ҚАЛБИМИЗДА ФАХP УЙҒОТГАН ОЧЕPК
“Тараққиёт кўзгуси” газетасининг 2019 йил 17 июль сонида эълон қилинган “Дунёни ром этган Манғитлик сартарош” очеркини ўқиб, жамоамиз ва мен жуда фахрландик. Ўзим ва жамоамиз номидан очерк муаллифи, журналист Pобия Йўлдошевага ва газета таҳририятига чин дилдан миннатдорчилик билдирамиз.
Чунки бизнинг жамоамиз билан фахрланишимизга юз фоиз асосимиз бор. Шахсан мен Шомуродовлар оиласи билан 1961 йилдан бошлаб таниш ва қадрдонмиз. Серфарзанд оилада ўсган, асли манғитлик, айни пайтда хизмат тақозоси билан Тошкент шаҳрида истиқомат қилаётган Ўзбекистон Сартарошлар ассоциацияси раиси, машҳур стилист-модельер Фарҳод Шомуродовни ўсмирлик давридан яхши биламан ва яқин қариндошлардаймиз.
Худо раҳмат қилсин Явқаш ота ва Шамсина аялар мени 10 нафар ўғил-қизлари қаторида кўрар, гўё ўғлидек эдим. Оиланинг катта ўғли Озод Шомуродов билан эга яқин дўст бўлганмиз. Дўстим Озод билан спорт машғулотларига, кутубхоналарга ва киноларга бирга қатнардик. Фарҳоджон ҳам бизга эргашиб спорт тўгаракларига борарди.
Явқаш отанинг бир одати бор эди: ўғил-қизларини ёзги таътил пайтларида бирон бир ҳунарманд-устага шогирдликка берардилар. Фарҳоджонни манғитлик номдор сартарош Қўшжон Эшмуродовга шогирдликка берганларида у эндигина 14 ёшга кирган ўсмир эди.
Юқоридаги очеркда шундай сатрлар бор: “Фарҳод Шомуродовнинг манғитлик Қўшжон сартарошнинг сартарошлик устахонаси – “будка”сидан бошланган орзу йўллари уни дунёнинг машҳур анжуманларига, гўзаллик фестивалларига етаклади...”
Фарҳоджон кўз ўнгимизда камолга етди. Бунга қадар ўз орзулари йўлида қанчалик кўп меҳнат қилганига шахсан мен гувоҳман. Ўзини аямай ишлади, ҳар бир сониядан унумли фойдаланди. Ҳатто менга, менга ўхшаган юзлаб, минглаб инсонларга ўз ҳунарини тарғиб қилди, ўргатди, ишлари ривожланиб кетиши учун кўмаклашди.
Фарҳод Шомуродов ҳар гал Манғитга келганида учрашиб, маслаҳатлашиб турар эдик. Мен ўз тадбиркорлик йўналишимда сартарошхона очиш ниятим борлигини айтганимда у жуда қувонди ва устахонамизни сартарошлик ускуналари билан таъминлашни ўз зиммасига олди. Иккимиз маслаҳатлашган ҳолда бу ишни уддаладик. Сартарошлик санъатига оид китоблар ва видео тасмаларни ҳам тақдим қилди. 2017 йил охирларида иш бошладик.
Устахонамизга Фарҳод Шомуродов билан маслаҳатлашиб, моҳир сартарош – “Уста Қўшжон” номини бердик. Айни пайтда “Манғит” МЧЖга қарашли “Уста Қўшжон” сартарошхонаси иш фаолиятини давом қилдирмоқда. Ёзда салқин, қишда иссиқ, барча шароитлари мавжуд сартарошхонамиздан мижозларимиз хурсанд. Сартарошхонамизга келганлар ҳар хил газета-журналлар ўқиб, телевизорда янгиликлар билан танишиб, кутиш вақтини бекор ўтказмайдилар. Сартарошларимиздан Шуҳрат Бозорбоев Ўзбекистон Сартарошлар ассоциацияси кўргазмасида қатнашиб совринли 3-ўринни олишга сазовор бўлди.
Давр талаби тобора ўзгариб бормоқда, бирон тўй-ҳашам, тадбир бўлса, аёл-қизлар гўзаллик салонига йигитлар эса сартарошхонага келиб, ўзларига эътибор қилиб, ясанишади. Шуларни эътиборга олиб ва Фарҳоджоннинг маслаҳати билан жияним Моҳирахон ва неварам Севарахонлар гўзаллик салонларини очишди.
Бундан ташқари, невараларимдан Асадбек ва Асилбеклар сартарошлик касбини танлаганлар, уста-сартарошлардан устоз-шогирд анъанасига кўра, касб-ҳунар ўрганишмоқда.
Тўғрисини айтсам, бу борада бизни ҳамиша, ҳар бир масалада Фарҳоджон қўллаб-қувватлайдилар.
Мен “Манғит” МЧЖга яқиндан ёрдам берган, ҳомийлик қилган Ўзбекистон Сартарошлар ва косметологлар ассоциацияси раиси. Халқаро тоифадаги стилист-модельер Фарҳод Шамуродовга жамиятимиз ва мижозларимиз номидан раҳматлар айтаман.
Pобия Йўлдошеванинг “Дунёни ром этган манғитлик сартарош” очерки эса инсонлар назарида унчалик кўзга ташланмайдиган оддий касб – сартарошликни санъат даражасига етказиш, ҳатто шу касб орқасидан шон-шуҳрат пиллапояларидан юксалиш мумкинлигини ўзида акс эттиргани қалбимизда фахр уйғотди.
Турсунбой АҲМЕДОВ, тадбиркор,
Қорақалпоғистонда хизмат кўрсатган маиший ва савдо ходими.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
