QALBIMIZDA FAXP UYGʻOTGAN OChEPK

“Taraqqiyot koʻzgusi” gazetasining 2019-yil 17-iyul sonida eʼlon qilingan “Dunyoni rom etgan Mangʻitlik sartarosh” ocherkini oʻqib, jamoamiz va men juda faxrlandik. Oʻzim va jamoamiz nomidan ocherk muallifi, jurnalist Pobiya Yoʻldoshevaga va gazeta tahririyatiga chin dildan minnatdorchilik bildiramiz.

Chunki  bizning jamoamiz bilan faxrlanishimizga yuz foiz asosimiz bor. Shaxsan men Shomurodovlar oilasi bilan 1961-yildan boshlab tanish va qadrdonmiz. Serfarzand oilada oʻsgan, asli mangʻitlik, ayni paytda xizmat taqozosi bilan Toshkent shahrida istiqomat qilayotgan Oʻzbekiston Sartaroshlar assotsiatsiyasi raisi, mashhur stilist-modeler Farhod Shomurodovni oʻsmirlik davridan yaxshi bilaman va yaqin qarindoshlardaymiz.

Xudo rahmat qilsin Yavqash ota va Shamsina ayalar meni 10 nafar oʻgʻil-qizlari qatorida koʻrar, goʻyo oʻgʻlidek edim. Oilaning katta oʻgʻli Ozod Shomurodov bilan ega yaqin doʻst boʻlganmiz. Doʻstim Ozod bilan sport mashgʻulotlariga, kutubxonalarga va kinolarga birga qatnardik. Farhodjon ham bizga ergashib sport toʻgaraklariga borardi.

Yavqash otaning bir odati bor edi: oʻgʻil-qizlarini yozgi taʼtil paytlarida biron bir hunarmand-ustaga shogirdlikka berardilar. Farhodjonni mangʻitlik nomdor sartarosh Qoʻshjon Eshmurodovga shogirdlikka berganlarida u endigina 14 yoshga kirgan oʻsmir edi.

Yuqoridagi ocherkda shunday satrlar bor: “Farhod Shomurodovning mangʻitlik Qoʻshjon sartaroshning sartaroshlik ustaxonasi – “budka”sidan boshlangan orzu yoʻllari uni dunyoning mashhur anjumanlariga, goʻzallik festivallariga yetakladi...”

Farhodjon koʻz oʻngimizda kamolga yetdi. Bunga qadar oʻz orzulari yoʻlida qanchalik koʻp mehnat qilganiga shaxsan men guvohman. Oʻzini ayamay ishladi, har bir soniyadan unumli foydalandi. Hatto menga, menga oʻxshagan yuzlab, minglab insonlarga oʻz hunarini targʻib qildi, oʻrgatdi, ishlari rivojlanib ketishi uchun koʻmaklashdi.

Farhod Shomurodov har gal Mangʻitga kelganida uchrashib, maslahatlashib turar edik. Men oʻz tadbirkorlik yoʻnalishimda sartaroshxona ochish niyatim borligini aytganimda u juda quvondi va ustaxonamizni sartaroshlik uskunalari bilan taʼminlashni oʻz zimmasiga oldi. Ikkimiz maslahatlashgan holda bu ishni uddaladik. Sartaroshlik sanʼatiga oid kitoblar va video tasmalarni ham taqdim qildi. 2017-yil oxirlarida ish boshladik.

Ustaxonamizga Farhod Shomurodov bilan maslahatlashib, mohir sartarosh – “Usta Qoʻshjon” nomini berdik. Ayni paytda “Mangʻit” MChJga qarashli “Usta Qoʻshjon” sartaroshxonasi ish faoliyatini davom qildirmoqda. Yozda salqin, qishda issiq, barcha sharoitlari mavjud sartaroshxonamizdan mijozlarimiz xursand. Sartaroshxonamizga kelganlar har xil gazeta-jurnallar oʻqib, televizorda yangiliklar bilan tanishib, kutish vaqtini bekor oʻtkazmaydilar. Sartaroshlarimizdan Shuhrat Bozorboyev Oʻzbekiston Sartaroshlar assotsiatsiyasi koʻrgazmasida qatnashib sovrinli 3-oʻrinni olishga sazovor boʻldi.

Davr talabi tobora oʻzgarib bormoqda, biron toʻy-hasham, tadbir boʻlsa, ayol-qizlar goʻzallik saloniga yigitlar esa sartaroshxonaga kelib, oʻzlariga eʼtibor qilib, yasanishadi. Shularni eʼtiborga olib va Farhodjonning maslahati bilan jiyanim Mohiraxon va nevaram Sevaraxonlar goʻzallik salonlarini ochishdi.

Bundan tashqari, nevaralarimdan Asadbek va Asilbeklar sartaroshlik kasbini tanlaganlar, usta-sartaroshlardan ustoz-shogird anʼanasiga koʻra, kasb-hunar oʻrganishmoqda.

Toʻgʻrisini aytsam, bu borada bizni hamisha, har bir masalada Farhodjon qoʻllab-quvvatlaydilar.

Men “Mangʻit” MChJga yaqindan yordam bergan, homiylik qilgan Oʻzbekiston Sartaroshlar va kosmetologlar assotsiatsiyasi raisi. Xalqaro toifadagi stilist-modeler Farhod Shamurodovga jamiyatimiz va mijozlarimiz nomidan rahmatlar aytaman.

Pobiya Yoʻldoshevaning “Dunyoni rom etgan mangʻitlik sartarosh” ocherki esa insonlar nazarida unchalik  koʻzga tashlanmaydigan oddiy kasb – sartaroshlikni sanʼat darajasiga yetkazish, hatto shu kasb orqasidan shon-shuhrat pillapoyalaridan yuksalish mumkinligini oʻzida aks ettirgani qalbimizda faxr uygʻotdi.

Tursunboy AHMEDOV, tadbirkor,

Qoraqalpogʻistonda xizmat koʻrsatgan maishiy va savdo xodimi.