ШУ ЮРТ – АЗИЗ ВАТАНИМИЗ
Ўзбекистонда асрлар оша тотув ва ҳамжиҳат яшаб келаётган барча миллат вакиллари бу диёрни ўз она Ватани деб билади. Ўзини шу Ватанга бағишлаб, юрт равнақи учун куч-ғайратини фидо қилади.
Туманимизда ҳам қозоқ, туркман, рус, корейс каби миллат вакиллари оилалари дўст-иноқ бўлиб яшаб, халқ хўжалигининг турли соҳаларида меҳнат қилиб келишмоқда. Ота-боболари қозоғистонлик бўлган Соатбой оға Қутлимуродов ҳам умр йўлдоши Шарофат опа Сафарбоева билан шу эл хизматида бўлиб, фарзандларини ҳам юрт корига ярайдиган инсонлар қилиб вояга етказишди.
– Оқтўбедан келиб, шу ерни Ватан тутган ота-боболаримиз деҳқончилик ва чорвачилик билан шуғулланишган, – дейди Соатбой оға Қутлимуродов. – Биз беш оға-ини эдик. Оғаларим ҳаммаси қурувчилик соҳасини танлади. Катта оғам Соғинбой Исмоиловнинг тумандаги кўпгина ижтимоий ва маиший хизмат кўрсатиш муассасалари бинолари қурилишига меҳнати сингганлигини фахр билан айта оламан. Мен ҳам оғаларимга ҳавас қилиб, шу касбни танладим ва ишни прорабликдан бошладим.
Тумандаги “Амударётутинув” масъулияти чекланган жамиятида тадбиркорлик қилаётган Соатбой Қутлимуродов кўп йиллар умумий овқатланиш корхонасида директорлик қилди. Кейинчалик нон комбинати бўлим мудирлигига тайинланди.
Истиқлол шарофати билан тадбиркорликка кенг имкон берилганидан сўнг, ўз фаолиятини тадбиркорлик соҳасида давом эттирди. Оғанинг умр йўлдоши Шарофат опа Сафарбоева эса кўп йиллар савдо соҳасида меҳнат қилиб, ҳозирги кунда нафақа гаштини сурмоқда. Улар биргаликда 5 нафар фарзандни комил инсонлар қилиб тарбиялашди. Ҳозирги кунда катта фарзанди Элдор Исмоилов – тадбиркор, қизлари Зина ва Дина – ўқитувчи, Илёс – туман Жиноий ишлар бўйича судида девонхона бўлими мудири, Ихлос эса туман Тиббиёт бирлашмасида инженер-қурувчи бўлиб, ота-оналари каби эл-юртга ва жамиятга наф келтиришмоқда.
– Бу ер – бизнинг она Ватанимиз. Шу юртда киндик қонимиз томган. Тўй-маъракамиз, урф-одатимиз, тилимиз ва динимиз ҳам бир, қон-қариндош бўлиб яшаётган халқимизга ва бизга макон бўлган бу юртга меҳру-муҳаббатимиз чексиз. Шу боис туманимиз, мамлакатимиз равнақи учун бор имкониятимизни ишга соламиз. Мамлакатимиз мустақиллигининг 27 йиллиги байрамини биз ҳам шоду хуррамликда қарши олаяпмиз, – дейди фахр билан Соатбой оға Қутлимуродов.
«Фаровон» маҳалласида Соатбой оға ва Шарофат опалар оиласи фарзандлари, келин-у куёвлари, неваралари ардоғида тинч-тотув ҳаёт кечираётган оилалардан бири ҳисобланади. Бу оиладаги меҳр-оқибат, тотувлик, саранжом-саришталик, файз-у баракани ҳар қанча ибрат қилиб кўрсатса арзийди.
О.ХУДОЙБЕРГАНОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
