3298 нафар 11-синф битирувчилари, 14 та олтин ва 5 та кумуш медаль: туман мактабларида "Сўнгги қўнғироқ" жаранглади

Таълим – ҳар қандай жамият тараққиётининг пойдевори ҳисобланади. Бугунги кунда мамлакатимизда ёш авлодни қўллаб-қувватлаш, уларга жаҳон стандартлари даражасида билим бериш ва муносиб шарт-шароитлар яратиш давлат сиёсатининг энг устувор йўналишига айланган. Ушбу эзгу мақсадларнинг ёрқин ифодасини Амударё тумани мисолида ҳам яққол кўриш мумкин. Жорий 2025-2026 ўқув йили туман таълим тизими учун улкан ўзгаришлар, юксак марралар ва эсда қоларли ютуқларга бой бўлди. Тумандаги барча умумий ўрта таълим мактабларида чалинган “Сўнгги қўнғироқ” садолари нафақат навбатдаги ўқув йилининг якуни, балки янги ҳаёт остонасида турган кўплаб ёшлар учун порлоқ келажак сари ташланган муҳим қадамнинг дебочасига айланди.

Жорий ўқув йилида Амударё туманидаги умумий ўрта таълим мактабларининг 11-синфини жами 3298 нафар ўқувчи ёшлар тамомламоқда. Шулардан 14 нафар битирувчи олтин ҳамда 5 нафар битирувчи кумуш медал соҳиби бўлишди. 25 май куни барча таълим даргоҳларида “Сўнгги қўнғироқ” тадбирлари “Юксак маърифатли авлод – Учинчи Ренессанс пойдевори!” деган эзгу шиор остида кўтаринки руҳда ўтказилди.

Тантанали маросимларда Ўзбекистон Республикаси Президенти Шавкат Мирзиёевнинг мактаб битирувчиларига йўллаган байрам табриги ўқиб эшиттирилди. Шунингдек, барча мактабларга тумандаги муассаса, корхона ва ташкилотлар раҳбарлари ташриф буюриб, давлатимиз раҳбарининг табригини етказди ва ёшларга “Оқ йўл” тилаб, таълим соҳасида олиб борилаётган ислоҳотлар мазмун-моҳиятини тушунтирди.

Тумандаги пешқадам таълим даргоҳларидан бўлган 40-сонли мактабда ўтказилган “Сўнгги қўнғироқ” тадбирида туман ҳокими Собир Хўжаметов иштирок этиб, ёшларни муборакбод этди. Таъкидланганидек, туман таълим тизимида жорий йилда эришилган ютуқлар салмоғи жуда юқори. Асосий фанлар олимпиадасининг Қорақалпоғистон Республикаси босқичида 6 нафар ўқувчи совринли ўринларни қўлга киритиб, умумжамоа ҳисобида Амударё тумани 6-ўринни эгаллади. “Беш ташаббус” олимпиадаси доирасидаги “Ёш китобхон” танловининг 10-14 ёш тоифасида 20-мактаб ўқувчиси Шаҳризода Нуримбетова Қорақалпоғистон Республикаси босқичида 1-ўринни эгаллаб, мамлакат босқичига йўлланма олди. Спорт соҳасида ҳам натижалар қувонарли. Футбол бўйича “Мактабгача ва мактаб таълими вазири кубоги” мусобақасида 37-мактаб жамоаси республикада 1-ўринга чиқиб, финал босқичига йўл олди. Хорижий тилларни ўрганиш кўрсаткичлари ҳам кескин ошган бўлиб, инглиз тили бўйича 370 нафар, умумтаълим фанлари бўйича эса 1300 нафар ўқувчи миллий ва халқаро сертификатларга эга бўлди. Энг эътиборлиси, 4 та фандан сертификат олиб, максимал 189 балл тўплаган 41 нафар ўқувчи муддатидан олдин олий таълим муассасаси талабаси деган шарафли номга сазовор бўлди.

2025 йилги инвестиция дастури доирасида Чойкўл овулидаги 59-мактабда лойиҳа қиймати 4 млрд 687 млн сўмлик 180 ўринли янги 2 қаватли бино ва спорт зали қуриб битказилган бўлса, Бўзёп овулидаги 68-мактабда 5 млрд 950 млн сўм маблағ эвазига 330 ўринли 3 қаватли бино ва спорт зали фойдаланишга топширилди. Бундан ташқари, ОПЕК дастури асосида Олмазор маҳалласи ҳудудида 120 ўринли бино учун 5 млрд 561 млн сўм, Фаровон маҳалласи ҳудудида 90 ўринли бинога 4 млрд 930 млн сўм, Арна бўйи маҳалласи ҳудудида 150 ўринли бино учун 5 млрд 801 млн сўм ва Дўстлик маҳалласида 240 ўринли мактабгача таълим ташкилоти учун 8 млрд 610 млн сўм йўналтирилди. Умумий қиймати 24 млрд 902 млн сўмлик 4 та замонавий мактабгача таълим ташкилотида қурилиш ишлари якунланди.

2026 йилги истиқболли режаларга мувофиқ, 30-, 39- ва 65-мактабларда жами 1410 ўринли биноларни реконструксия қилиш ишлари, 37-мактабда капитал таъмирлаш, 32-сонли мактабгача таълим ташкилотида 90 ўринли бинони реконструксия қилиш ишлари бошланди. Бештом ва Оқ олтин маҳаллаларида жами 150 ўринли 2 та янги боғча, шунингдек халқаро банк маблағлари ҳисобидан 57- ва 64-мактаблар ҳамда 17-мактабгача таълим ташкилотида янги қурилишлар жадал олиб борилмоқда.

Тумандаги илғор таълим муассасаларидан бири бўлган 40-сонли мактабнинг 11-синфини бу йил 143 нафар, 9-синфини эса 162 нафар ўқувчи тамомламоқда. Қувонарлиси, 13 нафар битирувчи 188 ва 189 балл билан аллақачон талабаликка қабул қилинган бўлса, мактаб бўйича 142 нафар ўқувчи 300 га яқин сертификатларни қўлга киритган. Мактаб жамоаси “Хорижий тилларни ўқитиш бўйича энг яхши мактаб” танловида туманда 1-ўринни олиб 100 млн сўм, Қорақалпоғистон Республикасида 3-ўринни эгаллаб 150 млн сўм ютуққа эга бўлди.

Мактабнинг фидойи устозлари ҳам юқори натижалар қайд этмоқда. Ҳуқуқ фани ўқитувчиси Ирода Яхшимуротова “Йилнинг энг яхши ҳуқуқ фани ўқитувчиси” кўрик-танловининг Қорақалпоғистон Республикаси босқичида 1-ўринни эгаллаб, мамлакат миқёсида “Энг яхши тақдимот эгаси” номинатсиясига лойиқ кўрилди ва ҳозирда “Йил ўқитувчиси” танловининг 3-босқичида иштирок этмоқда. Она тили фани ўқитувчиси Иқболой Юсуфова эса “Йилнинг энг яхши ўзбек тили фани ўқитувчиси” кўрик-танловининг Қорақалпоғистон босқичида 1-ўринни, Ўзбекистон Республикасида эса 3-ўринни эгаллади. Математика фани ўқитувчиси Шерзод Аширов ва тарих фани ўқитувчиси Жаҳонгир Отаназаровларнинг ҳар бирининг  60 нафардан ўқувчилари турли фанлар бўйича сертификатларни қўлга киритишган.

Фан олимпиадаларида мактабнинг 12 нафар ўқувчиси туман бўйича ғолиб деб топилди. Мактаб қошидаги “Турон” театр студияси республикада “Энг фаол жамоа” номини олди. “Иқтидор мактаб” ансамбли туманда 2-ўринни эгаллади. Таълим даргоҳи “Аъло мактаб” лойиҳасида 418 балл тўплаб, фахрли 2-ўринда бормоқда. Мактабда 31 нафар олий тоифали ва 35 нафар 1-тоифали ўқитувчи меҳнат қилади. Уларнинг 8 нафари вазир жамғармаси номзодлари бўлса, 11 нафар ўқитувчи 70 фоизлик устамага эга. Мактаб директори Санобар Хўжамуродова менежерлик сертификати бўйича энг юқори балл тўплаб, Малайзияда малака ошириб қайтди. Бундай юқори кўрсаткичлар, замонавий шарт-шароитлар ва тинимсиз изланишлар орқали қўлга киритилаётган ютуқлар туман таълим тизимининг нурли келажагидан далолат беради.

25 май куни барча мактабларда жаранглаган сўнгги қўнғироқ садолари остида 3 минг нафардан зиёд ўғил-қизлар мустақил ҳаёт сари йўл олган бўлса, қолган ўқувчилар ёзги таътилга кузатилди. Битирувчиларга нуфузли олий ўқув юртларининг талабалари бўлиб, илм чўққиларини забт этиш ва касб-ҳунар эгаллаб, юртимиз тараққиётига ҳисса қўшишдек бахт насиб қилишини тилаймиз. Уларнинг ўрнини босиб келаётган қуйи синфлар ўқувчиларининг эса ёзги таътилни мароқли ўтказиб, янги ўқув йилида янада юксак марраларни қўлга киритишларига тилакдошмиз.