БОЛАЛАРИ СОFЛОМ ЮРТ
Бизнинг 25-сонли мактабгача таълим муассасамизда 5-6 ёшли болаларни мактаб таълимига тайёрлаш, уларнинг қобилият ва иқтидорларини ривожлантириш, борасида ўзига хос тажриба тўпланган. Катта ва кичик гуруҳ тарбиячиларининг ўзаро ҳамкорлиги туфайли болалар МТМлар учун белгиланган таълим-тарбия дастурини жуда тез ва осон ўзлаштиришади. Бунда гуруҳлараро ўтказиладиган "Ширинтой-кичкинтой”, "Соғломжон-Полвонжон” кўрик-танловлари ва "Шахмат-шашка”, "Зумрадойлар давраси” ашула ва рақс, "Кичкинтой спортчи” тўгаракларининг машғулотлари болалар дунёқарашининг шаклланишида, уларнинг қалбида ўзаро меҳр-оқибат туйғуларининг уйғонишида муҳим аҳамият касб этмоқда.
Айниқса, "Соғломжон-Полвонжон” кўрик-танловида қатнашишга, ғолиб бўлишга интилиш, ўзига ишонч туйғуси болаларни кучли ва иродали бўлишга ўргатади. Муқаддас Хўжалапесова, Омонгул Бекниёзова, Тўлғоной Ўрозбоева, Аноргул Сапарбоева, Зумрадхон Шерматова каби тарбиячиларнинг ўз ишларига ижодий ёндашиб, ҳар бир машғулотни кўргазмали қуроллар асосида, табиат қўйнига саёҳат тарзида ўтказишлари боис, болалар бундай машғулотларда ўта қизиқувчанлик билан иштирок этадилар. Ашула ва рақс тўгараги раҳбари Сабоҳат Исмоилова томонидан ишлаб чиқилган тўгарак режавий тадбирлари болаларнинг жон-у дили. Чунки болалар она Ватан ҳақида, бахтиёр болалик ҳақида қўшиқ ўрганибгина қолмай, Сабоҳат опалари раҳбарлигида она Ватан манзараларини тасаввурларида жонлантиришни, бу ҳақда эркин ҳикоя қилиб беришни ўрганадилар.
Муассасамиз ҳар йили туман ва республика миқёсидаги турли кўрик-танловларда муваффақиятли иштирок этиб келмоқда. Айниқса, "Соғломжон-Полвонжон” кўрик-танловида 2013 йилда туман ва Қорақалпоғистон Республикасида фахрли 1-ўринни эгаллаган болажонларимиз 2016 йилда ҳам ушбу кўрик-танловнинг туман босқичи ғолиби бўлишди ва Қорақалпоғистон Республикаси босқичига йўлланма олдик.
Кичкинтойларнинг соғлигини ҳар куни кўрикдан ўтказиб, уларга берилаётган таомлар рўйхатини тузишда муассаса ҳамшираси Тамара опа Усанбоеванинг хизмати алоҳида таҳсинга лойиқ. Бундан ташқари, муассаса мудири Бахтиёр Ешимбетов таъмирлаш, ободонлаштириш ва кўкаламзорлаштириш ишларига алоҳида эътибор берганлиги туфайли боғчамиз ҳавас қилса арзигулик кўркам қиёфа касб этган. Муассасамизга раҳбарлик қилиб келаётган Бахтиёр Ешимбетов муассасамизда ўтказиладиган барча тадбирларнинг саховатпеша ҳомийси ҳисобланади.
Юртимизда ҳар куни байрам. Мустақиллигимизнинг 25 йиллигига бағишланган байрамона тадбирлар бизнинг Бобур номли овулга ҳам тантанаворлик бахш этган. Ўзларининг чиройли рақслари, шўх-шодон ашулалари билан ана шундай тадбирларда иштирок этаётган болажонларимизнинг юзларидаги қувонч ва бахтиёрлик нашидаси ҳар бир кўнгилга хотиржамлик бағишлайди.
Болалари соғлом, бахтиёр ва қувноқ Ватанимизда, халқимиз қалбида ана шундай хотиржамлик ҳоким экан, ҲУРлик ва ОЗОДЛИК, ТИНЧЛИК қуёши мангу порлайверади.
Тозагул НОРБОЕВА,
Бобур номли овулдаги 25-сонли МТМ тарбиячиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
