ТОТУВЛИКДАН РАНГ ОЛГАН БАХТ
Дунёда давлатлар кўп, эл-у элатлар, миллатлар кўп. Ҳар бирининг ўз қонунлари, шарт-шароитлари, амал қиладиган урф-у одатлари бор.
Мен телевидение кўрсатувлари, радиоканаллар, вақтли матбуот орқали ҳаётимизда юз бераётган янгиликлардан мунтазам хабардор бўлиб бориш асносида дунё халқларининг турмуш тарзи билан мамлакатимиз халқлари ҳаётини солиштириб, кўнглим яшнаб кетади. Ахир кўз очиб, шу қутлуғ заминни кўрдим, шу тупроқдан, шу мусаффо ҳаводан куч олиб ўсдим, ўқиб, илм олдим. Умримнинг асосий қисмини ўзим туғилиб, ўсган Амир Темур номли овул ёшларига тарих ва география фанларидан дарс беришга бағишладим. Тумандаги ўқиш туркман тилида олиб бориладиган 25-сонли мактабда то нафақага чиққунча ўқитувчи бўлиб ишладим. Ўзим қозоқ миллатига мансуб бўлсам-да, ўқувчиларимга туркман тилида сабоқ бердим.
Оиламиз эса байналмилал оилалардан. Умр йўлдошим Байрамгул Нуриева туркман қизи. У билан 4 қиз, 2 ўғилни тарбиялаб, вояга етказдик. Фарзандларимизнинг барчаси ўқимишли. Катта ўғлим Бектурсун кимё-биология фани ўқитувчиси, Рустамжон эса бошланғич таълим бўйича ўқитувчи, икки нафар қизим ҳам менинг касбимни танлашган. Икки қизим ҳамшира. Турмуш ўртоғим умр бўйи фермер хўжалигида ишлаб, нафақага чиқди. Ўндан ортиқ невараларимиз қувончини кўриб, қарилик гаштини суриб яшаяпмиз. Туркман миллатига мансуб келинларим, куёвларимнинг аҳиллигидан қувониб кетаман. Оиламизда туркман, қозоқ ва ўзбек халқларининг урф-одат ва анъаналарига алоҳида эътибор ва ҳурмат билан қаралади. Тўй-маросимларимизни кўрсангиз, тўғриси, ҳавасингиз келади. Бири-бирини тўлдириб, бири-бирига уйқашиб, ярашиб турган анъана ва қадриятлар, ўзаро ҳурмат ва эҳтиром, тотувлик маъракаларимизни яшнатиб, кўнгилларимизни яйратиб юборади. Буларнинг барчаси мамлакатимиздаги миллатлараро тотувлик ва бағрикенглик, ўзаро меҳр-оқибат туфайлидир.
Ушбу қутлуғ онларда мен азиз Аму элимни, қадрдон дўст-у биродарларимни, илдизи бир, томири томиримга туташ жонажон халқимни мустақиллигимизнинг шонли 25 йиллиги билан қизғин табриклайман. Илоҳим, тинчлик, тотувликдан ранг олган бахтимиз, истиқлолимиз боқий бўлсин!
Адай ТИЛЕПОВ,
фахрий ўқитувчи, Амир Темур номли овул.
(Фото - http://uzbekistonovozi.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
