HOFIZNING OʻGʻLI... MATEMATIK

Odatda biror yutuqlarga erishayotgan yoshlar haqida eshitganimizda, albatta, kimning oʻgʻli yo qizi, deya soʻraymiz. Uning yutuqlarini darrov otasi yo onasiningmi, biror yaqinlarining hayotda erishgan natijalariga bogʻlagimiz keladi. Albatta, avlodlar orasidagi irsiy bogʻliqliklarni inkor etib boʻlmaydi. Biroq Amudaryo tumanidagina emas, butun Oʻzbekistonimizdagi sanʼat ixlosmandlarini oʻzining joʻshqin va maftunkor ovozda kuylagan turli tillardagi qoʻshiqlari bilan xushnud etib kelayotgan iqtidorli ijodkor Toʻliboy Yoʻldoshevning oʻgʻli Shohruh Oʻrozmatov sanʼatga emas, aniq fanlarga ixlos qoʻydi. Bu borada erishayotgan natijalari yaqinlarini ham, ustozlarini ham cheksiz quvontirmoqda.

Shohruhda matematika faniga ixlos 4-sonli maktabda oʻqib yurgan vaqtlarida uygʻondi. Buni maktab oʻquvchilariga musiqa fanidan dars beruvchi otasi Toʻliboy Yoʻldoshev, boshlangʻich taʼlim oʻqituvchisi – onasi Barno Rahimovalar qoʻllab-quvvatlashdi, darsdan tashqari ham shugʻullanishiga sharoit yaratib berishdi.

Uning oʻquvchilik davridagi intilishlari Mangʻit qishloq xoʻjalik kasb-hunar kollejiga oʻqishga kirganidan soʻng kelajak maqsadlariga aylandi. Bu yerda u tajribali oʻqituvchi Azimboy Safarboyevdan matematika fani sir-asrorlarini chuqur oʻrgana bordi, erinmay qoʻshimcha mashgʻulotlarga qatnadi. Mehnatlari esa izsiz ketmadi. 2016-yilda fanlar olimpiadasida tumanda, Qoraqalpogʻistonda gʻoliblar safidan joy oldi. Xalqaro matematika olimpiadasida qatnashib, yuqori natijalarni qayd etdi.

Shohruh Oʻrozmatovning tirishqoqlik bilan egallagan puxta bilimi orzulari yoʻlida oʻziga qanot boʻldi. 2016-yilda kollejni tamomlab, Nukus Davlat pedagogika institutining matematika-informatika fakultetiga hujjat topshirib, test sinovlarida eng yuqori ball bilan talabalikka qabul qilinganlarning biri boʻldi.

U ayni kunda oliygohning ikkinchi bosqichida, hamma fanlardan faqat aʼlo baholarga oʻqiyapti. Birinchi bosqichda oʻqishi davomida oliygoh miqyosida oʻtkazilgan fanlar olimpiadasida matematika fanidan gʻoliblikni qoʻlga kiritib, mamlakat bosqichida ham muvaffaqiyatli ishtirok etdi.

Iqtidorli yigitning qiziqishlari koʻlami keng. U boʻsh vaqtlarida badiiy asarlar oʻqiydi, sportning kurash turi bilan muntazam shugʻullanadi. Bu borada maktabda oʻquvchilik davrida, talabalik davrida turli musobaqalarda gʻoliblikka erishib, mamlakat bosqichida ham qatnashish baxtiga muyassar boʻldi.

– Odatda kundalik darslardan soʻng biroz dam olib, ovqatlanib, darsda olgan bilimlarimni mustahkamlayman-da kurash bilan shugʻullanib, biroz charchogʻimni yozaman. Keyin yana matematika bilan shugʻullanaman. Bunda menga oliygohdagi ustozim – katta oʻqituvchi Azamat Xoʻjaniyozovning yordami ayniqsa juda qoʻl kelayapti.

Bu yilgi olimpiadada mamlakat boʻyicha gʻolib boʻlishni niyat qilib, tayyorgarlik koʻrayapman. Yaqinda sonlar nazariyasi boʻyicha bir teorema yaratdim. Bu haqda “Ilm va jamiyat” jurnalida maqolam ham bosilib chiqdi. Endi ilmiy ishimni chuqurlashtirib davom ettirmoqchiman.

Yoshiga nisbatan bosiq, mulohazali va alpqomat Shohruh Oʻrozmatov bilan suhbatlashish, hayotda oʻz oldiga qoʻygan orzu-niyatlari haqidagi soʻzlarini tinglash juda maroqli. Uning begʻubor chehrasiga qarab, mamlakatimizda oʻsib kelayotgan yosh avlodga qaratilayotgan cheksiz gʻamxoʻrlikning ifodasini koʻrganday boʻlasiz. Beixtiyor “Yaratganning oʻzi seni asrasin”, degingiz keladi.

Tumanimizning chekka hududlaridan biri – Amir Temur nomli ovulda tugʻilib, voyaga yetgan, oddiy qishloq oʻgʻlonining iqtidori yanada yuksalib, ilm-fan sohasida koʻpgina yutuqlarga erishishini tilab qolamiz.