Мустақиллик — миллатнинг шаъни, халқнинг орзуси, Ватанимизнинг энг улуғ ва энг азиз неъмати

Ҳар йили 1 сентябрь санасида юртимизда қутлуғ байрам — Мустақиллик куни кенг нишонланади. Бу кун — халқимизнинг асрлар давомида орзу қилган, курашиб, меҳнат қилиб қўлга киритган энг буюк ютуғи, қалбимизда фахр ва ғурур уйғотувчи муқаддас сана.

Бутун юртимиз бўйлаб бўлгани каби ушбу муҳим сана муносабати билан Амударё туманининг Вахум аҳоли пунктидаги болалар ўйингоҳида ҳам байрам тадбири ўтказилди. “Ватан учун, миллат учун, халқ учун” шиори остида бўлиб ўтган тантанада юртдошларимиз истиқлол шукуҳини ҳис этдилар.

Байрам муносабати билан халқимиз учун миллий қадриятларимиз рамзи бўлган ош тортилиши эса байрамнинг руҳига янада файз бағишлади. Ўзбекона меҳмондўстлик, меҳр-оқибат ва биродарлик рамзи сифатида ёзилган дастурхон атрофида юртдошларимиз бугунги дориломон кунларга шукрона айтиб дуога қўл очдилар.

Байрам тантанасида туман ҳокими Собир Хўжаметов иштирок этиб, юртдошларимизни қутлуғ сана билан самимий табриклади, истиқлол йилларида қўлга киритилган ютуқларни тилга олди. Бугун бизнинг ҳаётимиз тинч, эртамиз порлоқ, имкониятларимиз кенг эканлигининг бари истиқлол шарофати эканини алоҳида таъкидлади.

Туман ҳокими ўз нутқида таъкидлаганидек, мустақиллик халқимизнинг азалий орзуси, эркин ва фаровон ҳаёт сари интилиши натижасида қўлга киритилган буюк неъматидир. Бу неъмат туфайли биз ўз давлатимизни, ўз келажагимизни ўз қўлимиз билан барпо этмоқдамиз. Бугун дунёнинг турли бурчакларида, атрофимизда содир бўлаётган турли низолар, қарама-қаршиликлар ва келишмовчиликлар барчамизни янада огоҳ ва ҳушёр бўлиб, мустақиллигимизни, давлатимизнинг ҳудудий яхлитлигини кўз қорачиғидай асрашга ундамоқда.

Сабаби, айнан мустақиллигимиз шарофати билан Ватанимиз жаҳон ҳамжамиятидан муносиб ўрин эгаллаб, юртимизда ҳуқуқий демократик давлат ва эркин фуқаролик жамиятини қуриш имконига эга бўлдик. Сўнги йилларда юртимизда Муҳтарам Президентимиз бошчилигида барча соҳаларда изчил ислоҳотлар амалга оширилмоқда. Хусусан, туманимизда ҳам иқтисодий, ижтимоий, маданий жабҳаларда салмоқли натижалар қўлга киритилди.

Хусусан, жорий йилнинг ўтган 8 ойи мобайнида умумий қиймати 25,2 млрд. сўмлик 15 та лойиҳалар ишга туширилди ва 372 та янги иш ўринлари яратилган. Ушбу янги лойиҳалар йилига 12 млрд. 417 млн. сўмлик маҳсулотлар ишлаб чиқариш ва хизматлар кўрсатиш қувватига эга.

Шунингдек, умумий қиймати 12 млн. АҚШ долларига тенг бўлган, шундан 9,4 млн. АҚШ доллари миқдорида саноат маҳсулотлари ва 2,6 млн. АҚШ доллари миқдорида мева-сабзавот маҳсулотлари экспорт қилинишига эришилган. Туманда йил бошида камбағаллик даражаси 11,4 фоизни ташкил қилган бўлса, 1 июль ҳолатига бу кўрсаткич 6,2 фоизни ташкил қилади.

Қолаверса, биргина 2025 йил давомида туман бўйича амалга оширилаётган қурилиш ишларининг умумий қиймати 800 млрд. сўмдан ортиқроқни ташкил этади. Қорақалпоғистон Республикаси Вазирлар Кенгашининг тегишли қарорлари асосида туман ҳудудидаги 26 та маҳаллаларда жами 109,1 км узунликдаги ички тупроқ йўлларини таъмирлаш ишлари олиб борилди. Бу каби бунёдкорликлар, ўзгаришлар ва янгиланишларнинг замирида “Инсон қадри учун, инсон бахти учун” деган эзгу тамойил мужассамдир.

Байрам тадбири давомида туман Маданият бўлими ижодкорлари томонидан намойиш этилган концерт дастури халқимизга юқори кайфият ва мустақиллик шукуҳини улашди. Ижро қилинган куй ва қўшиқлар ҳаммани ўзига ром қилди. Ҳар бир куй, ҳар бир қўшиқ юракларда ғурур уйғотиб, истиқлолнинг беқиёс қадрини янада чуқур ҳис эттирди.

Таъкидлаш жоизки, мустақиллик йилларида Ўзбекистон халқининг турмуш тарзи тубдан ўзгарди, ҳаётимиз янгиланди. Илм-фан, таълим, иқтисодиёт, қишлоқ хўжалиги, спорт ва маданият — барча соҳаларда бунёдкорлик, янгиланиш жараёнлари юртимизни дунёга танитмоқда. Бугун халқимиз ўз меҳнати, фидойилиги ва ҳамжиҳатлиги билан тараққиёт йўлида дадил одимламоқда.

Байрамона шодиёналар давомида юртдошларимиз қалбида Ватанга меҳр, истиқлолга чексиз садоқат, эртанги кунга ишонч туйғулари янада мустаҳкамланди. Зеро, Мустақиллик — бу бизнинг эркин нафасимиз, миллий ғуруримиз ва энг буюк бахтимиздир.

Чарос Арслонова, туман ҳокимлигининг Ахборот хизмати раҳбари.