ТЎҒРИ АХБОРОТ ЁШЛАРНИ ЭЗГУЛИККА УНДАЙДИ

Маълумки, ёшлар янгиликка интилувчан, модага ўч, хориж стандартларини осон қабул қилишга мойил бўлади. Бугунги кунда ёшларга ташқи муҳитдан кириб келадиган барча ахборотларни фильтрлаб бериш имконияти йўқ. Юксак технологиялар ва ахборот асрида яшар эканмиз, табиийки, мамлакатимиз ҳам глобаллашув жараёнларидан ташқарида эмаслигини унутмаслигимиз зарур.

Бугунги кунда дунёни ташвишга солаётган, хусусан, шу кунларда МДҲ мамлакатларида тезда тарқалаётган "Кўк кит”, "Жим-жит уй”, "Ф-57”, "Югурмасанг, ўласан”, "Мен – ўйинда” каби ўз жонига қасд қилишга ундовчи ўйинларнинг ижтимоий тармоқлар орқали ёшларимизнинг эътиборини тортишининг олдини олиш учун ёшлар орасида профилактик тадбирлар олиб бориш, бунинг учун ота-оналар, маҳалла, таълим муассасалари, вояга етмаганлар ишлари бўйича комиссиялар ва ички ишлар бўлимлари  профилактика нозирлари, кенг жамоатчилик вакиллари томонидан ёшлар қўлидаги мобил қурилмалари ва компьютерларни вақти-вақти билан назорат қилиш лозим деб ўйлайман. Мамлакатимизда интернетдан фойдаланишни чекловчи қонунлар йўқ, аммо бу ҳар ким хоҳлаганча ундан фойдалансин, дегани эмас. Негаки, ҳар бир ишда меъёр бўлгани яхши. Ўзбекистонда айнан шундай ахборот манбаларидан фойдаланишни тартибга солувчи қонуний асослар яратиб қўйилганини унутмаслигимиз керак.

Туманимизда глобаллашув даврида ёшлар маънавиятини шакллантириш ва уларни миллий қадриятларга ҳурмат руҳида тарбиялаш мақсадида таълим тизимидаги муассасаларнинг деярли барчаси «ZiyoNET» тармоғига уланган. «ZiyoNET»да турли хил миллий таълим сайтлари мавжуд бўлиб, унинг асосий мақсади таълим тизимида ёшлар ва таълим олувчиларга билим олиш жараёнида ахборот-коммуникация хизматларини кўрсатишдан иборат.

Ёшларда ёт ғояларга қарши мустаҳкам иммунитетни шакллантириш мақсадида "Жаҳолатга қарши маърифат”, "Мен диний экстремизм ва терроризм таҳдидини қандай тушунаман?” мавзуларида ижодий ишлар (шеър, иншо ва расмлар) танловлари ташкил этилмоқда. Бундай маданий-маънавий тадбирларнинг амалга оширилишида Ўзбекистон «Миллий тикланиш» демократик партияси туман Кенгашининг депутатлик гуруҳи иштирокини ҳам таъкидлаб ўтиш зарур. Депутатлик гуруҳининг бевосита иштирокида жорий йилнинг апрель ойида умумтаълим мактаблари ва касб-ҳунар коллежлари, академик лицей ўқувчиқизлари иштирокида мамлакатимизнинг  Биринчи Президенти И.А.Каримовнинг «Юксак маънавият – енгилмас куч» асарининг «Маънавиятга таҳдид – ўзлигимизга таҳдид» номли бобини ўрганишга бағишланган тадбирлар ўтказилди.

Бундан ташқари, Ўзбекистон «Миллий тикланиш» демократик партиясининг «Донолик ва ташаббускорлик – сиёсий етакчилик мезони» кўрик танловининг туман босқичида тумандаги таълим муассасаларида фаолият юритаётган ёш зиёли аёл-қизлар иштирок қилиб, ўзларининг сиёсий билимдонлик даражасини намойиш қилдилар ва Қорақалпоғистон Республикаси миқёсида фахрли 2-ўринни эгаллашга эришдилар.

Жорий йилнинг май ойида умумтаълим мактабларида «Навоий ворислари» ғазалхонлик танловининг туман босқичи ўтказилди. Партия депутатлик гуруҳининг ташаббуси билан таълим муассасаларида «Китобнинг ёшлар маънавиятини шакллантиришдаги ўрни ва аҳамияти» мавзусида суҳбатлар уюштирилди.

Шуни унутмаслигимиз керакки, янгиликларнинг барчаси ҳам ижобий хусусиятга эга эмас. Интернетдан фойдаланувчи фарзандларимиз онгига буни яхшилаб сингдиришимиз лозим. Токи ёшларимиз янгиликлар ортидан қувиб, биздан узоқлашиб кетмасин.

Гулмирза Бабажанов,

52-сонли мактаб ўқитувчиси, халқ депутатлари туман Кенгаши депутати.

(Фото - uzedu.uz)