширилади.

Якка тартибда уй-жой қуриш учун 0,04 гектаргача ва ушбу ҳажм доирасидаги ер участкалари фақат ҳалок бўлган ҳарбий хизматчилар оилаларига, давлат ва хусусий уй-жой фондидаги ўзлари эгаллаб турган уй-жойни туман ҳокимликларига ўтказаётган фуқаролар ва мулкдорларга аукционсиз берилади. Ер участкасини бериш бўйича имтиёзлар бир оилага бир марта берилади ва оиланинг бошқа аъзоларига татбиқ этилмайди.

Якка тартибда уй-жой қуриш учун ер участкасини олиш учун туман ҳокимлигига ариза берилади. Шунингдек, аукцион иштирокчиси битта ер участкасини бир йилда бир марта сотиб олиш ҳуқуқига эга бўлади. Аукционда иштирок этиш учун закалат ер участкаси минимал қийматининг 50 фоизи миқдорида белгиланади. Агар буюртмачининг шахсий ҳисоб рақамидаги мавжуд пул маблағлари етарли бўлмаса, аукционда иштирок этиш учун буюртма қабул қилинмайди.
Умумий шартларига кўра аукционлар ўтказилиши ҳақидаги хабарномалар ва лот ҳақидаги ахборот камида 30 календарь кун олдин операторнинг веб-порталида жойлаштирилади. Бўш ер участкасига мерос қилиб қолдириладиган умрбод эгалик қилиш ҳуқуқи аукционга туман ҳокимининг қарорида кўрсатилган ер участкасининг энг паст нархи бўйича қўйилади. Электрон аукцион бўлиб ўтмаган деб тан олинганда, ер участкасининг энг паст нархи бўйича такрорий аукционга қўйилади.

Оператор аукционни ташкил этиш хизматлари учун тегишли миқдорида ҳақ олади. Шунингдек, аукцион икки ва ундан ортиқ иштирокчи мавжуд бўлганда ўтказилади. Тартибга кўра, аукцион бир иш куни мобайнида соат 9:00 дан соат 18:00 гача бўлиб ўтади. Бошланғич нарх сифатида аукцион объектининг минимал қийматига тенг нарх белгиланади.

Аукционнинг қадами аукцион объекти минимал қийматининг беш фоизини ташкил этади. Шунингдек, иштирокчилардан лотни бошланғич нархдан битта қадамга оширилган нархда сотиб олиш бўйича таклифни тасдиқлашни сўрашдан бошланади. Агар таклиф берилгандан кейин ўн дақиқа давомида аукцион иштирокчиларидан бири белгиланган қадамга оширилган лот нархини тасдиқласа, кейинги таклифни тасдиқлаш учун вақт яна ўн дақиқага узайтирилади. Лекин тасдиқланган охирги таклифдан сўнг, ўн дақиқа давомида кейинги оширилган лот нархи бўйича таклиф аукцион иштирокчиларининг биронтаси томонидан тасдиқланмаса, аукцион натижалари ҳақидаги баённомани автоматик тарзда шакллантирган ҳолда якунланади. Лот нархи бўйича таклифни охирги тасдиқлаган иштирокчи аукцион ғолиби, деб ҳисобланади.

Аукцион иштирокчиларига навбатдаги ставкани дастлабки белгиланган қадамнинг 5, 10 ёки 20 баравари миқдорида мустақил белгилаш имконияти берилади. Агар лот нархини ошириш бўйича таклифни охирги тасдиқлаган аукцион иштирокчиси буни электрон онлайн-аукционни ўтказиш вақти якунлангунга ўн дақиқадан кам қолганда амалга оширган бўлса, аукционни ўтказиш вақти охирги таклиф тасдиқланган пайтдан бошлаб, кейинги ўн дақиқага узайтирилишига имкон берилади. Бунда электрон онлайн аукционни ўтказиш вақти 3 соатдан ортиқ бўлмаган муддатга узайтирилиши мумкин ва аукцион соат 21:00га қадар якунланиши лозим. Лот нархи бўйича охирги таклифни соат 21:00 га қадар билдирган иштирокчи аукцион ғолиби ҳисобланади.

Туман ҳокими «E-IJRO AUKSION» орқали баённомани олгандан кейин беш иш куни мобайнида аукцион ғолибига ер участкасини ажратиш ҳақида қарор қабул қилади.

А.Кутжанов, туман Адлия бўлими
етакчи  маслаҳатчиси.