ҲОФИЗНИНГ ЎҒЛИ... МАТЕМАТИК

Одатда бирор ютуқларга эришаётган ёшлар ҳақида эшитганимизда, албатта, кимнинг ўғли ё қизи, дея сўраймиз. Унинг ютуқларини дарров отаси ё онасинингми, бирор яқинларининг ҳаётда эришган натижаларига боғлагимиз келади. Албатта, авлодлар орасидаги ирсий боғлиқликларни инкор этиб бўлмайди. Бироқ Амударё туманидагина эмас, бутун Ўзбекистонимиздаги санъат ихлосмандларини ўзининг жўшқин ва мафтункор овозда куйлаган турли тиллардаги қўшиқлари билан хушнуд этиб келаётган иқтидорли ижодкор Тўлибой Йўлдошевнинг ўғли Шоҳруҳ Ўрозматов санъатга эмас, аниқ фанларга ихлос қўйди. Бу борада эришаётган натижалари яқинларини ҳам, устозларини ҳам чексиз қувонтирмоқда.

Шоҳруҳда математика фанига ихлос 4-сонли мактабда ўқиб юрган вақтларида уйғонди. Буни мактаб ўқувчиларига мусиқа фанидан дарс берувчи отаси Тўлибой Йўлдошев, бошланғич таълим ўқитувчиси – онаси Барно Раҳимовалар қўллаб-қувватлашди, дарсдан ташқари ҳам шуғулланишига шароит яратиб беришди.

Унинг ўқувчилик давридаги интилишлари Манғит қишлоқ хўжалик касб-ҳунар коллежига ўқишга кирганидан сўнг келажак мақсадларига айланди. Бу ерда у тажрибали ўқитувчи Азимбой Сафарбоевдан математика фани сир-асрорларини чуқур ўргана борди, эринмай қўшимча машғулотларга қатнади. Меҳнатлари эса изсиз кетмади. 2016 йилда фанлар олимпиадасида туманда, Қорақалпоғистонда ғолиблар сафидан жой олди. Халқаро математика олимпиадасида қатнашиб, юқори натижаларни қайд этди.

Шоҳруҳ Ўрозматовнинг тиришқоқлик билан эгаллаган пухта билими орзулари йўлида ўзига қанот бўлди. 2016 йилда коллежни тамомлаб, Нукус Давлат педагогика институтининг математика-информатика факультетига ҳужжат топшириб, тест синовларида энг юқори балл билан талабаликка қабул қилинганларнинг бири бўлди.

У айни кунда олийгоҳнинг иккинчи босқичида, ҳамма фанлардан фақат аъло баҳоларга ўқияпти. Биринчи босқичда ўқиши давомида олийгоҳ миқёсида ўтказилган фанлар олимпиадасида математика фанидан ғолибликни қўлга киритиб, мамлакат босқичида ҳам муваффақиятли иштирок этди.

Иқтидорли йигитнинг қизиқишлари кўлами кенг. У бўш вақтларида бадиий асарлар ўқийди, спортнинг кураш тури билан мунтазам шуғулланади. Бу борада мактабда ўқувчилик даврида, талабалик даврида турли мусобақаларда ғолибликка эришиб, мамлакат босқичида ҳам қатнашиш бахтига муяссар бўлди.

– Одатда кундалик дарслардан сўнг бироз дам олиб, овқатланиб, дарсда олган билимларимни мустаҳкамлайман-да кураш билан шуғулланиб, бироз чарчоғимни ёзаман. Кейин яна математика билан шуғулланаман. Бунда менга олийгоҳдаги устозим – катта ўқитувчи Азамат Хўжаниёзовнинг ёрдами айниқса жуда қўл келаяпти.

Бу йилги олимпиадада мамлакат бўйича ғолиб бўлишни ният қилиб, тайёргарлик кўраяпман. Яқинда сонлар назарияси бўйича бир теорема яратдим. Бу ҳақда “Илм ва жамият” журналида мақолам ҳам босилиб чиқди. Энди илмий ишимни чуқурлаштириб давом эттирмоқчиман.

Ёшига нисбатан босиқ, мулоҳазали ва алпқомат Шоҳруҳ Ўрозматов билан суҳбатлашиш, ҳаётда ўз олдига қўйган орзу-ниятлари ҳақидаги сўзларини тинглаш жуда мароқли. Унинг беғубор чеҳрасига қараб, мамлакатимизда ўсиб келаётган ёш авлодга қаратилаётган чексиз ғамхўрликнинг ифодасини кўргандай бўласиз. Беихтиёр “Яратганнинг ўзи сени асрасин”, дегингиз келади.

Туманимизнинг чекка ҳудудларидан бири – Амир Темур номли овулда туғилиб, вояга етган, оддий қишлоқ ўғлонининг иқтидори янада юксалиб, илм-фан соҳасида кўпгина ютуқларга эришишини тилаб қоламиз.