Уруғлик картошка етиштириш тизими устидан қатъий назорат ўрнатилган
Мамлакатимизнинг озиқ-овқат хавфсизлигини таъминлаш, ички бозорни сифатли ва арзон қишлоқ хўжалиги маҳсулотлари билан тўлдириш давлат сиёсатининг устувор йўналишларидан бири ҳисобланади. Айниқса, аҳолининг кундалик истеъмол рационида жуда муҳим ўрин тутадиган картошка етиштириш ҳажмини ошириш ҳамда бу борада мустаҳкам уруғчилик базасини яратиш бугунги куннинг энг долзарб вазифаларидан биридир.
Шу мақсадда Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Қорақалпоғистон Республикаси бошқармаси Амударё туман бўлими мутахассислари томонидан 2026 йил ҳосили учун экилган уруғлик картошка майдонлари устидан қатъий назорат ўрнатилган. Ушбу жараёнлар Ўзбекистон Республикаси Президентининг 2025 йил 8 сентябрдаги “Республикада картошка етиштиришни кўпайтириш ва уруғчилигини янада ривожлантиришга доир қўшимча чора-тадбирлар тўғрисида”ги қарори доирасида тизимли равишда амалга оширилмоқда.
Мазкур қарорда қатор муҳим вазифалар белгиланган. Хусусан, уруғлик картошка етиштириш бўйича кўп йиллик бой тажрибага эга бўлган субъектларни саралаб олиш, уларнинг ягона реестрини юритиш, шунингдек, мини-туганакларни экиш орқали юқори авлодли уруғлик картошка етиштириш ишлари йўлга қўйилди. Бундан ташқари, етиштирилган юқори авлодли уруғликни харид қилиш, келгуси йил ҳосили учун сифатли сақлаш, экиш олдидан тозалаш, саралаш, фракцияларга ажратиб калибрлаш, қадоқлаш ва рақамли QR код билан ёрлиқлаш каби замонавий усуллар амалиётга татбиқ этиляпти. Истеъмол картошкаси етиштирувчи субъектларга ҳам айнан шундай юқори авлодли уруғликларни шартнома асосида етказиб бериш тизими яратилди.
Амударё тумани мисолида таҳлил қиладиган бўлсак, ҳудудда 2026 йилги ҳосил учун жами 250 та фермер хўжалиги томонидан 300 гектардан ортиқ майдонга картошка уруғи экилган. Бу жараёнда қатъий талаблар асосида танловдан муваффақиятли ўтган 18 та фермер хўжалиги уруғлик картошка етиштириш ҳуқуқини қўлга киритиб, 27 гектар майдонда айнан шу йўналишда деҳқончилик қилмоқда. Ҳозирги кунда туман ишчи гуруҳи томонидан мазкур майдонларда дала мониторинги ўтказилиб, ўсимликнинг нав тозалигини аниқлаш мақсадида апробация кўриклари изчил олиб бориляпти. Инспекция ходимлари ушбу кўрикларнинг сифатли, холис ва ҳаққоний ўтказилишини кунлик назоратга олган.
Соҳадаги назорат ишлари фақатгина дала мониторинги билан чекланмайди. Ин витро лабораторияларида етиштирилган мини-туганаклар ва дала шароитида парваришланаётган юқори авлодли уруғлик картошканинг вегетация давридаги ҳолатини илмий кузатиш, вируслардан холи эканлигини баҳолаш каби йўналишларда ҳам кенг кўламли ишлар қилинмоқда.
Энг асосийси, 2026 йилдан бошлаб республикада ижобий экинбоплик хулосаси олинмаган ва рақамли QR код билан ёрлиқланмаган ҳар қандай маҳаллий ҳамда хорижий уруғлик картошканинг экилишига йўл қўймаслик юзасидан қатъий назорат ўрнатилади. Сифат кўрсаткичларининг амалдаги стандарт талабларига мослиги учун илмий муассасалар ва тадбиркорлар қонунчиликда белгиланган тартибда шахсан жавобгар ҳисобланади. Шу билан бирга, илғор хорижий тажрибаларни кенг жорий этиш мақсадида давлат илмий муассасаларига чет эл корхоналари ҳамда уларнинг лабораториялари билан шартнома асосида ҳамкорлик қилиш ҳуқуқи берилди.
Бир сўз билан айтганда, картошка етиштиришни кўпайтириш ва унинг уруғчилигини янада ривожлантириш бўйича тасдиқланган чора-тадбирлар дастури ижроси Амударё туманида сифатли ташкил қилинмоқда. Ушбу тизимли саъй-ҳаракатлар яқин келажакда дастурхонларимиз тўкинлигини ва бозорларимиздаги нарх-наво барқарорлигини мустаҳкамлаб, халқимиз фаровонлигига хизмат қилиши шубҳасиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
