“Орол денгизига поезд” — ёшлар қалбида экологик тафаккур ва туризм руҳини уйғотган маънавий сафар

Амударё туманидаги қадимий маскан — Чилпиқ қалъаси яна бир муҳим маънавий-маърифий тадбирга мезбонлик қилди. Бу ерда “Орол денгизига поезд” ёшлар экологик акцияси ҳамда “Биз Орол билан биргамиз” эко-марафони юқори руҳ ва катта таассуротларга бой тарзда ташкил этилди. Мазкур тадбир нафақат экологик муаммоларга эътибор қаратиш, балки ёшлар қалбида табиатга меҳр, тарихий меросга ҳурмат ва туризм маданиятини шакллантиришга хизмат қилгани билан аҳамиятлидир.

Акцияда республикамизнинг турли ҳудудларидан ташриф буюрган олий таълим муассасалари талабалари фаол иштирок этдилар. Жумладан, Андижон давлат университети, Наманган давлат университети, Фарғона давлат университети, Гулистон давлат университети, Жиззах давлат педагогика университети, Чирчиқ давлат педагогика университети, Самарқанд давлат университети, Навоий давлат университети, Бухоро давлат университети, Қарши давлат университети, Термиз давлат университети, Урганч давлат университети, Ўзбекистон Миллий университети ҳамда Қорақалпоғистон Республикасидаги олий таълим муассасаларида экология ва туризм йўналишларида таҳсил олаётган талабалар иштироки тадбирга янада кенг қамров ва мазмун бағишлади.

Ёшлар дастлаб тарих нафаси уфуриб турган Чилпиқ қалъаси билан яқиндан танишдилар. Минг йиллик тарихни ўз бағрида сақлаб келаётган ушбу муқаддас маскан уларда катта таассурот уйғотди. Қадимий деворлар, афсоналар билан уйғунлашган тарихий манзара ёшларни аждодлар мероси ҳақида чуқурроқ ўйлашга ундади. Айниқса, Оролбўйи ҳудудининг бой тарихи, маданияти ва табиий салоҳияти ҳақидаги маълумотлар талабаларнинг илмий ва маънавий дунёқарашини янада кенгайтирди.

Тадбир давомида экологик муаммолар, хусусан, Орол денгизи фожиасининг бугунги авлод зиммасига юклаётган масъулияти ҳақида ҳам фикр алмашилди. Ёшлар табиатни асраш, экологик маданиятни юксалтириш ва яшил турмуш тарзини тарғиб қилиш борасида ўз ташаббусларини илгари сурдилар. “Биз Орол билан биргамиз” эко-марафони эса табиат ва инсон тақдири бир-бирига чамбарчас боғлиқ эканини яна бир бор намоён этди.

Бугунги кунда туризм нафақат иқтисодий соҳа, балки халқларни яқинлаштирувчи, миллий қадриятларни дунёга танитувчи муҳим маънавий кўприк вазифасини бажармоқда. Айниқса, экологик ва тарихий туризм йўналишларини ривожлантириш орқали ҳудудларнинг табиий ва маданий бойликларини асраб-авайлаш, уларни келажак авлодга етказиш имконияти кенгаймоқда. Оролбўйи ҳудудларида ўтказилаётган бундай тадбирлар эса ёшларни юрт тарихига бефарқ бўлмасликка, табиатни севишга ва ички туризмни ривожлантиришга чорлайди.

Чилпиқ қалъасида ташкил этилган ушбу экологик акция ёшлар учун оддий саёҳат эмас, балки катта ҳаётий сабоқ бўлди. Улар нафақат тарихий обидаларни кўрдилар, балки экологик муаммоларнинг асл моҳиятини ҳис этдилар, табиат олдидаги инсон масъулиятини чуқур англадилар. Бу эса эртанги куннинг экологик онгли, ватанпарвар ва ташаббускор ёшларини тарбиялашда муҳим аҳамият касб этади.

Шубҳасиз, ана шундай маънавий-маърифий ва экологик лойиҳалар ёшларнинг дунёқарашини бойитади, уларни она юртга муҳаббат руҳида тарбиялайди ҳамда Оролбўйи ҳудудининг туристик салоҳиятини кенг тарғиб қилишга хизмат қилади.

Чарос Арслонова, туман ҳокимлигининг Ахборот хизмати раҳбари.