“Orol dengiziga poyezd” — yoshlar qalbida ekologik tafakkur va turizm ruhini uygʻotgan maʼnaviy safar

Amudaryo tumanidagi qadimiy maskan — Chilpiq qalʼasi yana bir muhim maʼnaviy-maʼrifiy tadbirga mezbonlik qildi. Bu yerda “Orol dengiziga poyezd” yoshlar ekologik aktsiyasi hamda “Biz Orol bilan birgamiz” eko-marafoni yuqori ruh va katta taassurotlarga boy tarzda tashkil etildi. Mazkur tadbir nafaqat ekologik muammolarga eʼtibor qaratish, balki yoshlar qalbida tabiatga mehr, tarixiy merosga hurmat va turizm madaniyatini shakllantirishga xizmat qilgani bilan ahamiyatlidir.

Aktsiyada respublikamizning turli hududlaridan tashrif buyurgan oliy taʼlim muassasalari talabalari faol ishtirok etdilar. Jumladan, Andijon davlat universiteti, Namangan davlat universiteti, Fargʻona davlat universiteti, Guliston davlat universiteti, Jizzax davlat pedagogika universiteti, Chirchiq davlat pedagogika universiteti, Samarqand davlat universiteti, Navoiy davlat universiteti, Buxoro davlat universiteti, Qarshi davlat universiteti, Termiz davlat universiteti, Urganch davlat universiteti, Oʻzbekiston Milliy universiteti hamda Qoraqalpogʻiston Respublikasidagi oliy taʼlim muassasalarida ekologiya va turizm yoʻnalishlarida tahsil olayotgan talabalar ishtiroki tadbirga yanada keng qamrov va mazmun bagʻishladi.

Yoshlar dastlab tarix nafasi ufurib turgan Chilpiq qalʼasi bilan yaqindan tanishdilar. Ming yillik tarixni oʻz bagʻrida saqlab kelayotgan ushbu muqaddas maskan ularda katta taassurot uygʻotdi. Qadimiy devorlar, afsonalar bilan uygʻunlashgan tarixiy manzara yoshlarni ajdodlar merosi haqida chuqurroq oʻylashga undadi. Ayniqsa, Orolboʻyi hududining boy tarixi, madaniyati va tabiiy salohiyati haqidagi maʼlumotlar talabalarning ilmiy va maʼnaviy dunyoqarashini yanada kengaytirdi.

Tadbir davomida ekologik muammolar, xususan, Orol dengizi fojiasining bugungi avlod zimmasiga yuklayotgan masʼuliyati haqida ham fikr almashildi. Yoshlar tabiatni asrash, ekologik madaniyatni yuksaltirish va yashil turmush tarzini targʻib qilish borasida oʻz tashabbuslarini ilgari surdilar. “Biz Orol bilan birgamiz” eko-marafoni esa tabiat va inson taqdiri bir-biriga chambarchas bogʻliq ekanini yana bir bor namoyon etdi.

Bugungi kunda turizm nafaqat iqtisodiy soha, balki xalqlarni yaqinlashtiruvchi, milliy qadriyatlarni dunyoga tanituvchi muhim maʼnaviy koʻprik vazifasini bajarmoqda. Ayniqsa, ekologik va tarixiy turizm yoʻnalishlarini rivojlantirish orqali hududlarning tabiiy va madaniy boyliklarini asrab-avaylash, ularni kelajak avlodga yetkazish imkoniyati kengaymoqda. Orolboʻyi hududlarida oʻtkazilayotgan bunday tadbirlar esa yoshlarni yurt tarixiga befarq boʻlmaslikka, tabiatni sevishga va ichki turizmni rivojlantirishga chorlaydi.

Chilpiq qalʼasida tashkil etilgan ushbu ekologik aktsiya yoshlar uchun oddiy sayohat emas, balki katta hayotiy saboq boʻldi. Ular nafaqat tarixiy obidalarni koʻrdilar, balki ekologik muammolarning asl mohiyatini his etdilar, tabiat oldidagi inson masʼuliyatini chuqur angladilar. Bu esa ertangi kunning ekologik ongli, vatanparvar va tashabbuskor yoshlarini tarbiyalashda muhim ahamiyat kasb etadi.

Shubhasiz, ana shunday maʼnaviy-maʼrifiy va ekologik loyihalar yoshlarning dunyoqarashini boyitadi, ularni ona yurtga muhabbat ruhida tarbiyalaydi hamda Orolboʻyi hududining turistik salohiyatini keng targʻib qilishga xizmat qiladi.

Charos Arslonova, tuman hokimligining Axborot xizmati rahbari.