Қипчоқда аҳолига пенсия тизимидаги ўзгаришларни тушунтиришга бағишланган тадбир бўлиб ўтди

Кекса авлод вакилларини ҳар томонлама қўллаб-қувватлаш давлатимизнинг диққат-эътиборидадир. 2018 йилнинг 12 декабрида қабул қилинган Ўзбекистон Pеспубликаси Президентининг “Фуқароларнинг пенсия таъминоти тизими самарадорлигини ошириш ва пенсионерларни ижтимоий қўллаб-қувватлашни кучайтиришга оид қўшимча чора-тадбирлар тўғрисида”ги Фармони ҳам шу мақсадга қаратилганлиги билан аҳамиятлидир.

Аввало фармон моҳиятига эътиборингизни қаратсак: 2019 йилнинг 1 январь ҳолатига туманимизда жами 20970 нафар пенсия ва нафақа олувчилар бўлиб, шундан ёшга доир пенсия олувчилар 15615 нафарни, ногиронлик пенсия олувчилар 2360 нафар, боқувчисини йўқотганлик пенсия олувчилар 970 нафар, ижтимоий нафақа олувчилар 2025 нафарни ташкил этади ва жорий йил январь ойи учун ишламайдиган пенсия ва нафақа олувчилар учун ойлик талаб миқдори жами 11. 1 млрд. сўмни ташкил этади.

Айни кунда туманимиз бўйича 263 нафардан зиёдроқ ишловчи пенсионерларнинг фаолият тоифасига кўра, 64 нафаригагина пенсиялари тўлиқ тўланар, қолганлари эса пенсиянинг ярмини, яъни 50 фоизини олиб келишаётган эди.

Юқоридаги таъкидлаган Фармонга мувофиқ, жорий йилнинг 1 январидан бошлаб, барча тоифадаги ишловчи пенсионерларга пенсиясини тўлиқ тўлаш назарда тутилган. Бу ўз навбатида кекса ёшдаги фуқароларга пенсияга чиққанидан кейин ҳам мамлакатимизнинг жамоат ва ижтимоий-иқтисодий ҳаётида тенг иштирокини таъминлайди, ёшларга ўзларининг касбий маҳорати, меҳнат тажрибаларини сингдиришга имконият яратади.

Фармонда юқори иш ҳақи ҳисобидан пенсияга чиққан фуқароларимизга муносиб пенсия миқдорини белгилаш учун пенсияни ҳисоб-китоб қилишда иш ҳақининг максимал миқдорини энг кам ойлик иш ҳақининг 8 баробаридан 10 баробаригача оширилиши ҳам белгиланган.

Амалдаги тартибга асосан эса юқори миқдорда ойлик иш ҳақи олувчи фуқароларга пенсияни ҳисоблашда энг кам ойлик иш ҳақининг 8 баробаридан зиёди инобатга олинмай келган эди.

Шуни таъкидлаш керакки, янги Фармон энди пенсияга чиқувчиларга эмас, балки ушбу тоифага тушувчи ҳозиргача пенсия олиб турган пенсионерларга ҳам татбиқ этилади ва пенсиялари қайта ҳисоблаб чиқилиб, 2019 йил январь ойи пенсияси янги миқдорда тўланади.

Шу йилнинг 1 январидан пенсия тизимига жорий этилаётган ўзгаришлардан аҳолини хабардор қилиш мақсадида 18 январь куни Қипчоқ овул фуқаролар йиғинида Бюджетдан ташқари пенсия жамғармаси туман бўлими бошлиғи ўринбосари Зокир Халилаев, пенсия ва нафақаларни тайинлаш гуруҳи раҳбари Акрам Аҳмедовлар аҳоли билан учрашув ўтказдилар. Мавзуга оид маърузалардан сўнг, аҳолидан тушган саволларга жавоблар қайтарди.

Ойгул PАЖАБОВА.