ЎҚИТУВЧИЛАРНИНГ АНЪАНАВИЙ АВГУСТ КЕНГАШИ БЎЛИБ ЎТДИ
Ёш авлодга таълим-тарбия беришдек муқаддас ва масъулиятли касб эгалари учун ҳаяжонли ва интиқ кутилган дақиқалар яқин. Ёз бўйи ҳувиллаб ётган мактаблар яна ўқувчи-ёшларни ўз бағрига чорламоқда. Ҳадемай янги ўқув йили бошланади.
Халқ таълими тизими ходимлари ҳар йили янги ўқув йили бошланиши олдидан кенгашиб, ўтган ўқув йилидаги эришилган натижаларни сарҳисоб қилиб, янги ўқув йили учун режалар тузиб олишади.
Жорий йил 26 августда анъанавий Август кенгаши «Чойкўл» овулидаги Маданият марказида ўтказилди.
Анжуманда туман ҳокимлиги масъул ходимлари, жамоат ташкилотлари раҳбарлари, мактабларнинг директорлари, директор ўринбосарлари, ўқитувчилар иштирок этдилар.
Ўқитувчиларнинг анъанавий Август кенгашини туман Халқ таълими бўлими мудири О.Йўлдошов очди. Қорақалпоғистон Республикаси Халқ таълими вазири А.Аяпов анжуман иштирокчиларини халқ таълими тизими ходимлари учун туб бурилишлар даврини бошлаб бераётган 2018-2019 ўқув йили бошланиши ва мустақиллик байрами билан қизғин муборакбод этди, педагог ходимлар олдида турган ёшларни Ватанга муҳаббат, халқимизнинг кўп асрлик урф-одат, анъаналарига ҳурмат руҳида тарбиялаш, улар онгига юксак одоб-ахлоқ фазилатларини чуқур сингдириш, замонавий илмни пухта эгаллашларига эришиш борасидаги вазифаларга кенг тўхталди.
Туман Халқ таълими бўлими мудири Отабек Йўлдошов 2017-2018 ўқув йили якунлари, эришилган ютуқлар, йўл қўйилган камчиликлар ва келгусида тизим ходимлари олдида турган улуғвор вазифалар ҳақида маъруза қилди.
Шундан сўнг, туман ҳокими Султонбой Йўлдашев, жорий йилда олийгоҳни тугатиб, 26-сонли мактабда ўқитувчилик фаолиятини бошлаётган Нилуфар Ражаббоева, 40-сонли мактаб директори Санобар Хўжамуродова, 13-сонли мактаб директори Муродбой Ҳайбуллаевлар йиғилганларни янги ўқув йили бошланиши ва истиқлолимизнинг 27 йиллиги билан табрикладилар.
Анжуманда 2017-2018 ўқув йилида ўқувчиларга таълим-тарбия беришда улкан ютуқларга эришган 43 нафар педагог-ходимлар Қорақалпоғистон Республикаси Халқ таълими вазирлиги, туман ҳокимлиги ва туман Халқ таълими бўлими томонидан Фахрий ёрлиқлар, эсдалик совғалари билан тақдирланди.
Ўқитувчиларнинг анъанавий Август кенгашида бошланаётган ўқув йили учун режалар белгилаб олинди.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
