ХАЛҚАPО НОГИPОНЛАP КУНИ МУНОСАБАТИ БИЛАН ТАДБИP ЎТКАЗИЛДИ (+Видео)

1992 йилда Бирлашган Миллатлар Ташкилоти Бош ассамблеясида 3 декабрь Халқаро ногиронлар куни сифатида эълон қилинди. Шундан буён мазкур сана дунё бўйлаб нишонлаб келинади.  

Мамлакатимизда ногиронлиги бўлган шахсларни ижтимоий ҳимоя қилиш, уларга зарур шароитлар яратиш ва улар учун тенг имкониятларни таъминлаш бўйича катта ишлар амалга оширилмоқда.

Ушбу сана юртимизнинг барча ҳудудларида кенг нишонланади. Шу куни хаста, боқувчисини йўқотган, ёлғиз кишилар ҳолидан хабар олинади. Уларга ҳомий ташкилотларнинг дори-дармонлари, тиббий воситалар, таянч-ортопедия мосламаларидан иборат совғалари топширилади. Турли тадбирлар, хайрия марафонлари, концертлар, бадиий кўргазмалар ташкил этилади.

Шундай тадбирлардан бири 3 декабрь куни Амударё туманидаги “Бек” тўйхонасида бўлиб ўтди. Байрам тадбирига тўйхона маъмурияти ҳомийлик қилди. Тадбирда тумандаги ногиронлар жамияти аъзолари, кўзи ожизлар жамияти аъзолари иштирок этди.

Шу ўринда айтиш керакки, 3 декабрь куни дунё бўйлаб Халқаро ногиронлар кунининг ўтказилиши ногиронларнинг сиёсий, иқтисодий, маданий ва ижтимоий ҳаётдаги иштирокидан юзага келган муаммоларга жамоатчилик эътиборини жалб қилиш, ногиронлиги бўлган шахслар қадри, ҳуқуқлари ва фаровонлигини ҳимоя қилишга қаратилган.

Бу кун аҳолининг кўмакка муҳтож қатлами, имконияти чекланган инсонларга моддий ва маънавий ёрдам бериш, улар жамиятда ўз ўрнини топиши учун кўмаклашишга чорлаш, бир-биримизга меҳр-мурувват кўрсатишга ундаш рамзи сифатида нишонланиб келинади.

Шу мақсадда ташкил этилган тадбирда туман ҳокими Султонбой Йўлдошев, ҳокимлик масъуллари ва жамоат ташкилотлари раҳбарлари иштирок этди. Туман ҳокими ногиронлиги бўлган юртдошларимиз билан самимий суҳбат қуриб, уларга байрам совғалари улашди.

Юртимизда ногиронларни ижтимоий ҳимоя қилиш ҳамда уларни моддий таъминлаш мақсадида ногиронлик нафақалари берилади. Айтиш жоизки, туманимизда жорий йил 1 декабрь ҳолатига жами ногиронлик бўйича нафақа олувчилар сони 4 минг 29 нафар бўлиб, шундан болаликдан ногирон бўлган ижтимоий нафақа олувчилар 1 минг 753 нафарни ташкил қилади.

Шунингдек, 1-гуруҳ ногиронлари 368 нафарни, 2-гуруҳ ногиронлари 1 минг 765 нафарни, 3-гуруҳ ногиронлари эса 143 нафарни ташкил этади.

Туман бюджетдан ташқари пенсия жамғармаси ходимлари туман бўйича якка ёлғизлар, ётиб қолган пенсионерлар ва 1-2-гуруҳ ногиронлиги бўлган шахслар рўйхатларини алоҳида шакллантириб, ушбу тоифа фақароларга нафақа пулларини  биринчи навбатда уйларига етказиб берилиши юзасидан Халқ бақнки билан ҳамкорликда ишлар олиб бормоқда.

Байрам тадбирида ногиронлиги бўлган шахсларга туман касаба уюшмалари кенгаши томонидан ҳам қимматбаҳо совғалар берилди.  Қолаверса, мамалакатимизда ногиронлиги бўлган хотин-қизларни ижтимоий ҳимоя қилиш мақсадида ажратилган 5 та ногиронлик аравачалари, 5 дона ҳасса, 5 та эшитиш мосламалари ўз эгаларига топширилди.

Бу каби тадбирлар жамиятда эзгулик, меҳр-мурувват ва ҳамжиҳатлик муҳитини мустаҳкамлаш, жисмоний имконияти чекланган шахсларни ижтимоий фаол ҳаётга жалб қилиш борасида амалга оширилаётган ишларнинг амалий исботидир.

Чарос АPСЛОНОВА.