Urugʻlik kartoshka yetishtirish tizimi ustidan qatʼiy nazorat oʻrnatilgan
Mamlakatimizning oziq-ovqat xavfsizligini taʼminlash, ichki bozorni sifatli va arzon qishloq xoʻjaligi mahsulotlari bilan toʻldirish davlat siyosatining ustuvor yoʻnalishlaridan biri hisoblanadi. Ayniqsa, aholining kundalik isteʼmol ratsionida juda muhim oʻrin tutadigan kartoshka yetishtirish hajmini oshirish hamda bu borada mustahkam urugʻchilik bazasini yaratish bugungi kunning eng dolzarb vazifalaridan biridir.
Shu maqsadda Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspektsiyasining Qoraqalpogʻiston Respublikasi boshqarmasi Amudaryo tuman boʻlimi mutaxassislari tomonidan 2026-yil hosili uchun ekilgan urugʻlik kartoshka maydonlari ustidan qatʼiy nazorat oʻrnatilgan. Ushbu jarayonlar Oʻzbekiston Respublikasi Prezidentining 2025-yil 8-sentyabrdagi “Respublikada kartoshka yetishtirishni koʻpaytirish va urugʻchiligini yanada rivojlantirishga doir qoʻshimcha chora-tadbirlar toʻgʻrisida”gi qarori doirasida tizimli ravishda amalga oshirilmoqda.
Mazkur qarorda qator muhim vazifalar belgilangan. Xususan, urugʻlik kartoshka yetishtirish boʻyicha koʻp yillik boy tajribaga ega boʻlgan subʼektlarni saralab olish, ularning yagona reyestrini yuritish, shuningdek, mini-tuganaklarni ekish orqali yuqori avlodli urugʻlik kartoshka yetishtirish ishlari yoʻlga qoʻyildi. Bundan tashqari, yetishtirilgan yuqori avlodli urugʻlikni xarid qilish, kelgusi yil hosili uchun sifatli saqlash, ekish oldidan tozalash, saralash, fraktsiyalarga ajratib kalibrlash, qadoqlash va raqamli QR kod bilan yorliqlash kabi zamonaviy usullar amaliyotga tatbiq etilyapti. Isteʼmol kartoshkasi yetishtiruvchi subʼektlarga ham aynan shunday yuqori avlodli urugʻliklarni shartnoma asosida yetkazib berish tizimi yaratildi.
Amudaryo tumani misolida tahlil qiladigan boʻlsak, hududda 2026-yilgi hosil uchun jami 250 ta fermer xoʻjaligi tomonidan 300 gektardan ortiq maydonga kartoshka urugʻi ekilgan. Bu jarayonda qatʼiy talablar asosida tanlovdan muvaffaqiyatli oʻtgan 18 ta fermer xoʻjaligi urugʻlik kartoshka yetishtirish huquqini qoʻlga kiritib, 27 gektar maydonda aynan shu yoʻnalishda dehqonchilik qilmoqda. Hozirgi kunda tuman ishchi guruhi tomonidan mazkur maydonlarda dala monitoringi oʻtkazilib, oʻsimlikning nav tozaligini aniqlash maqsadida aprobatsiya koʻriklari izchil olib borilyapti. Inspektsiya xodimlari ushbu koʻriklarning sifatli, xolis va haqqoniy oʻtkazilishini kunlik nazoratga olgan.
Sohadagi nazorat ishlari faqatgina dala monitoringi bilan cheklanmaydi. In vitro laboratoriyalarida yetishtirilgan mini-tuganaklar va dala sharoitida parvarishlanayotgan yuqori avlodli urugʻlik kartoshkaning vegetatsiya davridagi holatini ilmiy kuzatish, viruslardan xoli ekanligini baholash kabi yoʻnalishlarda ham keng koʻlamli ishlar qilinmoqda.
Eng asosiysi, 2026-yildan boshlab respublikada ijobiy ekinboplik xulosasi olinmagan va raqamli QR kod bilan yorliqlanmagan har qanday mahalliy hamda xorijiy urugʻlik kartoshkaning ekilishiga yoʻl qoʻymaslik yuzasidan qatʼiy nazorat oʻrnatiladi. Sifat koʻrsatkichlarining amaldagi standart talablariga mosligi uchun ilmiy muassasalar va tadbirkorlar qonunchilikda belgilangan tartibda shaxsan javobgar hisoblanadi. Shu bilan birga, ilgʻor xorijiy tajribalarni keng joriy etish maqsadida davlat ilmiy muassasalariga chet el korxonalari hamda ularning laboratoriyalari bilan shartnoma asosida hamkorlik qilish huquqi berildi.
Bir soʻz bilan aytganda, kartoshka yetishtirishni koʻpaytirish va uning urugʻchiligini yanada rivojlantirish boʻyicha tasdiqlangan chora-tadbirlar dasturi ijrosi Amudaryo tumanida sifatli tashkil qilinmoqda. Ushbu tizimli saʼy-harakatlar yaqin kelajakda dasturxonlarimiz toʻkinligini va bozorlarimizdagi narx-navo barqarorligini mustahkamlab, xalqimiz farovonligiga xizmat qilishi shubhasizdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
