Mustaqillik — millatning shaʼni, xalqning orzusi, Vatanimizning eng ulugʻ va eng aziz neʼmati

Har yili 1-sentyabr sanasida yurtimizda qutlugʻ bayram — Mustaqillik kuni keng nishonlanadi. Bu kun — xalqimizning asrlar davomida orzu qilgan, kurashib, mehnat qilib qoʻlga kiritgan eng buyuk yutugʻi, qalbimizda faxr va gʻurur uygʻotuvchi muqaddas sana.

Butun yurtimiz boʻylab boʻlgani kabi ushbu muhim sana munosabati bilan Amudaryo tumanining Vaxum aholi punktidagi bolalar oʻyingohida ham bayram tadbiri oʻtkazildi. “Vatan uchun, millat uchun, xalq uchun” shiori ostida boʻlib oʻtgan tantanada yurtdoshlarimiz istiqlol shukuhini his etdilar.

Bayram munosabati bilan xalqimiz uchun milliy qadriyatlarimiz ramzi boʻlgan osh tortilishi esa bayramning ruhiga yanada fayz bagʻishladi. Oʻzbekona mehmondoʻstlik, mehr-oqibat va birodarlik ramzi sifatida yozilgan dasturxon atrofida yurtdoshlarimiz bugungi dorilomon kunlarga shukrona aytib duoga qoʻl ochdilar.

Bayram tantanasida tuman hokimi Sobir Xoʻjametov ishtirok etib, yurtdoshlarimizni qutlugʻ sana bilan samimiy tabrikladi, istiqlol yillarida qoʻlga kiritilgan yutuqlarni tilga oldi. Bugun bizning hayotimiz tinch, ertamiz porloq, imkoniyatlarimiz keng ekanligining bari istiqlol sharofati ekanini alohida taʼkidladi.

Tuman hokimi oʻz nutqida taʼkidlaganidek, mustaqillik xalqimizning azaliy orzusi, erkin va farovon hayot sari intilishi natijasida qoʻlga kiritilgan buyuk neʼmatidir. Bu neʼmat tufayli biz oʻz davlatimizni, oʻz kelajagimizni oʻz qoʻlimiz bilan barpo etmoqdamiz. Bugun dunyoning turli burchaklarida, atrofimizda sodir boʻlayotgan turli nizolar, qarama-qarshiliklar va kelishmovchiliklar barchamizni yanada ogoh va hushyor boʻlib, mustaqilligimizni, davlatimizning hududiy yaxlitligini koʻz qorachigʻiday asrashga undamoqda.

Sababi, aynan mustaqilligimiz sharofati bilan Vatanimiz jahon hamjamiyatidan munosib oʻrin egallab, yurtimizda huquqiy demokratik davlat va erkin fuqarolik jamiyatini qurish imkoniga ega boʻldik. Soʻngi yillarda yurtimizda Muhtaram Prezidentimiz boshchiligida barcha sohalarda izchil islohotlar amalga oshirilmoqda. Xususan, tumanimizda ham iqtisodiy, ijtimoiy, madaniy jabhalarda salmoqli natijalar qoʻlga kiritildi.

Xususan, joriy yilning oʻtgan 8 oyi mobaynida umumiy qiymati 25,2 mlrd. soʻmlik 15 ta loyihalar ishga tushirildi va 372 ta yangi ish oʻrinlari yaratilgan. Ushbu yangi loyihalar yiliga 12 mlrd. 417 mln. soʻmlik mahsulotlar ishlab chiqarish va xizmatlar koʻrsatish quvvatiga ega.

Shuningdek, umumiy qiymati 12 mln. AQSh dollariga teng boʻlgan, shundan 9,4 mln. AQSh dollari miqdorida sanoat mahsulotlari va 2,6 mln. AQSh dollari miqdorida meva-sabzavot mahsulotlari eksport qilinishiga erishilgan. Tumanda yil boshida kambagʻallik darajasi 11,4 foizni tashkil qilgan boʻlsa, 1-iyul holatiga bu koʻrsatkich 6,2 foizni tashkil qiladi.

Qolaversa, birgina 2025-yil davomida tuman boʻyicha amalga oshirilayotgan qurilish ishlarining umumiy qiymati 800 mlrd. soʻmdan ortiqroqni tashkil etadi. Qoraqalpogʻiston Respublikasi Vazirlar Kengashining tegishli qarorlari asosida tuman hududidagi 26 ta mahallalarda jami 109,1 km uzunlikdagi ichki tuproq yoʻllarini taʼmirlash ishlari olib borildi. Bu kabi bunyodkorliklar, oʻzgarishlar va yangilanishlarning zamirida “Inson qadri uchun, inson baxti uchun” degan ezgu tamoyil mujassamdir.

Bayram tadbiri davomida tuman Madaniyat boʻlimi ijodkorlari tomonidan namoyish etilgan kontsert dasturi xalqimizga yuqori kayfiyat va mustaqillik shukuhini ulashdi. Ijro qilingan kuy va qoʻshiqlar hammani oʻziga rom qildi. Har bir kuy, har bir qoʻshiq yuraklarda gʻurur uygʻotib, istiqlolning beqiyos qadrini yanada chuqur his ettirdi.

Taʼkidlash joizki, mustaqillik yillarida Oʻzbekiston xalqining turmush tarzi tubdan oʻzgardi, hayotimiz yangilandi. Ilm-fan, taʼlim, iqtisodiyot, qishloq xoʻjaligi, sport va madaniyat — barcha sohalarda bunyodkorlik, yangilanish jarayonlari yurtimizni dunyoga tanitmoqda. Bugun xalqimiz oʻz mehnati, fidoyiligi va hamjihatligi bilan taraqqiyot yoʻlida dadil odimlamoqda.

Bayramona shodiyonalar davomida yurtdoshlarimiz qalbida Vatanga mehr, istiqlolga cheksiz sadoqat, ertangi kunga ishonch tuygʻulari yanada mustahkamlandi. Zero, Mustaqillik — bu bizning erkin nafasimiz, milliy gʻururimiz va eng buyuk baxtimizdir.

Charos Arslonova, tuman hokimligining Axborot xizmati rahbari.