Qipchoqda aholiga pensiya tizimidagi oʻzgarishlarni tushuntirishga bagʻishlangan tadbir boʻlib oʻtdi

Keksa avlod vakillarini har tomonlama qoʻllab-quvvatlash davlatimizning diqqat-eʼtiboridadir. 2018-yilning 12-dekabrida qabul qilingan Oʻzbekiston Pespublikasi Prezidentining “Fuqarolarning pensiya taʼminoti tizimi samaradorligini oshirish va pensionerlarni ijtimoiy qoʻllab-quvvatlashni kuchaytirishga oid qoʻshimcha chora-tadbirlar toʻgʻrisida”gi Farmoni ham shu maqsadga qaratilganligi bilan ahamiyatlidir.

Avvalo farmon mohiyatiga eʼtiboringizni qaratsak: 2019-yilning 1-yanvar holatiga tumanimizda jami 20970 nafar pensiya va nafaqa oluvchilar boʻlib, shundan yoshga doir pensiya oluvchilar 15615 nafarni, nogironlik pensiya oluvchilar 2360 nafar, boquvchisini yoʻqotganlik pensiya oluvchilar 970 nafar, ijtimoiy nafaqa oluvchilar 2025 nafarni tashkil etadi va joriy yil yanvar oyi uchun ishlamaydigan pensiya va nafaqa oluvchilar uchun oylik talab miqdori jami 11. 1 mlrd. soʻmni tashkil etadi.

Ayni kunda tumanimiz boʻyicha 263 nafardan ziyodroq ishlovchi pensionerlarning faoliyat toifasiga koʻra, 64 nafarigagina pensiyalari toʻliq toʻlanar, qolganlari esa pensiyaning yarmini, yaʼni 50 foizini olib kelishayotgan edi.

Yuqoridagi taʼkidlagan Farmonga muvofiq, joriy yilning 1-yanvaridan boshlab, barcha toifadagi ishlovchi pensionerlarga pensiyasini toʻliq toʻlash nazarda tutilgan. Bu oʻz navbatida keksa yoshdagi fuqarolarga pensiyaga chiqqanidan keyin ham mamlakatimizning jamoat va ijtimoiy-iqtisodiy hayotida teng ishtirokini taʼminlaydi, yoshlarga oʻzlarining kasbiy mahorati, mehnat tajribalarini singdirishga imkoniyat yaratadi.

Farmonda yuqori ish haqi hisobidan pensiyaga chiqqan fuqarolarimizga munosib pensiya miqdorini belgilash uchun pensiyani hisob-kitob qilishda ish haqining maksimal miqdorini eng kam oylik ish haqining 8 barobaridan 10 barobarigacha oshirilishi ham belgilangan.

Amaldagi tartibga asosan esa yuqori miqdorda oylik ish haqi oluvchi fuqarolarga pensiyani hisoblashda eng kam oylik ish haqining 8 barobaridan ziyodi inobatga olinmay kelgan edi.

Shuni taʼkidlash kerakki, yangi Farmon endi pensiyaga chiquvchilarga emas, balki ushbu toifaga tushuvchi hozirgacha pensiya olib turgan pensionerlarga ham tatbiq etiladi va pensiyalari qayta hisoblab chiqilib, 2019-yil yanvar oyi pensiyasi yangi miqdorda toʻlanadi.

Shu yilning 1-yanvaridan pensiya tizimiga joriy etilayotgan oʻzgarishlardan aholini xabardor qilish maqsadida 18-yanvar kuni Qipchoq ovul fuqarolar yigʻinida Byudjetdan tashqari pensiya jamgʻarmasi tuman boʻlimi boshligʻi oʻrinbosari Zokir Xalilayev, pensiya va nafaqalarni tayinlash guruhi rahbari Akram Ahmedovlar aholi bilan uchrashuv oʻtkazdilar. Mavzuga oid maʼruzalardan soʻng, aholidan tushgan savollarga javoblar qaytardi.

Oygul PAJABOVA.