Уруғлик чигитнинг сифати устидан қатъий назорат ўрнатилмоқда
Маълумки, 2026 йилнинг 1 январидан эътиборан мамлакатимизда уруғчилик соҳасида ўзига хос янги, рақамли давр бошланди. Унга кўра, мулкчилик шаклидан ва қайси идорага бўйсунишидан қатъи назар, уруғликларни етиштириш ва реализация қилиш билан шуғулланувчи барча тадбиркорлик субъектлари учун қатъий талаб ўрнатилди. Яъни, замонавий рақамли QR-кодли ёрлиқлар билан таъминланмаган, шунингдек, махсус лабораториялар томонидан ижобий экинбоплик хулосаси олинмаган ҳар қандай қишлоқ хўжалиги экинларининг уруғликларини реализация қилиш қатъиян тақиқланди. Бу жараён, авваламбор, фермерларни сифатсиз уруғлардан ҳимоя қилишга, қолаверса, юртимизда етиштирилаётган маҳсулотларнинг рақобатбардошлигини халқаро майдонда оширишга қаратилгани билан аҳамиятлидир.
Бу борада қабул қилинган Президентимизнинг махсус Фармони билан уруғлик пахта хом ашёсини қабул қилиш, уни хавфсиз ва сифатини йўқотмаган ҳолда сақлаш, дастлабки қайта ишлаш босқичларидан ўтказиш, уруғлик чигит тайёрлаш, уни фермерларга тарқатиш ва энг асосийси, барча босқичларда сифатни қатъий назорат қилиш бўйича масъул ташкилотларга бир қатор жиддий вазифалар юклатилган.
Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Қорақалпоғистон Республикаси бошқармаси Амударё туман бўлими томонидан мазкур Фармон асосида тизимли ишлар амалга оширилмоқда. Инспекция мутахассислари томонидан чигитни экишга тайёрлаш жараёнлари устидан қатъий ва тизимли назорат ўрнатилган. Зеро, мўл ва сифатли ҳосил етиштиришнинг асосий гарови бевосита ерга қадаладиган уруғнинг соғломлиги, экинбоплиги ва юқори унувчанлик хусусиятига боғлиқдир.
Жорий йилда Амударё туманида жами 13 минг гектар майдонга чигит экиш режалаштирилган. Эътиборли жиҳати шундаки, ушбу майдоннинг 3 минг 475 гектарига тўғридан-тўғри инновацион усуллар, яъни Хитой-Шинжон технологияси асосида хорижий, серҳосил пахта навларини экиш белгиланган. Бу замонавий технология нафақат ҳосилдорликни кескин оширишга, балки сув ва бошқа табиий ресурсларни тежашга ҳам хизмат қилади.
Шу билан бирга, тумандаги мавжуд фермер хўжаликлари ўртасида ўтказилган шаффоф танловлар натижасида 17 та энг илғор фермер хўжалиги уруғлик етиштириш ҳуқуқига эга бўлган. Мазкур хўжаликлар томонидан жорий йилда 874 гектар майдонда келаси йиллар учун сифатли уруғлик пахта етиштирилиши режалаштирилган бўлиб, бу ҳудуднинг маҳаллий уруғчилик базасини янада мустаҳкамлашга замин яратади.
Бугунги кунда туманда фаолият юритаётган “Амударё келажаги” ишлаб чиқариш кооперацияси томонидан хориждан келтирилган, сертификатланган ва барча сифат талабларига тўлиқ жавоб берадиган уруғлик чигитларни фермер хўжаликларига тизимли ва ўз вақтида тарқатиш ишлари уюшқоқлик билан амалга оширилмоқда.
Бу муҳим жараённинг ҳар бир босқичи, уруғнинг омбордан чиқишидан тортиб, то далага етиб боргунига қадар бўлган давр Агросаноат мажмуи устидан назорат қилиш инспекциясининг Амударё тумани бўлими инспекторлари томонидан куну тун назорат қилиб борилмоқда. Зеро, уруғлик чигитнинг сифатини назорат қилиш – бу шунчаки мавсумий агротехник жараён эмас, балки бутун бошли минтақанинг иқтисодий фаровонлиги, минглаб оилаларнинг барқарор даромади ва мамлакат енгил саноатини мустаҳкам хомашё билан таъминлашнинг асосий шартидир. Амударё туманида олиб борилаётган бу каби тадбирлар эртанги кунда хирмонимизнинг янада юксак бўлишига, эл-юртимиз дастурхони тўкинлиги ва иқтисодиётимизнинг янада гуллаб-яшнашига хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
