ОИЛАЛАР ТИНЧ-ТОТУВЛИГИ ЖАМИЯТ РИВОЖИНИ ТАЪМИНЛАЙДИ

Жамиятимизнинг равнақ топишидаги муҳим омиллардан бири – табаррук заминимизда истиқомат қилаётган инсонларнинг жисмонан соғлом, руҳан тетик, маънан етук ва комиллигидир. Чунки ҳар бир инсон оила аъзоси, оила эса жамиятнинг кичик бир бўғинидир.

Шу боисдан ҳам мустақиллик йилларида оилалар мустаҳкамлиги, тинч-тотувлигига эришишга улкан эътибор берилаётир. Кам таъминланган оилаларга ижтимоий нафақалар, моддий кўмаклар берилаяпти. Никоҳ ёшидаги йигит-қизларга маҳаллаларнинг кайвонилари, фаоллари соғлом оила қуриш борасида, оиланинг муқаддаслигини тушунтириш борасида суҳбатлар ўтказишаяпти. Турмуш қураётган ёшлар  никоҳолди тиббий кўрикдан ўтказилаяпти. Шунингдек, ўрта махсус, касб-ҳунар таълими муассасалари ўқувчилари орасида эрта никоҳнинг олдини олиш хусусида ҳам суҳбатлар уюштирилмоқда.

Бу саъй-ҳаракатларнинг ҳаммаси оила дея аталгувчи муқаддас қўрғонни безавол сақлашга, унда тинч-осойишта ва соғлом турмуш тарзи барқарор бўлишига эришишга қаратилгандир.

Оилалардаги ўзаро келишмовчиликлар, низолар ажримга олиб келаётгани  тарғибот ишларини яна ҳам жонлантириш лозимлигини кўрсатмоқда.

Туман фуқаролик ҳолати далолатномаларини ёзиш бўлими  томонидан шу йилнинг ўтган тўрт ойи давомида оила мустаҳкамлигига эришиш, оилавий низоларнинг ва ажримларнинг, эрта ва қариндошлар орасидаги никоҳларнинг олдини олишга бағишланган 27 та тарғибот тадбирлари ўтказилди.

Мутахассисларнинг маълумотларига кўра, инсоннинг оилавий тинч-хотиржамлиги, бахтиёрлиги ишдаги унумга, жисмоний фаолликка, саломатлигининг мустаҳкам бўлишига олиб келар экан. Шундай экан, ҳар бир оила давлат ҳимоясига олинган бизнинг жамиятимизда нотинч оила, ажрашган оила, деган атамаларга ўрин бўлмаслиги, турмушнинг майда-чуйда икир-чикирларини  оқилона ва ҳамжиҳатликда ҳал қилишнинг чора-тадбирлари кўрилиши керак. Чунки оила, юқорида айтганимиздай, жамиятнинг бир бўлаги. Оилалар тинч экан, жамият ривожланишда давом этаверади.

Муборак ПРИМБЕТОВА, туман ФҲДЁ бўлими инспектори.